ಲಾಸ್ ಏಂಜಲೀಸ್:ಈಗ ಬಳಕೆಯಲ್ಲಿರುವ ಪೈಕಿ 21 ಔಷಧಗಳು, ಸೋಂಕಿತರ ದೇಹದಲ್ಲಿ ಕೊರೊನಾ ವೈರಸ್ ಸಂಖ್ಯೆ ಹೆಚ್ಚಳವಾಗುವುದನ್ನು ತಡೆಗಟ್ಟಬಲ್ಲವು ಎಂದು ವಿಜ್ಞಾನಿಗಳು ಹೇಳಿದ್ದಾರೆ.
ಕೊರೊನಾ ಸೋಂಕಿನ ಚಿಕಿತ್ಸೆಗೆ ಸದ್ಯ ಬಳಸುತ್ತಿರುವ ರೆಮ್ಡೆಸಿವಿರ್ನೊಂದಿಗೆ, ಈ 21ರ ಪೈಕಿ ಯಾವುದಾದರೂ ನಾಲ್ಕು ಔಷಧಗಳನ್ನು ನೀಡುವುದರಿಂದ ಉತ್ತಮ ಫಲಿತಾಂಶ ನಿರೀಕ್ಷಿಸಬಹುದು ಎಂದು ವಿಜ್ಞಾನಿಗಳು ಹೇಳಿದ್ದಾರೆ.
ಕೋವಿಡ್–19 ವಿರುದ್ಧ ಪರಿಣಾಮಕಾರಿ ಔಷಧ ಕಂಡು ಹಿಡಿಯಲು ಈ ಅಧ್ಯಯನ ನೆರವಾಗಲಿದೆ ಎಂದು ವಿಶ್ವದ ವೈದ್ಯಕೀಯ ಸಮುದಾಯ ಆಶಾಭಾವ ವ್ಯಕ್ತಪಡಿಸಿದೆ.
ಭಾರತ ಮೂಲದವರು ಸೇರಿದಂತೆ ಹಲವು ವಿಜ್ಞಾನಿಗಳು ಈ ಸಂಬಂಧ ಸಂಶೋಧನೆ ಕೈಗೊಂಡಿದ್ದಾರೆ. ಅಮೆರಿಕದ ಸ್ಯಾನ್ಫೋರ್ಡ್ ಬರ್ನ್ಹಾಮ್ ಪ್ರಿಬಿಸ್ ಮೆಡಿಕಲ್ ಡಿಸ್ಕವರಿ ಇನ್ಟಿಟ್ಯೂಟ್ನ ಸಂಶೋಧಕರು ನಡೆಸಿರುವ ಅಧ್ಯಯನದ ವಿವರಗಳು ‘ನೇಚರ್’ ನಿಯತಕಾಲಿಕದಲ್ಲಿ ಪ್ರಕಟವಾಗಿವೆ.
‘ರೋಗಿಗಳು ಗುಣಮುಖರಾಗಲು ಬೇಕಾಗುವ ಅವಧಿಯನ್ನುರೆಮ್ಡೆಸಿವಿರ್ ಕಡಿಮೆ ಮಾಡಲಿದೆ ಎಂಬುದು ಸಿದ್ಧವಾಗಿದೆ. ಆದರೆ, ಈ ಔಷಧ ಎಲ್ಲರಿಗೂ ಪರಿಣಾಮಕಾರಿ ಎನಿಸಿಲ್ಲ’ ಎಂದು ಇನ್ಟಿಟ್ಯೂಟ್ನ ಇಮ್ಯುನಿಟಿ ಆ್ಯಂಡ್ ಪ್ಯಾಥೋಜಿನೆಸಿಸ್ ಕಾರ್ಯಕ್ರಮದ ನಿರ್ದೇಶಕ ಸುಮಿತ್ ಚಂದಾ ಹೇಳುತ್ತಾರೆ.
‘ಕೈಗೆಟಕುವ ದರದಲ್ಲಿ ಸಿಗುವ, ಪರಿಣಾಮಕಾರಿಯಾದ ಮತ್ತು ಕೂಡಲೇ ಲಭ್ಯ ಇರುವಂತಹ ಔಷಧ ಈಗಿನ ತುರ್ತು’ ಎಂದೂ ಅವರು ಹೇಳುತ್ತಾರೆ.
ಈ 21 ಔಷಧಗಳ ಪೈಕಿ ‘ಆಸ್ಟೆಮಿಜೋಲ್’ (ಅಲರ್ಜಿ ಇದ್ದಾಗ ಬಳಸುವ ಔಷಧ) ಹಾಗೂ ‘ಕ್ಲೋಫಾಜಮೈನ್’ (ಕುಷ್ಠರೋಗ ಚಿಕಿತ್ಸೆಯಲ್ಲಿ ಬಳಕೆ) ಅನ್ನು ರೆಮ್ಡೆಸಿವಿರ್ ಜೊತೆ ತುರ್ತು ಸಂದರ್ಭದಲ್ಲಿ ಕೋವಿಡ್ ರೋಗಿಗಳಿಗೆ ನೀಡಲು ಅಮೆರಿಕದ ಎಫ್ಡಿಎ ಈಗಾಗಲೇ ಅನುಮೋದನೆ ನೀಡಿದೆ.