ಕೆಎಸ್‌ಒಯು: ಪ್ರಾದೇಶಿಕ ನಿರ್ದೇಶಕರ ವರ್ಗಾವಣೆ ತಡೆಹಿಡಿದ ಕುಲಪತಿ

ಕೆಎಸ್‌ಒಯುಗೆ ರಾಜ್ಯದ ವಿವಿಧ ಭಾಗಗಳಲ್ಲಿ ಒಟ್ಟು 18 ಪ್ರಾದೇಶಿಕ ಕೇಂದ್ರಗಳಿವೆ. ಈ ಪೈಕಿ 7 ಪ್ರಾದೇಶಿಕ ನಿರ್ದೇಶಕರನ್ನು ವರ್ಗಾವಣೆ ಮಾಡಿ ಹಿಂದಿನ ಕುಲಪತಿ ಪ್ರೊ.ಡಿ.ಶಿವಲಿಂಗಯ್ಯ, ಮೇ 27ರಂದು ಆದೇಶ ಮಾಡಿದ್ದರು. ಈ ಆದೇಶವನ್ನು ತಡೆಹಿಡಿದಿದ್ದು, ಆಯಾ ಕೇಂದ್ರಗಳಲ್ಲೇ ಕಾರ್ಯನಿರ್ವಹಿಸುವಂತೆ ಸೂಚನೆ ನೀಡಿದ್ದಾರೆ.

‘ವರ್ಗಾವಣೆಗೆ ಸೂಕ್ತ ಮಾನದಂಡ ನಿಗದಿಪಡಿಸಿಲ್ಲ. ಕಾರ್ಯಕ್ಷಮತೆ, ಸೇವಾ ಅವಧಿ ಇತ್ಯಾದಿ ವಿಚಾರಗಳನ್ನು ಉಲ್ಲೇಖಿಸಿಲ್ಲ. ಹೀಗಾಗಿ, ಈ ಕುರಿತು ವಿ.ವಿ ನಿರ್ಧಾರ ಕೈಗೊಳ್ಳಬೇಕಿದೆ. ವ್ಯವಸ್ಥಾಪನಾ ಮಂಡಳಿ ಸಭೆಯಲ್ಲಿ ಈ ವಿಷಯ ಮಂಡಿಸಿ ಚರ್ಚಿಸಲಾಗುವುದು’ ಎಂದು ಪ್ರೊ.ವಿದ್ಯಾಶಂಕರ್ ಪ್ರತಿಕ್ರಿಯಿಸಿದರು.

‘ಕುಲಪತಿ ಅವಧಿ ಮುಗಿಯುವುದಕ್ಕೆ 6 ತಿಂಗಳಿರುವಂತೆ ವರ್ಗಾವಣೆ, ನೇಮಕಾತಿ ಸಂಬಂಧಿಸಿದಂತೆ ಆದೇಶ ಮಾಡುವಂತಿಲ್ಲ. ಆದರೆ, ಮೇ 27ರಂದು ಈ ಆದೇಶವಾಗಿದೆ. ಆದೇಶವನ್ನು ರದ್ದುಪಡಿಸಿಲ್ಲ, ಬದಲಿಗೆ ಮುಂದಿನ ಆದೇಶದವರೆಗೆ ತಡೆಹಿಡಿಯಲಾಗಿದೆ’ ಎಂದರು.