Aditya L1 Launch: 14.85 ಕೋಟಿ ಕಿ.ಮೀ. ದೂರದಿಂದಲೇ ಸೂರ್ಯದರ್ಶನ !

ಆದಿತ್ಯ ಎಲ್‌1 ಅನ್ನು ಲ್ಯಾಗ್ರಾಂಜ್ ಬಿಂದುವಿನಲ್ಲಿಡುತ್ತಿರುವುದೇಕೆ?

ಬೃಹತ್‌ ವಸ್ತುವಿನ ಗುರುತ್ವಾಕ್ಷಣ ಶಕ್ತಿಯನ್ನೇ ಬಳಸಿಕೊಂಡು ಬಾಹ್ಯಾಕಾಶ ನೌಕೆಯು ಸಂಚರಿಸಲಿದೆ. ಇದರಿಂದ ಇಂಧನವನ್ನು ಉಳಿಸಲು ಹೆಚ್ಚು ಅನುಕೂಲವಾಗಲಿದೆ. ಜತೆಗೆ ನಿರ್ದಿಷ್ಟ ಸ್ಥಳದಲ್ಲಿರುವಂತೆ ಮಾಡುವಲ್ಲೂ ಸಾಧ್ಯವಾಗಲಿದೆ. ಹೀಗಾಗಿ ಆದಿತ್ಯ–ಎಲ್‌1 ಅನ್ನು ಎಲ್‌1 ಸುತ್ತಲಿನ ನಿರ್ವಾತ ಕಕ್ಷೆಯಲ್ಲಿ ಇರಿಸಲಾಗುತ್ತದೆ. ಇದರಿಂದ ಯೋಜನೆಯುದ್ದಕ್ಕೂ ಸೂರ್ಯನನ್ನು ಯಾವುದೇ ಅಡೆತಡೆ ಇಲ್ಲದೆ ವೀಕ್ಷಿಸಬಹುದು. ಏಕೆಂದರೆ ಯಾವುದೇ ಗ್ರಹಣ ಅಥವಾ ನಿಗೂಢತೆಗಳು ಸಂಭವಿಸುವುದಿಲ್ಲ.

ಗ್ರಹಗಳ ಬೆಳಕು ಇನ್ನಿತರ ಬಾಹ್ಯಾಕಾಶ ವಸ್ತುವಿನಿಂದ ಸಂಪೂರ್ಣ ಅಡಚಣೆಗೆ ಒಳಗಾಗುತ್ತದೆ. ಸೂರ್ಯಗ್ರಹಣದಲ್ಲಿ, ಚಂದ್ರನು ಸೂರ್ಯ ಮತ್ತು ಭೂಮಿಯ ನಡುವೆ ಬರುತ್ತಾನೆ. ಹಾಗೆಯೇ ಚಂದ್ರಗ್ರಹಣ ಸಂದರ್ಭದಲ್ಲಿ ಭೂಮಿಯು ಸೂರ್ಯ ಮತ್ತು ಚಂದ್ರನ ನಡುವೆ ಬರುತ್ತದೆ. ಹೀಗಾಗಿ ಎಲ್ಲಾ ಸಂಪೂರ್ಣ ಗ್ರಹಣಗಳು ಒಂದು ವಸ್ತುವನ್ನು ಮರೆಮಾಚುವಿಕೆಯೇ ಆದರೆ, ಎಲ್ಲಾ ಮರೆಮಾಚುವಿಕೆಗಳೂ ಗ್ರಹಣಗಳಲ್ಲ ಎಂಬುದನ್ನು ಖಗೋಳ ವಿಜ್ಞಾನಿಗಳು ಹೇಳುತ್ತಾರೆ.

ಲ್ಯಾಗ್ರಾಂಜ್ ಬಿಂದುವು ಗ್ರಹಣಗಳು ಅಥವಾ ನಿಗೂಢತೆಗಳನ್ನು ಹೊಂದಿರದ ಕಾರಣ, ಆದಿತ್ಯ ಎಲ್‌1 ಯಾವುದೇ ಅಡೆತಡೆಗಳಿಲ್ಲದೆ ಐದು ವರ್ಷಗಳ ಕಾಲ ನಿರಂತರವಾಗಿ ವೈಜ್ಞಾನಿಕ ಪ್ರಯೋಗಗಳನ್ನು ನಡೆಸುವ ಸಾಮರ್ಥ್ಯ ಹೊಂದಿದೆ.

ಉಪಗ್ರಹವನ್ನು 15 ಲಕ್ಷ ಕಿ.ಮೀ. ದೂರದಲ್ಲಿಡುವ ಮಹತ್ವವೇನು?

ಸೂರ್ಯ ಮತ್ತು ಭೂಮಿಯ ನಡುವಿನ ಅಂತರವು ಸುಮಾರು 15 ಕೋಟಿ ಕಿಲೋ ಮೀಟರ್ ಅಂತರವಿದೆ. ಹಾಗೆಯೇ ಆದಿತ್ಯ –ಎಲ್‌1 ಸೇರುವ ಕಕ್ಷೆಗೂ ಮತ್ತು ಭೂಮಿ ನಡುವಿನ ಅಂತರ 15 ಲಕ್ಷ ಕಿ.ಮೀ.ರಷ್ಟಿದೆ. ಈ ಲ್ಯಾಗ್ರಾಂಜ್ ಬಿಂದುವನ್ನು ಆಯ್ಕೆ ಮಾಡಿರುವ ಇಸ್ರೊ, ಆ ಮೂಲಕ ಸೂರ್ಯನ ನಿರಂತರ ವೀಕ್ಷಣೆಗೆ ಅನುಕೂಲವಾಗುವಂತೆ ಯೋಜನೆ ರೂಪಿಸಿದೆ. ಆದಿತ್ಯ–ಎಲ್1 ಇರುವ ಕಕ್ಷೆಯಿಂದ ಸೂರ್ಯ ನಡುವಿನ ಅಂತರ 14.85 ಕೋಟಿ ಕಿ.ಮೀ.ಯಾಗಿದೆ.

ಎಲ್‌1 ನ ಎರಡನೇ ಪ್ರಯೋಜನವೇನೆಂದರೆ ಅದು ಭೂಮಿ ಮತ್ತು ಸೂರ್ಯನ ನಡುವಿನ ವಿಶಿಷ್ಟವಾದ ಗುರುತ್ವಾಕರ್ಷಣೆಯ ಸಮತೋಲನವನ್ನು ನೀಡುತ್ತದೆ. ಭೂಮಿ ಹಾಗೂ ಸೂರ್ಯನ ಗುರುತ್ವಾಕ್ಷಣೆಯ ಬಲಗಳು ಪರಸ್ಪರ ಶೂನ್ಯವಾಗುವ ಕೇಂದ್ರವಿದು. ಆದಿತ್ಯ–ಎಲ್‌1 ಕಡಿಮೆ ಖರ್ಚಿನಲ್ಲಿ ಸಿದ್ಧಗೊಂಡಿದ್ದರಿಂದ ಗುರುತ್ವಾಕರ್ಷಣ ಬಲದಿಂದಲೇ ಸ್ಥಿರ ಸ್ಥಾನವನ್ನು ಕಾಪಾಡಿಕೊಳ್ಳಲು ಈ ಬಿಂದು ನೆರವಾಗಲಿದೆ ಎಂದು ವಿಜ್ಞಾನಿಗಳು ಹೇಳಿದ್ದಾರೆ.

ಸೂರ್ಯನಿಂದ ಆದಿತ್ಯ–ಎಲ್‌1 ಅಂತರವು ಬಾಹ್ಯಾಕಾಶ ನೌಕೆ ಮತ್ತು ಭೂಮಿ ನಡುವಿನ ಅಂತರಕ್ಕೆ ಹೋಲಿಸಿದರೆ ಸಾಕಷ್ಟು ದೂರದಲ್ಲಿದೆ. ಇದರ ಹೊರತಾಗಿಯೂ ಆದಿತ್ಯ-ಎಲ್‌1 ನ ಸುಧಾರಿತ ಉಪಕರಣಗಳು ಸೂರ್ಯನಿಂದ ಹೊರಸೂಸುವ ವಿಕಿರಣಗಳು, ನೇರಳಾತೀತ ಮತ್ತು ಕ್ಷ–ಕಿರಣ ತರಂಗಾಂತರಗಳಲ್ಲಿನ ವಿಕಿರಣಗಳನ್ನು ಅಧ್ಯಯನ ನಡೆಸುವ ಉಪಕರಣಗಳನ್ನು ಹೊಂದಿದೆ. ಸೂರ್ಯನ ವಾತಾವರಣದ ವಿವಿಧ ಪದರಗಳು ಮತ್ತು ಅವುಗಳಲ್ಲಿನ ಸಂಕೀರ್ಣ ಪ್ರಕ್ರಿಯೆಗಳ ಒಳನೋಟಗಳ ಮಾಹಿತಿ ಪಡೆಯಲು ಅನುವು ಮಾಡಿಕೊಡುತ್ತದೆ.

ಸೂರ್ಯನಿಂದ ಹೊರಸೂಸಲ್ಪಟ್ಟ ಹೆಚ್ಚಿನ ಶಕ್ತಿಯ ಕಣಗಳಲ್ಲಿ ಪ್ರೊಟಾನ್‌ ಮತ್ತು ಎಲೆಕ್ಟ್ರಾನ್‌ಗಳು ಇವೆ. ಇವುಗಳೇ ಸೂರ್ಯನ ಅಧ್ಯಯನಕ್ಕೆ ಅಗತ್ಯವಿರುವ ಮಾಹಿತಿ ನೀಡಲಿವೆ. ಇದರಿಂದ ಸೃಷ್ಟಿಯ ರಹಸ್ಯ ಅರಿಯುವ ಮಾಹಿತಿಯ ಜತೆಗೆ ಹವಾಮಾನ ಬದಲಾವಣೆ ಕುರಿತ ಮಾಹಿತಿಯನ್ನೂ ತಿಳಿಯಲೂ ಸಾಧ್ಯವಿದೆ ಎಂದೆನ್ನಲಾಗಿದೆ.

ನೌಕೆಯು ಏನೇನನ್ನು ಹೊತ್ತೊಯ್ಯಲಿದೆ?

ಆದಿತ್ಯ–ಎಲ್‌1 ಒಟ್ಟು ಏಳು ಪೇಲೋಡ್‌ಗಳನ್ನು ಹೊತ್ತು ಸಾಗಲಿದೆ. ಇದರಲ್ಲಿ ಎರಡು ಬಗೆ ಇವೆ. ದೂರಸಂವೇದಿಯ ನಾಲ್ಕು ಉಪಕರಣಗಳು ಹಾಗೂ ಉಳಿದವು ಇನ್‌–ಸಿಟು ಪೇಲೋಡ್‌ ಆಗಿವೆ.

ದೂರಸಂವೇದಿ ಸಾಧನಗಳಲ್ಲಿ ವಿಸಿಬಲ್ ಎಮಿಷನ್ ಲೈನ್ ಕೊರೊನೊಗ್ರಫಿ, ಸೂರ್ಯನ ಅತಿನೇರಳೆ ಕಿರಣಗಳ ವಿಶ್ಲೇಷಿಸುವ ದೂರದರ್ಶಕ, ಕಡಿಮೆ ಸಾಮರ್ಥ್ಯದ ಕ್ಷ–ಕಿರಣ ಸ್ಪೆಕ್ಟ್ರೋಮೀಟರ್‌, ಹೆಚ್ಚಿನ ಸಾಮರ್ಥ್ಯದ ಕ್ಷ–ಕಿರಣ ಸಾಧನಗಳು ಇರಲಿವೆ. ಇನ್‌–ಸೈಟು ಪೇಲೋಡ್ಸ್‌ನಲ್ಲಿ ಸೂರ್ಯನ ವಲಯದ ಗಾಳಿಯ ಕಣಗಳನ್ನು ಪ್ರಯೋಗಕ್ಕೆ ಒಳಪಡಿಸುವ ಸಾಧನ, ಪ್ಲಾಸ್ಮಾ ವಿಶ್ಲೇಷಕ ಹಾಗೂ ಅತ್ಯಾಧುನಿಕ ಟ್ರೈ ಆಕ್ಸೈಲ್‌ ಹೈ ರೆಸಲೂಷನ್‌ ಡಿಜಿಟಲ್ ಮ್ಯಾಗ್ನೊಮೀಟರ್‌ಗಳನ್ನು ಹೊಂದಿವೆ.