ರೆಂಟೆ, ಕುಂಟೆ, ನೇಗಿಲ, ಚಕ್ಕಡಿ ಮುಂತಾದ ಕೃಷಿ ಸಲಕರಣೆಗಳನ್ನು ಮಾಡುವುದು ಅವರ ಕಾಯಕ. 16ನೇ ವಯಸ್ಸಿನಿಂದಲೇ ಮರ ಕೆತ್ತಲು ಆರಂಭಿಸಿದ ಈ ಅಜ್ಜ; ಆಲಗೂಡ ಹಾಗೂ ತೊಂಡಕಲ್ಲ ಗ್ರಾಮದ ಎಲ್ಲ ರೈತರಿಗೂ ಆಧಾರ. ಅವರ ಮೇಲಿನ ಅಭಿಮಾನದಿಂದಾಗಿ ಈವರೆಗೆ ಈ ಎರಡೂ ಹಳ್ಳಿಗಳಲ್ಲಿ ಇನ್ನೊಬ್ಬರು ಮರ ಕೆತ್ತುವ ಕೆಲಸ ಮಾಡಲು ಮುಂದಾಗಿಲ್ಲ. ಬೆಳಿಗ್ಗೆ 7ಕ್ಕೆ ಕೆಲಸ ಆರಂಭವಾದರೆ ಸಂಜೆ 7ರವರೆಗೆ ಬಿಡುವಿಲ್ಲದ ದುಡಿಮೆ. ಈ ಊರಿಗೆ ಯಾರೇ ಕಾಲಿಟ್ಟರೂ ಮರದಡಿ ಕುಳಿತ ಈ ಹಿರಿಯ ಜೀವವೇ ಮೊದಲು ದರ್ಶನ ನೀಡುವುದು.