ಹ್ಯೂಸ್ಟನ್: ಅಮೆರಿಕದ ಹ್ಯೂಸ್ಟನ್ ನಗರದಲ್ಲಿ ಇದ್ದ ಚೀನಾದ ಕಾನ್ಸುಲೆಟ್ ಕಚೇರಿಯನ್ನು ಸುಮಾರು ನಾಲ್ಕು ದಶಕಗಳ ಬಳಿಕ ಶುಕ್ರವಾರ ಅಧಿಕೃತವಾಗಿ ಬಂದ್ ಮಾಡಲಾಯಿತು.
ಕೋವಿಡ್-19 ಪಿಡುಗನ್ನು ಚೀನಾ ನಿರ್ವಹಣೆ ಮಾಡಿದ ಕ್ರಮ ಹಾಗೂ ಹಾಂಗ್ ಕಾಂಗ್ ಮೇಲೆ ನಿಯಂತ್ರಣ ಸಾಧಿಸಲು ಚೀನಾ ರೂಪಿಸಿದ ಕಾಯ್ದೆಯ ಬಳಿಕ ಚೀನಾ ಮತ್ತು ಅಮೆರಿಕ ನಡುವಣ ಮನಸ್ತಾಪ ದಿನೇ ದಿನೇ ಹೆಚ್ಚುತ್ತಿದೆ.
ಮಾಧ್ಯಮ ವರದಿಗಳ ಪ್ರಕಾರ, ಹ್ಯೂಸ್ಟನ್ನಲ್ಲಿ ಇರುವ ಕಾನ್ಸುಲೇಟ್ ಕಚೇರಿಯನ್ನು 72 ಗಂಟೆಗಳಲ್ಲಿ ಮುಚ್ಚಲು ಚೀನಾಗೆ ಅಮೆರಿಕ ಸೂಚಿಸಿತ್ತು. ಬೌದ್ಧಿಕ ಆಸ್ತಿ ಹಕ್ಕು ಕಳುವಿಗೆ ಸಂಬಂಧಿತ ಗೂಢಾಚಾರಿಕೆಗೆ ಈ ಕಚೇರಿ ಕೇಂದ್ರಸ್ಥಾನವಾಗಿದೆ ಎಂದು ವಿದೇಶಾಂಗ ಕಾರ್ಯದರ್ಶಿ ಮೈಕ್ ಪಾಂಪಿಯೊ ಅವರು ದೂರಿದ್ದರು.