ಕಣ್ಣಿಗೆ ಕಾಣದ ಮಾಸ್ಕ್‌!

ಎಲ್ಲೆಲ್ಲೂ ಬಗೆಬಗೆಯ ಚಿತ್ತಾರದ, ಅನೇಕ ಪದರಗಳ, ತೊಳೆದು ಬಳಸಬಹುದಾದ ಅಥವಾ ಬಳಸಿ ಬಿಸಾಡಬಹುದಾದ ಮಾಸ್ಕ್‌ಗಳ ಹಾವಳಿ. ಅದರಲ್ಲೂ ಸೀರೆ, ಕುರ್ತಾಗಳ ಜೊತೆಗೆ ಮ್ಯಾಚಿಂಗ್‌ ಮಾಸ್ಕ್‌ ಬೇರೆ! ಹೀಗಿರುವಾಗ ಕಣ್ಣಿಗೇ ಕಾಣದ ಮಾಸ್ಕ್‌ ಇದೆ ಎಂದಾಗ ಅಚ್ಚರಿಯಾಗುತ್ತದೆ, ಅಲ್ವೇ? ಇದು ಹೆಲ್ಸಿಂಕೀ ವಿಶ್ವವಿದ್ಯಾಲಯದ ಸಂಶೋಧಕರ ನವನವೀನ ಕೊಡುಗೆ. ಕಣ್ಣಿಗೆ ಕಾಣದ್ದು ಎಂದರೆ ಪಾರದರ್ಶಕ ಬಟ್ಟೆಯಿಂದ ತಯಾರಾದದ್ದು ಖಂಡಿತ ಅಲ್ಲ; ಇಲ್ಲಿ ನಾವು ಮಾತನಾಡುತ್ತಿರುವುದು ಮೂಗಿನ ಒಳಗೆ ಹಾಕಿಕೊಳ್ಳುವ ಮಾಸ್ಕ್‌ ಬಗ್ಗೆ. ಇಲ್ಲಿ ಮಾಸ್ಕ್‌ ಎಂದಾಗ ಅದು ಬಟ್ಟೆಯದ್ದೇ ಆಗಬೇಕಿಲ್ಲವಲ್ಲ! ವೈರಸ್‌ ಅನ್ನು ನಮ್ಮ ದೇಹದೊಳಗೆ ಸೇರದಂತೆ ತಡೆಯುವ ತಡೆಗೋಡೆಯಾಗಿದ್ದರೆ ಸಾಕು. ಹೀಗೆ ಯೋಚಿಸಿದ ಸಂಶೋಧಕರು, ಕೋವಿಡ್‌–19 ವೈರಾಣುವಿನ ವಿರುದ್ಧ ಆಣ್ವಿಕ ನೆಲೆಗಟ್ಟಿನಲ್ಲಿ ಹೋರಾಡಲು ಸಜ್ಜಾದರು. ಎಷ್ಟೇ ಪದರಗಳ ಮಾಸ್ಕ್‌ ಧರಿಸಿದರೂ, ಅದನ್ನು ಸರಿಯಾಗಿ ಧರಿಸದಿದ್ದಲ್ಲಿ ಅಥವಾ ಸ್ವಚ್ಛಗೊಳಿಸುವಲ್ಲಿ ಹಿಂದುಮುಂದಾದರೂ ಸಮಸ್ಯೆ ತಪ್ಪಿದ್ದಲ್ಲ. ಅದರ ಬದಲು ವಿಜ್ಞಾನಿ ಆನ್ನಾ ಮಕೇಲ ಹಾಗೂ ತಂಡದ ಸಂಶೋಧಕರ ಕೊಡುಗೆಯನ್ನು ಬಳಸಿದರೆ, ವೈರಾಣುವು ನಮ್ಮ ದೇಹದೊಳಗೆ ಪ್ರವೇಶ ಪಡೆಯಲು ಸಾಧ್ಯವೇ ಇಲ್ಲ.

ಕೋವಿಡ್‌–19 ವೈರಾಣುವಿನ ಆಣ್ವಿಕ ರಚನೆಯ ಬಗ್ಗೆ ಈಗಾಗಲೇ ಲಭ್ಯವಿರುವ ಮಾಹಿತಿಯನ್ನು ಕೂಲಂಕಷವಾಗಿ ಪರಿಶೀಲಿಸಿದ ಹೆಲ್ಸಿಂಕಿಯ ಸೂಕ್ಷ್ಮಜೀವಾಣುತಜ್ಞರು, ಅದಕ್ಕೆ ವಿರೋಧೀ ಅಣುಗಳನ್ನು ತಯಾರಿಸಲು ಸಜ್ಜಾದರು. ವೈರಾಣುವನ್ನು ನಾಶ ಮಾಡಬೇಕಾದರೆ, ಮೊದಲು ಅದರ ಪ್ರೊಟೀನ್‌ ಹೊರಕವಚದ ಬಗ್ಗೆ ಆಣ್ವಿಕ ನೆಲೆಗಟ್ಟಿನಲ್ಲಿ ಅರಿತಿರಬೇಕು. ಆಗ ಆ ಹೊರಕವಚದ ಅತಿಮುಖ್ಯ ಭಾಗಗಳನ್ನು ನಿರ್ದಿಷ್ಟವಾಗಿ ಗುರಿಯಾಗಿಸಿ ನಾಶಪಡಿಸಿದರೆ, ವೈರಾಣುವಿನ ಅಸ್ತಿತ್ವಕ್ಕೇ ಕೊಡಲಿಪೆಟ್ಟು ಬಿದ್ದ ಹಾಗೆ. ಇದನ್ನು ನಮ್ಮೊಳಗಿರುವ ರೋಗನಿರೋಧಕ ವ್ಯವಸ್ಥೆಯು ಸಾಧ್ಯವಾಗಿಸುತ್ತದೆಯಾದರೂ ಅದು ಸಾಧ್ಯವಾಗುವುದು ಯಾವಾಗ ಗೊತ್ತೆ? ವೈರಾಣುವು ನಮ್ಮೊಳಗೆ ಸೇರಿ, ರೋಗಲಕ್ಷಣಗಳನ್ನು ಪ್ರಚುರಪಡಿಸಿ, ಕಾಡಿದಾಗ ಮಾತ್ರ. ನಮ್ಮ ರೋಗನಿರೋಧಕತೆಯಲ್ಲಿ ಸಮಸ್ಯೆ ಇದ್ದರೆ, ವೈರಾಣುವಿನ ಕೈ ಮೇಲಾಗಿ, ಅನಾಹುತ ಕಟ್ಟಿಟ್ಟ ಬುತ್ತಿ. ಈಗ ಕಂಡುಬಂದಿರುವ ಕೋವಿಡ್‌–19 ವೈರಾಣುವಿನ ರೂಪಾಂತರಿಗಳನ್ನೆಲ್ಲ ಅಧ್ಯಯನ ಮಾಡಿ, ಅವುಗಳ ವಿರುದ್ಧ ನಮ್ಮ ರೋಗನಿರೋಧಕಶಕ್ತಿ ಹೆಚ್ಚಿಸುವ ಸಲುವಾಗಿ ವ್ಯಾಕ್ಸಿನ್‌ ನೀಡಲಾಗುತ್ತಿದೆ. ಆ ಲಸಿಕೆ ಕೂಡ ಅಶಕ್ತ ವೈರಾಣುವನ್ನೋ, ವೈರಾಣುವಿನ ಭಾಗವನ್ನೋ ತನ್ನೊಳಗೆ ಇರಿಸಿಕೊಂಡಿರುತ್ತದೆ. ನಾಟಕಕ್ಕೆ ಮುನ್ನ ರಿಹರ್ಸಲ್‌ ನಡೆಸುವಂತೆ, ನಿಜವಾಗಲೂ ಕೋವಿಡ್‌ ವೈರಾಣು ಬಂದರೆ ಏನು ಮಾಡಬೇಕು ಎಂಬ ತರಬೇತಿಯನ್ನು ಲಸಿಕೆಯು ನಮ್ಮ ದೇಹಕ್ಕೆ ನೀಡಿ, ಸಜ್ಜುಗೊಳಿಸಿರುತ್ತದೆ. ಆದರೆ, ವೈರಾಣುವು ಒಳಗೇ ಬರದಂತೆ ತಡೆಯುವುದು ಇನ್ನೂ ಸೂಕ್ತವಲ್ಲವೇ? ಹಾಗಾಗಿಯೇ, ಮೂಗಿನ ಬಾಗಿಲ ಬಳಿ ಬಂದ ವೈರಾಣು ಅತಿಥಿಯನ್ನು, ಅಲ್ಲಿಯೇ ನಿರ್ನಾಮ ಮಾಡಿ, ಬಂದ ದಾರಿಗೆ ಸುಂಕವಿಲ್ಲವೆಂದು ಸಾರುವುದು ಈ ಹೊಸ ಮಾಸ್ಕ್‌ನ ಆಶಯ.

ಇಲ್ಲಿ, ಈಗಾಗಲೇ ಹೇಳಿದಂತೆ ಮಾಸ್ಕ್‌ ಎಂದರೆ ಬಟ್ಟೆಯ ಮುಖಗವಸಲ್ಲ; ಬದಲಿಗೆ ಮೂಗಿನ ಒಳಗೆ ಸಿಂಪಡಿಸಿಕೊಳ್ಳುವ ಒಂದು ವಿಶಿಷ್ಟ ಸ್ಪ್ರೇ! ಜೀವರಾಸಾಯನಿಕವಾಗಿ ಇದರ ಹೆಸರು ‘ಟ್ರಿಸ್‌ಬಿ 92’. ಈ ಸಂಶೋಧಕರ ತಂಡವು ತಯಾರಿಸಿರುವ ಈ ಸ್ಪ್ರೇ ರೂಪದ ಮಾಸ್ಕನ್ನು, ಮೂಗಿನ ಹೊಳ್ಳೆಗಳೊಳಗೆ ಒಮ್ಮೆ ಪೂಸಿಕೊಂಡರೆ ಮುಗೀತು, ಎಂಟು ಗಂಟೆಗಳ ಕಾಲ ಅದು ಕೋವಿಡ್‌ ವೈರಸ್‌ನಿಂದ ನಮಗೆ ಸುರಕ್ಷತೆ ನೀಡುತ್ತದೆಯಂತೆ. ಈ ಸಿಂಪಡಣೆಯಲ್ಲಿರುವ ‘ಟ್ರಿಸ್‌ಬಿ 92’ ಎಂಬ ಜೀವರಾಸಾಯನಿಕ ಅಣುವು, ವೈರಾಣುವಿನ ಹೊರಕವಚದ ನಿರ್ದಿಷ್ಟ ಸ್ಪೈಕ್‌ ಪ್ರೊಟೀನಿನ ಮೇಲೆ ದಾಳಿಮಾಡಿ, ವೈರಾಣುವನ್ನು ಅಶಕ್ತಗೊಳಿಸುತ್ತದೆ ಮತ್ತು ನಮ್ಮ ಜೀವಕಣಗಳೊಳಗೆ ವೈರಾಣುವು ಪ್ರವೇಶ ಪಡೆಯದಂತೆ ನೋಡಿಕೊಳ್ಳುತ್ತದೆ. ಇದು ಒಂದು ಬಗೆಯ ಕೋವಿಡ್‌–19 ವೈರಾಣು ಮಾತ್ರವಲ್ಲ, ಅದರ ಸಂಬಂಧಿಗಳಾದ ಸಾರ್ಸ್‌ ವೈರಾಣುಗಳೆಲ್ಲವನ್ನೂ ಮಟ್ಟಹಾಕುತ್ತದೆ ಎನ್ನುತ್ತದೆ ಈ ಅಧ್ಯಯನ. ಈ ಜೀವರಾಸಾಯನಿಕ ಮಾಸ್ಕ್‌ ಇನ್ನೂ ಮಾರುಕಟ್ಟೆಯಲ್ಲಿ ಲಭ್ಯವಿಲ್ಲವಾದರೂ, ಪ್ರಯೋಗದ ಕೊನೆಯ ಹಂತದಲ್ಲಿರುವ ಈ ‘ಟ್ರಿಸ್‌ಬಿ 92’ ಸ್ಪ್ರೇ, ಇನ್ನು ಕೊಂಚ ಸಮಯದಲ್ಲೇ ಎಲ್ಲರಿಗೂ ಸುಲಭವಾಗಿ ಸಿಗಲಿದೆ ಎನ್ನುತ್ತಾರೆ ಆಸ್ಟ್ರೇಲಿಯಾದ ವಿಜ್ಞಾನಿಗಳು. ಇದರ ದಯೆಯಿಂದಾದರೂ, ಉಸಿರುಗಟ್ಟಿಸುವ ಮುಖಗವಸುಗಳಿಂದ ಮುಕ್ತಿ ಸಿಗಬಹುದೇನೋ!