ಮೇ ತಿಂಗಳಲ್ಲಿ 5ಜಿ ಹರಾಜು?

5ಜಿ ತರಂಗಾಂತರ ಹರಾಜಿಗೆ ಸಂಬಂಧಿಸಿದ ಶಿಫಾರಸುಗಳನ್ನು ಮಾರ್ಚ್‌ಗೆ ಮುನ್ನ ಸಲ್ಲಿಸುವುದಾಗಿ ಟ್ರಾಯ್ ಹೇಳಿದೆ ಎಂದು ದೂರಸಂಪರ್ಕ ಸಚಿವ ಅಶ್ವಿನಿ ವೈಷ್ಣವ್ ಈಚೆಗೆ ತಿಳಿಸಿದ್ದರು. ಹರಾಜನ್ನು ಆದಷ್ಟು ಬೇಗ ನಡೆಸುವುದಕ್ಕೆ ಅಗತ್ಯವಿರುವ ಇತರ ಪ್ರಕ್ರಿಯೆಗಳಿಗೆ ದೂರಸಂಪರ್ಕ ಇಲಾಖೆಯು ಸಜ್ಜಾಗುತ್ತಿದೆ ಎಂದೂ ಅವರು ಹೇಳಿದ್ದರು.

‘ಟ್ರಾಯ್‌ ಶಿಫಾರಸು ಮಾರ್ಚ್‌ ಒಳಗೆ ಬರಲಿದೆ. ಅದಾದ ನಂತರ, ನಮಗೆ ಶಿಫಾರಸುಗಳ ಬಗ್ಗೆ ತೀರ್ಮಾನ ಕೈಗೊಳ್ಳಲು ಒಂದು ತಿಂಗಳು ಬೇಕು’ ಎಂದು ದೂರಸಂಪರ್ಕ ಕಾರ್ಯದರ್ಶಿ ಕೆ. ರಾಜಾರಾಮನ್ ತಿಳಿಸಿದ್ದಾರೆ.

ದೂರಸಂಪರ್ಕ ಇಲಾಖೆ ನೀಡಿರುವ ಮಾಹಿತಿ ಪ್ರಕಾರ, 4ಜಿ ಸೇವೆಗಳಲ್ಲಿ ಸಿಗುವುದಕ್ಕಿಂತ ಹತ್ತು ಪಟ್ಟು ಹೆಚ್ಚಿನ ಡೌನ್‌ಲೋಡ್‌ ವೇಗ 5ಜಿ ಸೇವೆಗಳಲ್ಲಿ ಲಭ್ಯವಾಗಲಿದೆ.