ಸದಾಶಿವ ಆಯೋಗದ ವರದಿ ಜಾರಿಗೆ ವಿರೋಧ

7

ಸದಾಶಿವ ಆಯೋಗದ ವರದಿ ಜಾರಿಗೆ ವಿರೋಧ

Published:
Updated:

ಬೆಂಗಳೂರು: ಒಳಮೀಸಲಾತಿಗಾಗಿ ನ್ಯಾಯಮೂರ್ತಿ ಸದಾಶಿವ ಆಯೋಗದ ವರದಿ ಜಾರಿ ಮಾಡಬೇಕು ಎಂದು ಮಾದಿಗರ ಸಮುದಾಯ ಒತ್ತಾಯಿಸುತ್ತಿರುವ ಬೆನ್ನಲ್ಲೇ, ಈ ಬೇಡಿಕೆ ವಿರುದ್ಧ ಬೃಹತ್‌ ಪ್ರತಿಭಟನೆ ನಡೆಸಲು ಕರ್ನಾಟಕ ಮೀಸಲಾತಿ ಸಂರಕ್ಷಣಾ ಒಕ್ಕೂಟ ಮುಂದಾಗಿದೆ.

ಒಕ್ಕೂಟವು ನಗರದಲ್ಲಿ ಶುಕ್ರವಾರ ಆಯೋಜಿಸಿದ್ದ ‘ಪರಿಶಿಷ್ಟರ ಪ್ರತಿರೋಧ ಸಭೆ’ಯಲ್ಲಿ ಕಾರ್ಯತಂತ್ರದ ಕುರಿತು ಸಮುದಾಯದ ಮುಖಂಡರು ಚರ್ಚಿಸಿದರು.

‘ವರದಿಯನ್ನು ಬಹಿರಂಗಗೊಳಿಸಲು ಸರ್ಕಾರದ ಮೇಲೆ ಒತ್ತಾಯ ತರೋಣ. ಇದೇ ತಿಂಗಳ 15ರಂದು ಎಲ್ಲ ಜಿಲ್ಲಾಧಿಕಾರಿಗಳ ಕಚೇರಿಗಳ ಮುಂದೆ ಧರಣಿ ಸತ್ಯಾಗ್ರಹ ನಡೆಸೋಣ. ಮಾದಿಗರ ಮಹಾಯುದ್ಧ ಸಮಾವೇಶಕ್ಕೆ ಪ್ರತಿಯಾಗಿ ನವೆಂಬರ್‌ ಮೊದಲ ವಾರದಲ್ಲಿ ಶಾಂತಿ ಮತ್ತು ಸೌಹಾರ್ದ ಸಮಾವೇಶ ಹಮ್ಮಿಕೊಳ್ಳೋಣ’ ಎಂದು ಒಕ್ಕೂಟದ ಅಧ್ಯಕ್ಷ ರಾಘವೇಂದ್ರ ನಾಯಕ್‌ ಹೇಳಿದರು.

ಕಾಂಗ್ರೆಸ್ ಮುಖಂಡ ಪಿ.ಎಂ. ನರೇಂದ್ರ ಸ್ವಾಮಿ, ‘ವರದಿಯ ಬಗ್ಗೆ ಎ, ಬಿ, ಸಿ, ಡಿ ಗೊತ್ತಿಲ್ಲದ ಮಾದಿಗರ ಸಣ್ಣ ಮುಖಂಡರು, ದೊಡ್ಡ ನಾಯಕರಾಗಲು ವರದಿಯ ಅನುಷ್ಠಾನಕ್ಕಾಗಿ ಸಮಾವೇಶಗಳನ್ನು ನಡೆಸುತ್ತಿದ್ದಾರೆ. ಮುಗ್ಧ ಮಾದಿ
ಗರನ್ನು ಇತರೆ ಪರಿಶಿಷ್ಟರ ವಿರುದ್ಧ ಎತ್ತಿ ಕಟ್ಟುತ್ತಿದ್ದಾರೆ. ರಾಜಕೀಯ ಪ್ರಾತಿನಿಧ್ಯ, ಅಲ್ಪಸಂಖ್ಯಾತರಲ್ಲಿ ಒಳಮೀಸಲಾತಿ ಇಲ್ಲ. ಪರಿಶಿಷ್ಟರಲ್ಲಿ ಅದನ್ನು ಯಾಕೆ ತರುತ್ತಿದ್ದಾರೆ’ ಎಂದು ಪ್ರಶ್ನಿಸಿದರು.

‘ಕ್ಷೇತ್ರಕಾರ್ಯ, ಮನೆ–ಮನೆ ಸಮೀಕ್ಷೆ ಮಾಡಿ ವರದಿ ಸಿದ್ಧಪಡಿಸಿಲ್ಲ. ಇದರಿಂದಾಗಿ ಅದು ಅವೈಜ್ಞಾನಿಕ, ಅಸಂವಿಧಾನಿಕವಾಗಿದೆ’ ಎಂದು ದೂರಿದರು.

ಒಕ್ಕೂಟದ ಉಪಾಧ್ಯಕ್ಷ ಸುಭಾಷ್‌ ರಾಥೋಡ್‌, ‘ಭೋವಿ, ಛಲವಾದಿ, ಲಂಬಾಣಿ, ಕೊರಚ, ಕೊರಮ ಸಮುದಾಯದಲ್ಲಿ ಹೆಚ್ಚು ಅನಕ್ಷರತೆ, ನಿರುದ್ಯೋಗ, ಆರ್ಥಿಕ ಸಂಕಷ್ಟ, ಮೂಲಸೌಕರ್ಯಗಳ ಕೊರತೆ ಇದೆ. ರಾಜ್ಯದಲ್ಲಿ ಈ ಸಮುದಾಯದವರು ಸುಮಾರು 82 ಲಕ್ಷ ಜನರಿದ್ದರೂ, ರಾಜಕೀಯ ಒತ್ತಡ ನಿರ್ಮಾಣ ಆಗುತ್ತಿಲ್ಲ’ ಎಂದು ಬೇಸರಿಸಿದರು.

ವಕೀಲ ಅನಂತ್ ನಾಯಕ್‌, ‘ಪರಿಶಿಷ್ಟ ಸಮುದಾಯ ಪರಸ್ಪರ ಕಚ್ಚಾಡುವಂತೆ ಮಾಡಲೆಂದೇ ವರದಿಯನ್ನು ಬಹಿರಂಗಪಡಿಸು
ತ್ತಿಲ್ಲ. ವರದಿಯನ್ನು ಕಾನೂನು ತಜ್ಞರ ವಲಯದಲ್ಲಿ, ವಿಧಾನ ಮಂಡಲದ ಕಲಾಪದಲ್ಲಿ ಚರ್ಚಿಸಲು ಸರ್ಕಾರವನ್ನು ಒತ್ತಾಯಿಸೋಣ’ ಎಂದರು.

ಬರಹ ಇಷ್ಟವಾಯಿತೆ?

  • 0

    Happy
  • 0

    Amused
  • 0

    Sad
  • 0

    Frustrated
  • 0

    Angry

Comments:

0 comments

Write the first review for this !