ಗುರುವಾರ , ಏಪ್ರಿಲ್ 2, 2020
19 °C

ಬಸ್‌ ಯಾನ ದುಬಾರಿ; ಶೇ 12ರಷ್ಟು ದರ ಏರಿಸಿದ ಕೆಎಸ್‌ಆರ್‌ಟಿಸಿ

ಪ್ರಜಾವಾಣಿ ವಾರ್ತೆ Updated:

ಅಕ್ಷರ ಗಾತ್ರ : | |

KSRTC

ಬೆಂಗಳೂರು: ಕೆಎಸ್‌ಆರ್‌ಟಿಸಿ, ವಾಯವ್ಯ ಮತ್ತು ಈಶಾನ್ಯ ರಸ್ತೆ ಸಾರಿಗೆ ಸಂಸ್ಥೆಗಳ ಬಸ್‌ ಪ್ರಯಾಣ ದರವನ್ನು ಶೇ 12 ರಷ್ಟು ಏರಿಕೆ ಮಾಡಲು ರಾಜ್ಯ ಸರ್ಕಾರ ಒಪ್ಪಿಗೆ ನೀಡಿದೆ.

ಬಸ್‌ ಪ್ರಯಾಣ ದರ ಏರಿಕೆ ಮಂಗಳವಾರ ಮಧ್ಯರಾತ್ರಿಯಿಂದಲೇ ಜಾರಿಯಾಗಿದೆ. ₹100 ಕೊಡಬೇಕಿದ್ದ ಪ್ರಯಾಣಿಕರು ದರ ಪರಿಷ್ಕರಣೆ ಬಳಿಕ ₹12 ಹೆಚ್ಚುವರಿಯಾಗಿ ಪಾವತಿಸ
ಬೇಕಾಗುತ್ತದೆ. ₹500 ಟಿಕೆಟ್‌ ದರ ಇದ್ದರೆ ₹60 ಹೆಚ್ಚುವರಿ ಹೊರೆ ಹೊರಬೇಕಾಗುತ್ತದೆ. ಆದರೆ, ಈ ಏರಿಕೆ ಬಿಎಂಟಿಸಿಗೆ ಅನ್ವಯವಾಗುವುದಿಲ್ಲ. 

ಮೂರೂ ಸಾರಿಗೆ ಸಂಸ್ಥೆ ನಿಗಮಗಳು ಬಸ್‌ ಪ್ರಯಾಣ ದರ ಏರಿಸುವಂತೆ ಮೈತ್ರಿ ಸರ್ಕಾರ ಇದ್ದಾಗಲೇ ಪ್ರಸ್ತಾವನೆ ಸಲ್ಲಿಸಿದ್ದವು. ಆಗ ಆ ಬಗ್ಗೆ ಯಾವುದೇ ತೀರ್ಮಾನ ತೆಗೆದುಕೊಂಡಿರಲಿಲ್ಲ. ಬಿಜೆಪಿ ಸರ್ಕಾರ ಬಂದಾಗಲೂ ನಿಗಮಗಳು ಮತ್ತೊಮ್ಮೆ ಪ್ರಸ್ತಾವನೆ ಮುಂದಿಟ್ಟಿದ್ದವು. ದರ ಏರಿಕೆ ಪ್ರಸ್ತಾವನೆಯನ್ನು ಸರ್ಕಾರ ಮುಂದೂಡುತ್ತಲೇ ಬಂದಿತ್ತು.

ಈ ಮೊದಲು 2014 ರ ಮೇ ತಿಂಗಳಿನಲ್ಲಿ ಪ್ರಯಾಣ ದರ ಏರಿಕೆ ಮಾಡಲಾಗಿತ್ತು. ಆ ಬಳಿಕ ಏರಿಕೆ ಮಾಡಿಲ್ಲ. ಡೀಸೆಲ್‌ ದರ ಲೀಟರ್‌ಗೆ ಶೇ 11.27 ರಷ್ಟು ಹೆಚ್ಚಳವಾಗಿದೆ. ಇಂಧನ ದರ ಪರಿಷ್ಕರಣೆಯಿಂದ ನಿಗಮಕ್ಕೆ ₹260.83 ಕೋಟಿ ಹೊರೆ ಆಗುತ್ತಿದೆ ಎಂದು ಕೆಎಸ್‌ಆರ್‌ಟಿಸಿ ಹೇಳಿದೆ.

ನಿಗಮದ ನೌಕರರಿಗೆ ನೀಡಲಾಗುವ ತುಟ್ಟಿಭತ್ಯೆ ಪರಿಷ್ಕರಣೆಯಿಂದಾಗಿ ಕಾರ್ಯಾಚರಣೆಯ ವೆಚ್ಚದಲ್ಲಿ ₹340.38 ಕೋಟಿ ಅಧಿಕವಾಗಿದೆ. ಒಟ್ಟಾರೆ ಹೊರೆ ಪ್ರತಿ ವರ್ಷ ₹601.21 ಕೋಟಿ ಆಗುತ್ತಿದೆ ಎಂದೂ ತಿಳಿಸಿದೆ.

ವಿದ್ಯಾರ್ಥಿಗಳ ಪಾಸ್‌ಗಿಲ್ಲ ಹೊರೆ

- ಶಾಲಾ ಮತ್ತು ಕಾಲೇಜು ವಿದ್ಯಾರ್ಥಿಗಳು ಮತ್ತು ಅಂಗವಿಕಲರ ಬಸ್‌ ಪಾಸ್‌ ದರ ಹೆಚ್ಚಳ ಆಗುವುದಿಲ್ಲ.

- ಗ್ರಾಮೀಣ ಪ್ರದೇಶಗಳ ಜನರ ಹೊರೆ ಕಡಿಮೆ ಮಾಡಲು ಸಾಮಾನ್ಯ ಸಾರಿಗೆಗಳಲ್ಲಿ ಮೊದಲ 3 ಕಿ.ಮೀಗಳವರೆಗೆ ಇದ್ದ ಪ್ರಯಾಣ ದರ ₹ 7 ಅನ್ನು ₹ 5 ಕ್ಕೆ ಇಳಿಸಲಾಗಿದೆ.

- ಸಾಮಾನ್ಯ ಸಾರಿಗೆ ಬಸ್‌ಗಳಲ್ಲಿ ಮೊದಲ 12 ಮತ್ತು 15 ಕಿ.ಮೀವರೆಗಿನ ಪ್ರಯಾಣ ದರ ಏರಿಕೆಯಾಗಿಲ್ಲ.

 

ಪ್ರಜಾವಾಣಿ ಫೇಸ್‌ಬುಕ್ ಪುಟವನ್ನು ಲೈಕ್ ಮಾಡಿ, ಪ್ರಮುಖ ಸುದ್ದಿಗಳ ಅಪ್‌ಡೇಟ್ಸ್ ಪಡೆಯಿರಿ.

ಪ್ರಜಾವಾಣಿಯನ್ನು ಟ್ವಿಟರ್‌ನಲ್ಲಿ ಇಲ್ಲಿ ಫಾಲೋ ಮಾಡಿ.

ಟೆಲಿಗ್ರಾಂ ಮೂಲಕ ನಮ್ಮ ಸುದ್ದಿಗಳ ಅಪ್‌ಡೇಟ್ಸ್ ಪಡೆಯಲು ಇಲ್ಲಿ ಕ್ಲಿಕ್ ಮಾಡಿ.

ಪ್ರತಿಕ್ರಿಯಿಸಿ (+)

ಈ ವಿಭಾಗದಿಂದ ಇನ್ನಷ್ಟು