ಹೊಳೆನರಸೀಪುರ: ಹೊಳೆನರಸೀಪುರ ಕ್ಷೇತ್ರ ವ್ಯಾಪ್ತಿಯಲ್ಲಿ ಒಟ್ಟು 94 ಅತಿಸೂಕ್ಷ್ಮ ಮತಗಟ್ಟೆಗಳು ಇದ್ದು, ಶಾಂತಿಯುತ ಮತದಾನಕ್ಕಾಗಿ ಅಗತ್ಯ ಕ್ರಮವಹಿಸಲಾಗಿದೆ ಎಂದು ಹೆಚ್ಚುವರಿ ಜಿಲ್ಲಾ ಪೊಲೀಸ್‌ ವರಿಷ್ಠಾಧಿಕಾರಿ ಎಂ.ನಾರಾಯಣ ಅವರು ತಿಳಿಸಿದ್ದಾರೆ.
ಶುಕ್ರವಾರ ಸುದ್ದಿಗೋಷ್ಠಿಯಲ್ಲಿ ಅವರು, ‘ಕ್ಷೇತ್ರದಲ್ಲಿ 317 ಮತಗಟ್ಟೆಗಳಿವೆ. ಅತಿಸೂಕ್ಷ್ಮ ಮತಗಟ್ಟೆಗಳಿಗೆ ಪೊಲೀಸ್‌ ಮತ್ತು ಕ್ಷಿಪ್ರಕಾರ್ಯಪಡೆ ಸಿಬ್ಬಂದಿ ನೇಮಿಸಲಾಗಿದೆ’ ಎಂದರು.
‘ಮತದಾನ ಸಂದರ್ಭದಲ್ಲಿ ಅಕ್ರಮ ನಡೆಸಿದರೆ ಹಾಗೂ ಮತದಾನಕ್ಕೆ ಅಡ್ಡಿ ಪಡಿಸುವುದು ಇತ್ಯಾದಿ ಕಂಡುಬಂದರೆ ಯಾವುದೇ ಪಕ್ಷದವರಾಗಿದ್ದರೂ ಕಠಿಣ ಕ್ರಮ ಎದುರಿಸಬೇಕಾಗುತ್ತದೆ’ ಎಂದು ಎಚ್ಚರಿಸಿದರು.
ಹಿಂದಿನ ಚುನಾವಣೆಗಳಲ್ಲಿ ಗಲಾಟೆ ಮಾಡಿದ್ದ 700 ಜನರ ವಿರುದ್ಧ ದೂರುದಾಖಲಿಸಿದ್ದು, ಅವರ ಮೇಲೆ ನಿಗಾ ಇಡಲಾಗಿದೆ. ಅಕ್ರಮದಲ್ಲಿ ಬಾಗಿಯಾದರೆ ಗಡಿಪಾರಿಗೆ ಶಿಫಾರಸು ಮಾಡತ್ತೇವೆ’ ಎಂದರು.
‘100 ಜನ ಸಿಬ್ಬಂದಿಯಿರುವ ಕ್ಷಿಪ್ರಕಾರ್ಯಪಡೆಯ 1 ತುಕಡಿ, 1 ಸಿಆರ್‌ಪಿಎಫ್‌ ತುಕಡಿ, 2 ಕೆಎಸ್‌ಆರ್‌ಪಿ ತುಕಡಿ, 3 ಡಿಎಆರ್‌ ತುಕಡಿ. 140 ಗೃಹರಕ್ಷಕ ಸಿಬ್ಬಂದಿ, 111 ಮಹಿಳಾ ಪೊಲೀಸರು, 66 ಹೆಡ್‌ಕಾನ್‌ಸ್ಟೆಬಲ್‌, 34 ಎಎಸ್‌ಐ, 16 ಪಿಎಸ್‌ಐ, 7 ಸರ್ಕಲ್‌ ಇನ್‌ಸ್ಪೆಕ್ಟರ್‌, 4 ಡಿವೈಎಸ್‌ಪಿ ಅನ್ನು ಭದ್ರತೆಗೆ ನಿಯೋಜಿಸಲಾಗಿದೆ’ ಎಂದು ವಿವರಿಸಿದರು.
ಅಲ್ಲದೆ, ಪ್ರತಿ ತಂಡದಲ್ಲಿ 10 ಪೊಲೀಸರು ಇರುವಂತೆ 20 ಸಂಚಾರಿ ತಂಡಗಳನ್ನು ರಚಿಸಲಾಗಿದೆ ಎಂದು ವಿವರಿಸಿದರು. ಅಹಿತಕರ ಬೆಳವಣಿಗೆ ಕಂಡುಬಂದಲ್ಲಿ ಡಿವೈಎಸ್‌ಪಿ ಅವರ ಮೊಬೈಲ್‌ ಸಂಖ್ಯೆಗೆ 9480804722ಗೆ ಮಾಹಿತಿ ನೀಡಬಹುದು ಎಂದು ಅವರು ವಿವರಿಸಿದರು.
