ಬಾಸ್ಟನ್‌: ಕೊರೊನಾ ವೈರಾಣುಗಳ ಅನುವಂಶಿಕ ಧಾತು ಮಾನವನ ದೇಹದಲ್ಲಿರುವ ಕೋಶಗಳಲ್ಲಿನ ಪ್ರೊಟೀನ್‌ಗಳ ಜೊತೆ ಹೇಗೆ ಹೊಂದಿಕೊಳ್ಳುತ್ತವೆ ಹಾಗೂ ಪರಿಣಾಮ ಬೀರುತ್ತವೆ ಎನ್ನುವುದನ್ನು ವಿಜ್ಞಾನಿಗಳು ಪತ್ತೆಹಚ್ಚಿದ್ದು, ಕೋವಿಡ್‌–19ಗೆ ಹೊಸ ಮಾದರಿಯ ಚಿಕಿತ್ಸೆಯ ಅಭಿವೃದ್ಧಿಗೆ ಇದು ಸಹಕಾರಿಯಾಗಲಿದೆ ಎನ್ನಲಾಗಿದೆ.
‘ವೈರಾಣುಗಳು ಹಾಗೂ ಅವುಗಳು ದಾಳಿ ಮಾಡುವ ಕೋಶದ ಅಣುಗಳ ಪರಸ್ಪರ ಕ್ರಿಯೆಯನ್ನು ತಕ್ಷಣದಲ್ಲೇ ಅರ್ಥಮಾಡಿಕೊಳ್ಳುವುದು ಅಗತ್ಯವಾಗಿದೆ. ಈ ಕ್ರಿಯೆಯ ವಿಸ್ತೃತ ಅಧ್ಯಯನ ನಡೆಸಿದರೆ, ವೈರಾಣುಗಳ ಸಂಖ್ಯೆಯು ಕೋಶದೊಳಗೆ ಹೇಗೆ ಹೆಚ್ಚಾಗುತ್ತಿದೆ ಎನ್ನುವುದನ್ನು ಪತ್ತೆಹಚ್ಚಲು ನೆರವಾಗಲಿದೆ’ ಎಂದು ಅಮೆರಿಕದ ಬ್ರಾಡ್‌ ಇನ್‌ಸ್ಟಿಟ್ಯೂಟ್‌ನ ಸಂಶೋಧಕರು ತಿಳಿಸಿದ್ದಾರೆ.
ಈ ಅಧ್ಯಯನ ವರದಿಯು ನೇಚರ್‌ ಮೈಕ್ರೊಬಯೋಲಜಿ ಹೆಸರಿನ ನಿಯತಕಾಲಿಕದಲ್ಲಿ ಪ್ರಕಟವಾಗಿದೆ. ‘ಸಾರ್ಸ್‌–ಸಿಒವಿ–2 ವೈರಾಣುಗಳು ದ್ವಿಗುಣವಾಗಲು ಆತಿಥೇಯ ಕೋಶಗಳ ಪ್ರೊಟೀನ್‌ಗಳನ್ನು ಬಳಸುತ್ತವೆ. ಆದರೆ, ಇಲ್ಲಿಯವರೆಗೂ ವೈರಾಣುವಿನ ಜೊತೆ ಸಂಪರ್ಕದಲ್ಲಿರುವ ಎಲ್ಲ ಪ್ರೊಟೀನ್‌ಗಳ ವಿಸ್ತೃತ ಅಧ್ಯಯನ ನಡೆದಿಲ್ಲ’ ಎಂದು ವಿಜ್ಞಾನಿಗಳು ತಿಳಿಸಿದರು.
