ಕಡುಬಡತನದಲ್ಲಿ ಬೆಳೆದ ಈತನಿಗೆ ತಂದೆ ಇಲ್ಲ. ತಾಯಿ ಗೀತಮ್ಮ ಕೂಲಿ ಕೆಲಸ ಮಾಡುತ್ತಾರೆ. ಸೋದರ ಭರಮಪ್ಪ ಈ ಸಲ 10ನೇ ತರಗತಿ ಓದುತ್ತಿದ್ದು ಇಬ್ಬರ ಓದಿನ ವೆಚ್ಚ, ಮನೆ ಖರ್ಚು ಎಲ್ಲವೂ ತಾಯಿಯ ಹೆಗಲಿಗೇ ಬೀಳುತ್ತದೆ. ಹೀಗಾಗಿ, ಬೇರೆಯವರ ಜಮೀನಿನಲ್ಲಿ ಅವರದು ನಿತ್ಯ ದಣಿವರಿಯದ ದುಡಿಮೆ. ತಾಯಿಯ ಈ ಶ್ರಮವನ್ನು ಸ್ವಲ್ಪವಾದರೂ ಕಡಿಮೆ ಮಾಡಬೇಕೆಂದುಕೊಂಡ ಸಿದ್ದಪ್ಪ, ರಜಾ ದಿನಗಳಲ್ಲಿ ತಾನೂ ಕೂಲಿ ಮಾಡುತ್ತಿದ್ದ. ಹೀಗೆ ಸಂಪಾದಿಸಿದ ಹಣದಿಂದಲೇ ಕಾಲೇಜಿನ ಶುಲ್ಕ ಭರಿಸಿದ ಮತ್ತು ಕಷ್ಟಪಟ್ಟು ಓದಿದ ಎನ್ನುತ್ತಾರೆ ಆತನ ಚಿಕ್ಕಪ್ಪ ರೇವಣೆಪ್ಪ.