ನೀರು ನೀಡುವ ‘ಸೋಷಿಯಲ್ ಕ್ಲಬ್‌’

ಪಟ್ಟಣದಲ್ಲಿನ 11 ನಿವೃತ್ತ ನೌಕರರು ಸೇರಿಕೊಂಡು 2000ನೇ ಇಸವಿಯಲ್ಲಿ ಕ್ಲಬ್ ಸ್ಥಾಪಿಸಿದ್ದಾರೆ. 2007ರಿಂದಲೂ ಕೊಳವೆಬಾವಿಯಿಂದ ಸ್ಥಳೀಯರಿಗೆ ಉಚಿತವಾಗಿ ನೀರು ನೀಡುತ್ತಿದ್ದಾರೆ.

‘ಬೇಸಿಗೆಯಲ್ಲಿ ಪಟ್ಟಣದಲ್ಲಿ ನೀರಿನ ಸಮಸ್ಯೆ ತೀವ್ರಗೊಳ್ಳುತ್ತಿತ್ತು. ಜನತೆ ಕುಡಿಯುವ ನೀರಿಗಾಗಿ ಪರದಾಡುತ್ತಿದ್ದರು.‌ ನಾವೆಲ್ಲ ಸೇರಿ ಕೊಳವೆಬಾವಿಯ ನೀರನ್ನು ಸಾರ್ವಜನಿಕರಿಗಾಗಿ ಹಂಚಲು ನಿರ್ಧರಿಸಿದೆವು’ ಎಂದು ಕ್ಲಬ್‌ ಅಧ್ಯಕ್ಷ ವೀರಣ್ಣ ಬಡ್ಡಿ ತಿಳಿಸಿದರು.

‘12 ವರ್ಷಗಳಿಂದಲೂ ವಿದ್ಯುತ್ ಹಾಗೂ ದುರಸ್ತಿ ವೆಚ್ಚವನ್ನು ನಾವೇ ಭರಿಸುತ್ತಿದ್ದೇವೆ. ಯಾರೇ ಬಂದರೂ ಪ್ರತಿನಿತ್ಯವೂ ಬೆಳಿಗ್ಗೆ ಮತ್ತು ಸಂಜೆ ನೀರು ನೀಡುತ್ತಿದ್ದೇವೆ’ ಎಂದು ಹಿರಿಯ ಸದಸ್ಯ ಕಾಳಿಂಗಪ್ಪ ಮಲ್ಲಪ್ಪ ಕೋನಪ್ಪನವರ ಹೇಳಿದರು.

‘ಈ ಹಿಂದೆ ಬೇಸಿಗೆಯಲ್ಲಿ ನಾವೆಲ್ಲ ಕೊಡಪಾನ ನೀರಿಗಾಗಿ ದೂರದ ಕೆರೆ, ಬಾವಿ ಹಾಗೂ ಹೊಂಡಗಳಿಗೆ ಹೋಗಬೇಕಾಗಿತ್ತು. ಕ್ಲಬ್‌ ಸದಸ್ಯರ ನೆರವಿನಿಂದಾಗಿ ನಮ್ಮ ಸಮಸ್ಯೆ ನೀಗಿದೆ’ ಎಂದು ಇಲ್ಲಿನ ನಿವಾಸಿ ಬಸಮ್ಮ ಮತ್ತಿತರರು ಕೃತಜ್ಞತೆ ವ್ಯಕ್ತಪಡಿಸಿದರು.