ನಿತ್ಯ ಯೋಗದಿಂದ ವೀರ್ಯ ಗುಣಮಟ್ಟ ವೃದ್ಧಿ

ಏಮ್ಸ್‌ನ ಶರೀರಶಾಸ್ತ್ರ ವಿಭಾಗದ ತಜ್ಞರು ಈ ಅಧ್ಯಯನ ನಡೆಸಿದ್ದಾರೆ. ಅಧ್ಯಯನ ವರದಿಯು ಅಂತರರಾಷ್ಟ್ರೀಯ ವೈದ್ಯಕೀಯ ನಿಯತಕಾಲಿಕ ‘ನೇಚರ್‌ ರಿವ್ಯೂ ಯುರೋಲಜಿ’ಯಲ್ಲಿ ಪ್ರಕಟವಾಗಿದೆ.

ಮೂತ್ರಶಾಸ್ತ್ರ, ಪ್ರಸೂತಿಶಾಸ್ತ್ರ ಮತ್ತು ಸ್ತ್ರೀರೋಗ ಶಾಸ್ತ್ರ ವಿಭಾಗಗಳ ಸಹಯೋಗದಲ್ಲಿ ಅಧ್ಯಯನ ನಡೆದಿದೆ.

ವೀರ್ಯ ಕಾರ್ಯನಿರ್ವಹಣೆಯ ಲೋಪಕ್ಕೆ ಅದರ ಡಿಎನ್‌ಎಯಲ್ಲಿನ ನ್ಯೂನತೆಯೇ ಕಾರಣ. ಆರೋಗ್ಯಕರ ಮಗು ಜನಿಸಲು ವೀರ್ಯದ ಜನಾಂಗೀಯ ಅಂಶಗಳು ಉತ್ತಮ ಗುಣಮಟ್ಟದ್ದಾಗಿರಬೇಕು ಎಂದು ಏಮ್ಸ್‌ನ ಸಂತಾನೋತ್ಪತ್ತಿ ಮತ್ತು ತಳಿಶಾಸ್ತ್ರ ಪ್ರಯೋಗಾಲಯದ ಮುಖ್ಯಸ್ಥೆ ಡಾ. ರೀಮಾ ದಾದಾ ಹೇಳಿದ್ದಾರೆ.

ವೀರ್ಯದ ಡಿಎನ್‌ಎಗೆ ಹಾನಿಯಾಗಿದ್ದರೆ ಬಂಜೆತನ, ಪದೇ ಪದೇ ಗರ್ಭಪಾತ ಮತ್ತು ವಿಕೃತ ಮಗು ಜನನದಂತಹ ಸಮಸ್ಯೆ ಕಾಣಿಸಿಕೊಳ್ಳುತ್ತದೆ. ಇದರಿಂದಾಗಿಯೇ ತಳಿ ರೂಪಾಂತರವೂ ಉಂಟಾಗುತ್ತದೆ. ವಿವಿಧ ರೀತಿಯ ಆರೋಗ್ಯ ಲೋಪಗಳು ಇದರಿಂದಾಗಿ ಕಾಣಿಸಿಕೊಳ್ಳುತ್ತವೆ ಎಂದು ದಾದಾ ವಿವರಿಸಿದ್ದಾರೆ.

ಉತ್ಕರ್ಷಣದ ಒತ್ತಡದಿಂದಾಗಿ (ಆಕ್ಸಿಡೇಟಿವ್‌ ಸ್ಟ್ರೆಸ್‌) ದೇಹದೊಳಗೆ ಉಂಟಾಗುವ ಅಸಮತೋಲನವು ಡಿಎನ್‌ಎ ಹಾನಿಗೆ ಕಾರಣವಾಗುತ್ತದೆ. ಇಂತಹ ಒತ್ತಡದಿಂದ ಪುರುಷ ಜೀವ ಕಣವು ಹೆಚ್ಚು ಅಪಾಯಕ್ಕೆ ಒಳಗಾಗುತ್ತದೆ.

ಪರಿಸರ ಮಾಲಿನ್ಯ, ಕೀಟನಾಶಕಗಳು, ವಿದ್ಯುತ್‌ ಕಾಂತೀಯ ವಿಕಿರಣ, ಸೋಂಕು, ದೂಮಪಾನ, ಮದ್ಯ ಕುಡಿತ, ಅತಿ ತೂಕ, ಪೌಷ್ಠಿಕಾಂಶವಿಲ್ಲದ ಆಹಾರಗಳಿಂದಾಗಿ ದೇಹವು ಉತ್ಕರ್ಷಣ ಒತ್ತಡಕ್ಕೆ ಒಳಗಾಗುತ್ತದೆ.

ಜೀವನ ಶೈಲಿಯಲ್ಲಿ ಸರಳ ಬದಲಾವಣೆಗಳನ್ನು ಮಾಡುವ ಮೂಲಕ ಈ ಸಮಸ್ಯೆಗಳಿಂದ ಹೊರಗೆ ಬರುವುದಕ್ಕೆ ಸಾಧ್ಯ ಇದೆ. ಜೀವನ ಶೈಲಿಯ ಬದಲಾವಣೆಯು ಡಿಎನ್‌ಎ ಗುಣಮಟ್ಟವನ್ನು ಉತ್ತಮಪಡಿಸುತ್ತದೆ. ಪರಿಣಾಮವಾಗಿ ಗಂಡಸರಲ್ಲಿನ ಫಲವತ್ತತೆ ಕೊರತೆ ನಿವಾರಣೆಯಾಗುತ್ತದೆ.

ನಿಯಮಿತವಾಗಿ ಯೋಗಾಭ್ಯಾಸ ಮಾಡುವುದರಿಂದ ಉತ್ಕರ್ಷಣ ಒತ್ತಡವು ಕಡಿಮೆಯಾಗುತ್ತದೆ. ಡಿಎನ್‌ಎ ಹಾನಿಯನ್ನು ಇದು ತಡೆಯುತ್ತದೆ ಎಂದು ದಾದಾ ತಿಳಿಸಿದ್ದಾರೆ.

ಆರು ತಿಂಗಳು ನಿಯಮಿತವಾಗಿ ಯೋಗಾಭ್ಯಾಸ ಮಾಡಿದ 200 ಪುರುಷರನ್ನು ಅಧ್ಯಯನಕ್ಕೆ ಬಳಸಿಕೊಳ್ಳಲಾಗಿತ್ತು. ಇವರಲ್ಲಿ 21 ದಿನಗಳಲ್ಲಿಯೇ ಉತ್ಕರ್ಷಣ ಒತ್ತಡ ಕಡಿಮೆಯಾಗಿತ್ತು. ಆರು ತಿಂಗಳಲ್ಲಿ ಡಿಎನ್‌ಎ ಗುಣಮಟ್ಟ ಉತ್ತಮಗೊಂಡಿತ್ತು. ಉರಿಯೂತ ಪ್ರಮಾಣ ಕಡಿಮೆಯಾಗಿತ್ತು. ಇದಲ್ಲದೆ, ಖಿನ್ನತೆ, ಒತ್ತಡ ಮತ್ತು ಆತಂಕಗಳೂ ಕಡಿಮೆಯಾಗಿದ್ದವು ಎಂದು ಅವರು ತಿಳಿಸಿದ್ದಾರೆ.

ಯೋಗದಿಂದಾಗಿ ದೇಹದಲ್ಲಿ ಕೆಲವು ರಾಸಾಯನಿಕಗಳು ಹೆಚ್ಚುತ್ತವೆ. ಇವು ವಯಸ್ಸಿನ ಪರಿಣಾಮ ದೇಹದ ಮೇಲಾಗುವುದನ್ನು ತಡೆಯುತ್ತವೆ ಎಂದು ಅವರು ಮಾಹಿತಿ ಕೊಟ್ಟಿದ್ದಾರೆ.

**

ಉತ್ಕರ್ಷಣ ಒತ್ತಡ ಎಂದರೇನು?

ಒಂದು ಅಥವಾ ಹೆಚ್ಚು ಎಲೆಕ್ಟ್ರಾನ್‌ಗಳನ್ನು ಹೊಂದಿರುವ ಆಮ್ಲಜನಕದ ಕಣಗಳು ದೇಹದಲ್ಲಿ ಸೃಷ್ಟಿಯಾಗುತ್ತವೆ. ಈ ಕಣಗಳು ವಿಷಕಾರಕಗಳನ್ನು ಸೃಷ್ಟಿಸುತ್ತವೆ. ಈ ಕಣಗಳ ಸೃಷ್ಟಿ ಮತ್ತು ವಿಷಕಾರಕಗಳನ್ನು ನಾಶ ಮಾಡುವ ದೇಹದ ಸಾಮರ್ಥ್ಯದ ನಡುವಣ ಅಸಮತೋಲನವನ್ನು ಉತ್ಕರ್ಷಣ ಒತ್ತಡ ಎನ್ನಲಾಗುತ್ತದೆ.