ಗುರುವಾರ, 28 ಮಾರ್ಚ್ 2024
×
ADVERTISEMENT
ಈ ಕ್ಷಣ :
ADVERTISEMENT
ADVERTISEMENT

ಆರ್ಥಿಕತೆಗೆ ₹ 80 ಲಕ್ಷ ಕೋಟಿ ನಷ್ಟ

ಇನ್‌ಸ್ಟಿಟ್ಯೂಟ್‌ ಫಾರ್‌ ಇಕನಾಮಿಕ್ಸ್‌ ಆ್ಯಂಡ್‌ ಪೀಸ್‌ ಅಧ್ಯಯನ ವರದಿ
Last Updated 10 ಜೂನ್ 2018, 19:30 IST
ಅಕ್ಷರ ಗಾತ್ರ

ನವದೆಹಲಿ: ಹಿಂದಿನ ಹಣಕಾಸು ವರ್ಷದಲ್ಲಿ ದೇಶದಲ್ಲಿ ನಡೆದ ಹಿಂಸಾಚಾರಗಳಿಂದ ಆರ್ಥಿಕತೆಗೆ ₹ 80 ಲಕ್ಷ ಕೋಟಿಗೂ ಹೆಚ್ಚು ನಷ್ಟ ಉಂಟಾಗಿದೆ.

ಇನ್‌ಸ್ಟಿಟ್ಯೂಟ್‌ ಫಾರ್‌ ಇಕನಾಮಿಕ್ಸ್‌ ಆ್ಯಂಡ್‌ ಪೀಸ್‌ (ಐಇಪಿ), 163 ದೇಶಗಳ ಆರ್ಥಿಕತೆ, ಹಿಂಸಾಚಾರ ಮತ್ತು ಭಯೋತ್ಪಾದನೆ ಕೃತ್ಯಗಳ ಒಟ್ಟಾರೆ ಪ್ರಭಾವ ಪರಿಗಣಿಸಿ ಈ ವಿಶ್ಲೇಷಣೆ ಮಾಡಿದೆ. 2017ರಲ್ಲಿ ಭಾರತದಲ್ಲಿ ನಡೆದ ಹಿಂಸಾಚಾರದಿಂದ ಒಟ್ಟು ಆಂತರಿಕ ಉತ್ಪನ್ನದ (ಜಿಡಿಪಿ) ಶೇ 9ರಷ್ಟು ನಷ್ಟ ಸಂಭವಿಸಿದೆ.

ಎರಡು ದೇಶಗಳ ಕರೆನ್ಸಿಗಳ ಖರೀದಿ ಸಾಮರ್ಥ್ಯಕ್ಕೆ ಸಂಬಂಧಿಸಿದ ವಿನಿಮಯ ದರ ಆಧರಿಸಿ (ಪಿಪಿಪಿ) ಈ ನಷ್ಟ ಲೆಕ್ಕ ಹಾಕಲಾಗುತ್ತಿದೆ.

ಹಿಂಸಾಕೃತ್ಯಗಳು ಮತ್ತು ಭಯೋತ್ಪಾದನೆ ಕೃತ್ಯಗಳಿಂದ ಜಾಗತಿಕ ಆರ್ಥಿಕತೆಗೆ ₹ 989 ಲಕ್ಷ ಕೋಟಿಗಳಷ್ಟು ನಷ್ಟ ಆಗಿದೆ. ಹಿಂಸಾಚಾರ ನಿಯಂತ್ರಣ, ತಡೆಗಟ್ಟುವಿಕೆ ಮತ್ತು ಅವುಗಳ ಪರಿಣಾಮಗಳೆಲ್ಲವನ್ನು ಈ ನಷ್ಟದಲ್ಲಿ ಪರಿಗಣನೆಗೆ ತೆಗೆದುಕೊಳ್ಳಲಾಗಿದೆ.

ವಿಶ್ವದಾದ್ಯಂತ ಹೆಚ್ಚಿದ ಭಯೋತ್ಪಾದಕರ ಚಟುವಟಿಕೆ, ಮಧ್ಯಪ್ರಾಚ್ಯದಲ್ಲಿ ತೀವ್ರಗೊಂಡ ಸಂಘರ್ಷ, ಪೂರ್ವ ಯುರೋಪ್‌ನಲ್ಲಿ ಹೆಚ್ಚುತ್ತಿರುವ ಪ್ರಾದೇಶಿಕ ಉದ್ವಿಗ್ನತೆ, ಅಮೆರಿಕ ಮತ್ತು ಯುರೋಪ್‌ಗಳಲ್ಲಿ ಹೆಚ್ಚುತ್ತಿರುವ ವಲಸಿಗರ ಸಂಖ್ಯೆ ಹಾಗೂ ರಾಜಕೀಯ ಅನಿಶ್ಚಿತತೆಯು  ಇತ್ತೀಚಿನ ದಶಕಗಳಲ್ಲಿ ಶಾಂತಿಯ ವಾತಾವರಣ ಕದಡಿವೆ.

ಏಷ್ಯಾ – ಪೆಸಿಫಿಕ್‌ ಪ್ರದೇಶವು, ವಿಶ್ವದಲ್ಲಿಯೇ ಮೂರನೇ ಅತ್ಯಂತ ಶಾಂತಿ ನೆಲೆಸಿದ ಪ್ರದೇಶ ಎನ್ನುವ ಹೆಗ್ಗಳಿಕೆಗೆ ಪಾತ್ರವಾಗಿದೆ. ನೆರೆಹೊರೆ ದೇಶಗಳ ಮಧ್ಯೆ  ಬಾಂಧವ್ಯ ಸುಧಾರಿಸಿದೆ. ಆದರೆ, ಹಿಂಸಾತ್ಮಕ ಅಪರಾಧಗಳು, ಭಯೋತ್ಪಾದನೆಯ ಪರಿಣಾಮ, ರಾಜಕೀಯ ಅಸ್ಥಿರತೆ ಮತ್ತು  ಭಯೋತ್ಪಾದನೆಯು ಶಾಂತಿ ಕದಡುತ್ತಿದೆ. ಭಾರತ ಮತ್ತು ಚೀನಾ ಮಧ್ಯೆ ಡೋಕ್ಲಾಂನಲ್ಲಿ ಉದ್ಭವಿಸಿದ್ದ ಗಡಿ ವಿವಾದವು ಮೂರು ತಿಂಗಳ ಕಾಲ ಉದ್ವಿಗ್ನತೆಗೆ ಕಾರಣವಾಗಿತ್ತು ಎಂದು ವರದಿಯಲ್ಲಿ ಉಲ್ಲೇಖಿಸಲಾಗಿದೆ.

ಹಿಂಸಾಚಾರದಿಂದ ಒಟ್ಟಾರೆ ಆರ್ಥಿಕತೆ ಮೇಲೆ 2017ರಲ್ಲಿ  ಒಂದು ದಶಕದಲ್ಲಿಯೇ ಗರಿಷ್ಠ ಪ್ರಮಾಣದಲ್ಲಿ ನಷ್ಟ ಉಂಟಾಗಿತ್ತು. ಅಂತರರಾಷ್ಟ್ರೀಯ ಭದ್ರತಾ ವೆಚ್ಚದಲ್ಲಿನ ಹೆಚ್ಚಳದ ಪರಿಣಾಮವಾಗಿ ಜಾಗತಿಕ ಆರ್ಥಿಕತೆ ಮೇಲಿನ ಹಿಂಸಾಚಾರದ ಪ್ರಭಾವವು 2016ರಿಂದ 2017ರಲ್ಲಿ ಶೇ 2.1ರಷ್ಟು ಏರಿಕೆ ಕಂಡಿತ್ತು.

ಹಿಂಸಾಚಾರವು ಆರ್ಥಿಕತೆ ಮೇಲೆ ಕನಿಷ್ಠ ಪ್ರಮಾಣದಲ್ಲಿ ಪ್ರಭಾವ ಬೀರಿದ ದೇಶಗಳ ಸಾಲಿನಲ್ಲಿ ಸ್ವಿಟ್ಜರ್ಲೆಂಡ್‌ ಮೊದಲ ಸ್ಥಾನದಲ್ಲಿ ಇದೆ. ಇಂಡೊನೇಷ್ಯಾ ದ್ವಿತೀಯ ಸ್ಥಾನದಲ್ಲಿ ಇದೆ.

ತಾಜಾ ಸುದ್ದಿಗಾಗಿ ಪ್ರಜಾವಾಣಿ ಟೆಲಿಗ್ರಾಂ ಚಾನೆಲ್ ಸೇರಿಕೊಳ್ಳಿ | ಪ್ರಜಾವಾಣಿ ಆ್ಯಪ್ ಇಲ್ಲಿದೆ: ಆಂಡ್ರಾಯ್ಡ್ | ಐಒಎಸ್ | ನಮ್ಮ ಫೇಸ್‌ಬುಕ್ ಪುಟ ಫಾಲೋ ಮಾಡಿ.

ADVERTISEMENT
ADVERTISEMENT
ADVERTISEMENT
ADVERTISEMENT