ಸೈನ್ಯ ಸೇರುವ ಆಕಾಂಕ್ಷಿಗಳಿಗೆ ಮಾಹಿತಿಗಾಗಿ ‘ಡಿಫೆನ್ಸ್ ಭರ್ತಿ’ ಮೊಬೈಲ್ ಆ್ಯಪ್

‘ಗೂಗಲ್ ಪ್ಲೇ ಸ್ಟೋರ್‌ನಲ್ಲಿ ಆ್ಯಪ್‌ ಲಭ್ಯವಿದೆ. ಸೇನೆ ಭರ್ತಿಗೆ ಸಂಬಂಧಿಸಿದಂತೆ ಮಹತ್ವದ ಅಂಶಗಳನ್ನು ಇದು ತಿಳಿಸಿಕೊಡುತ್ತದೆ. ಕೇಂದ್ರ ಸರ್ಕಾರ ಸೇನೆಗೆ ಸೇರಲು ಯುವತಿಯರಿಗೂ ಅವಕಾಶ ಕಲ್ಪಿಸಿರುವುದರಿಂದ ಅವರೂ ಈ ಆ್ಯಪ್ ಉಪಯೋಗ ಮಾಡಿಕೊಳ್ಳಬಹುದು’ ಎಂದು ಪರ್ವೇಜ್ ಮತ್ತು ಜಗದೀಶ ತಿಳಿಸಿದರು.

‘ಕಾರ್ಗಿಲ್ ವಿಜಯ ದಿನದಂದು ಈ ಡಿಫೆನ್ಸ್ ಭರ್ತಿ ಮೊಬೈಲ್ ಫೋನ್‌ ಆ್ಯಪ್ ಬಿಡುಗಡೆ ಮಾಡಲಾಯಿತು. ತಿಂಗಳ ಅವಧಿಯಲ್ಲಿ 2ಸಾವಿರಕ್ಕೂ ಹೆಚ್ಚು ಮಂದಿ ಡೌನ್‌ಲೋಡ್ ಮಾಡಿಕೊಂಡಿದ್ದಾರೆ. ಕರ್ನಾಟಕ, ತಮಿಳುನಾಡು, ಕೇರಳ, ಮಹಾರಾಷ್ಟ್ರ, ಆಂಧ್ರ, ತೆಲಂಗಾಣ, ಅಸ್ಸಾಂ, ಒಡಿಸಾ ಮೊದಲಾದ ರಾಜ್ಯಗಳವರು ಈ ಆ್ಯಪ್ ಬಳಸುತ್ತಿದ್ದಾರೆ’ ಎಂದು ತಿಳಿಸಿದರು.

ಆ್ಯಪ್ ವಿಶೇಷತೆ

‘ದೇಶದಾದ್ಯಂತ ನಡೆಯುವ ಸೇನಾ ಭರ್ತಿ ರ‍್ಯಾಲಿಗಳ ಬಗ್ಗೆ ಸಂಪೂರ್ಣ ವಿವರ ಇದರಲ್ಲಿದೆ. ಸೇನೆಯ ವಿವಿಧ ಟ್ರೇಡ್‌್ಗಳ ಪರಿಚಯವಿದೆ. ಪ್ರಚಲಿತ ವಿದ್ಯಮಾನಗಳನ್ನು ಇಲ್ಲಿ ಚರ್ಚಿಸಲಾಗುತ್ತದೆ. ಪ್ರತಿ ನಿತ್ಯ ಪ್ರಶ್ನೆಗಳನ್ನು ನೀಡಲಾಗುತ್ತದೆ. ಉಚಿತವಾಗಿ ಕಿರು ಪರೀಕ್ಷೆ ನಡೆಸಲಾಗುತ್ತದೆ. ಪರೀಕ್ಷೆ ಮುಗಿದ ಬಳಿಕ ಫಲಿತಾಂಶವನ್ನು ಆ್ಯಪ್‌ನಲ್ಲಿಯೇ ಪ್ರಕಟಿಸಲಾಗುತ್ತದೆ. ಆ್ಯಪ್ ಬಳಸುವ ಎಲ್ಲರೂ ಈ ಸೌಲಭ್ಯಗಳನ್ನು ಉಚಿತವಾಗಿ ಪಡೆಯಬಹುದಾಗಿದೆ’ ಎಂದು ಪರ್ವೇಜ್ ಮಾಹಿತಿ ನೀಡಿದರು.

‘ಸೇನೆ ನಡೆಸುವ ಮಾದರಿಯಲ್ಲಿಯೇ ವಾರಕ್ಕೊಂದು ಸಾಮಾನ್ಯ ಪ್ರವೇಶ ಪರೀಕ್ಷೆ (ಸಿಇಇ) ಏರ್ಪಡಿಸಲಾಗುತ್ತದೆ. ನಿತ್ಯ ಅಭ್ಯಸಿಸಲು ವಿಷಯವಾರು ಬಹು ಆಯ್ಕೆ ಪ್ರಶ್ನೆಗಳು ಇಲ್ಲಿ ಲಭ್ಯವಿರುತ್ತವೆ. ಹಣ ಪಾವತಿಸಿದ ಚಂದಾದಾರರಿಗೆ ಮಾತ್ರ ಸಿಇಇಗೆ ಅವಕಾಶವಿದೆ’ ಎನ್ನುತ್ತಾರೆ ಅವರು.