ಬಾಕಿ ವೇತನ, ಉದ್ಯೋಗಕ್ಕೆ ಆಗ್ರಹ

ಸಂಘದ ಅಧ್ಯಕ್ಷೆ ಬಿ.ಶಾರದಮ್ಮ ಮಾತನಾಡಿ, ‘ಪಾಲಿಕೆಯ ವಿವಿಧ ವಲಯಗಳ ವಾರ್ಡ್‌ ಕಚೇರಿಗಳಲ್ಲಿ ಕಾರ್ಯನಿರ್ವಹಿಸುತ್ತಿದ್ದ 274 ಡೇಟಾ ಎಂಟ್ರಿ ಆಪರೇಟರ್‌ಗಳನ್ನು (ಡಿಇಒ)2013ರಲ್ಲಿ ಏಕಾಏಕಿ ಕೆಲಸದಿಂದ ಕಿತ್ತು ಹಾಕಲಾಗಿತ್ತು. ಇದನ್ನು ಪ್ರಶ್ನಿಸಿ ನಾವು ಕಾರ್ಮಿಕ ನ್ಯಾಯಾಲಯದ ಮೊರೆ ಹೋದೆವು. ಶೇ 50ರಷ್ಟು ಬಾಕಿ ವೇತನ ಹಾಗೂ ಕೆಲಸಕ್ಕೆ ಮರುನೇಮಕ ಮಾಡಿಕೊಳ್ಳುವಂತೆ 2017ರಲ್ಲಿ ನ್ಯಾಯಾಲಯವು ತೀರ್ಪು ನೀಡಿದೆ. ಆದರೆ, ಇಲ್ಲಿಯವರೆಗೆ ಪಾಲಿಕೆ ಇದರ ಬಗ್ಗೆ ಯಾವುದೇ ಕ್ರಮ ಕೈಗೊಂಡಿಲ್ಲ’ ಎಂದು ತಿಳಿಸಿದರು.

‘ಪಾಲಿಕೆಗೆ ಈ ಬಗ್ಗೆ ಹಲವು ಬಾರಿ ಮನವಿ ಮಾಡಿದ್ದೇವೆ. ಆದರೂ ಯಾವುದೇ ಪರಿಹಾರ ನೀಡದೇ ಮೌನವಾಗಿದೆ. ಕೆಲಸ ಕಳೆದುಕೊಂಡವರ ಕುಟುಂಬಗಳು ಸಂಕಷ್ಟದಲ್ಲಿವೆ. ಕೂಡಲೇ ಬಾಕಿ ವೇತನ ನೀಡಿ ಕೆಲಸಕ್ಕೆ ಮರುನೇಮಕಾತಿ ಮಾಡಿಕೊಳ್ಳಬೇಕು’ ಎಂದು ಆಗ್ರಹಿಸಿದರು.