ವಿಶ್ವಸಂಸ್ಥೆ: ಪಾಕಿಸ್ತಾನ ಮೂಲದವವರು ಮುಖ್ಯಸ್ಥರಾಗಿ ಕಾರ್ಯ ನಿರ್ವಹಿಸುತ್ತಿರುವ ಹಲವಾರು ಉಗ್ರ ಸಂಘಟನೆಗಳು ಈಗಲೂ ಸಕ್ರಿಯವಾಗಿವೆ. ಈ ಸಂಘಟನೆಗಳನ್ನು ಇದುವರೆಗೆ ಕಪ್ಪುಪಟ್ಟಿಗೆ ಸೇರಿಸಿಲ್ಲ ಎಂದು ವಿಶ್ವಸಂಸ್ಥೆಯ ವರದಿಯಲ್ಲಿ ಹೇಳಲಾಗಿದೆ.
ಭಾರತದಲ್ಲಿ ಸಕ್ರಿಯವಾಗಿರುವ ಅಲ್‌ಖೈದಾ ಗುಂಪು, ಇರಾಕ್‌ ಮತ್ತು ಲೆವಂಟ್‌–ಖೋರಾಸನ್‌ನಲ್ಲಿನ ಇಸ್ಲಾಮಿಕ್‌ ಸ್ಟೇಟ್‌ (ಐಎಸ್ಐಎಲ್–ಕೆ), ತೆಹ್ರೀಕ್‌–ಎ–ತಾಲಿಬಾನ್‌ (ಪಾಕಿಸ್ತಾನ– ಟಿಟಿಪಿ) ಸೇರಿದಂತೆ ಹಲವಾರು ಸಂಘಟನೆಗಳನ್ನು ಪಾಕಿಸ್ತಾನ ಮೂಲದವರೇ ಮುನ್ನಡೆಸುತ್ತಿದ್ದಾರೆ ಎಂದು ವರದಿಯಲ್ಲಿ ವಿವರಿಸಲಾಗಿದೆ.
ಅಫ್ಗಾನಿಸ್ತಾನದ ವಿಶೇಷ ಭದ್ರತಾಪಡೆಗಳು ಕಳೆದ ಏಪ್ರಿಲ್‌ನಲ್ಲಿ ದೇಶದಾದ್ಯಂತ ಕಾರ್ಯಾಚರಣೆ ನಡೆಸಿದ್ದವು. ಐಎಸ್ಐಎಲ್–ಕೆ ಸಂಘಟನೆಯ ಮುಖ್ಯಸ್ಥ ಅಸ್ಲಾಂ ಫಾರೂಕಿ (ಅಬ್ದುಲ್ಲಾ ಒರೋಕ್‌ಝೈ ಎಂದೂ ಹೆಸರು) ಮತ್ತು ಆತನ ಉತ್ತರಾಧಿಕಾರಿ ಜಿಯಾ ಉಲ್‌–ಹಕ್‌ನನ್ನು ಈ ಸಂದರ್ಭದಲ್ಲಿ ಬಂಧಿಸಿದ್ದವು.
ಫಾರೂಕಿಯ ಮೂಲ ಪಾಕಿಸ್ತಾನದ ಖೈಬರ್‌ ಪಖ್ತುಂಖ್ವಾ ಪ್ರಾಂತ್ಯ. ಕಳೆದ ಮಾರ್ಚ್‌ನಲ್ಲಿ ಕಾಬೂಲ್‌ನ ಗುರುದ್ವಾರದಲ್ಲಿ ನಡೆದ ಭಯೋತ್ಪಾದಕ ದಾಳಿಯ ಸೂತ್ರಧಾರಿ ಈತ. ಈ ದಾಳಿಯಲ್ಲಿ 25ಕ್ಕೂ ಹೆಚ್ಚು ಜನ ಸಿಖ್ಖರು ಮೃತಪಟ್ಟಿದ್ದರು. ಈತನ ಉತ್ತರಾಧಿಕಾರಿ ಹಕ್‌ ಸಹ ಪಾಕಿಸ್ತಾನದ ನಾಗರಿಕ. ಈ ಇಬ್ಬರನ್ನು ಕಪ್ಪುಪಟ್ಟಿಗೆ ಸೇರಿಸಿಲ್ಲ ಎಂದು ವಿಶ್ವಸಂಸ್ಥೆಯ ವರದಿ ಹೇಳಿದೆ.
