ಗುರುವಾರ , ಅಕ್ಟೋಬರ್ 1, 2020
27 °C

ಚೀನಾದ ಟೆನ್ಸೆಂಟ್‌ನಿಂದ ‘ಪಬ್‌ಜಿ ಮೊಬೈಲ್‘ ಹಕ್ಕು ಹಿಂಪಡೆದ ದಕ್ಷಿಣ ಕೊರಿಯಾ ಕಂಪನಿ

ಏಜೆನ್ಸೀಸ್ Updated:

ಅಕ್ಷರ ಗಾತ್ರ : | |

ಪಬ್‌ಜಿ ಗೇಮ್‌–ಪ್ರಾತಿನಿಧಿಕ ಚಿತ್ರ

ನವದೆಹಲಿ: ಭಾರತದಲ್ಲಿ ನಿಷೇಧಕ್ಕೆ ಒಳಗಾಗಿರುವ ಪಬ್‌ಜಿ (PUBG)ಮೊಬೈಲ್‌ ಗೇಮ್‌ ಮತ್ತೆ ದೇಶದಲ್ಲಿ ಕಾರ್ಯಾಚರಣೆ ಪುನರಾರಂಭಿಸುವ ಸೂಚನೆ ದೊರೆತಿದೆ. ಚೀನಾದ ಟೆನ್ಸೆಂಟ್‌ನಿಂದ ಭಾರತದಲ್ಲಿ ಪಬ್‌ಜಿ ಪ್ರಕಟಿಸುವ ಹಕ್ಕನ್ನು ಪಬ್‌ಜಿ ಕಾರ್ಪೊರೇಷನ್‌ ಹಿಂಪಡೆಯುತ್ತಿರುವುದಾಗಿ ಬ್ಲಾಗ್‌ನಲ್ಲಿ ತಿಳಿಸಿದೆ.

ದಕ್ಷಿಣ ಕೊರಿಯಾದ ಪಬ್‌ಜಿ ಕಾರ್ಪೊರೇಷನ್‌ ಪ್ಲೇಯರ್‌ಅನ್‌ನೌನ್ಸ್‌ ಬ್ಯಾಟಲ್‌ಗ್ರೌಂಡ್ಸ್‌ (ಪಬ್‌ಜಿ) ಗೇಮ್‌ನ ಮಾಲೀಕತ್ವ ಹೊಂದಿದೆ. ಪಬ್‌ಜಿ ಸೇರಿದಂತೆ ಚೀನಾ ಮೂಲದ 118 ಆ್ಯಪ್‌ಗಳನ್ನು ಭಾರತ ಸರ್ಕಾರ ಕಳೆದ ವಾರವಷ್ಟೇ ನಿಷೇಧಿಸಿದೆ. ಭಾರತ ಮತ್ತು ಚೀನಾದ ಗಡಿ ಪ್ರದೇಶಗಳಲ್ಲಿ ಬಿಕ್ಕಟ್ಟು ಸೃಷ್ಟಿಯಾಗಿರುವ ಸಮಯದಲ್ಲೇ ಚೀನಾ ಮೊಬೈಲ್‌ ಅಪ್ಲಿಕೇಷನ್‌ಗಳನ್ನು ಭಾರತ ಸರ್ಕಾರ ನಿಷೇಧಿಸಿದೆ.

'ಪಬ್‌ಜಿ ಕಾರ್ಪೊರೇಷನ್‌ ಭಾರತದಲ್ಲಿ ಗೇಮ್‌ ಪ್ರಕಟಿಸುವ ಎಲ್ಲ ಹೊಣೆಯನ್ನು ವಹಿಸಲಿದೆ. ಭಾರತದ ಬಳಕೆದಾರರಿಗೆ ಮುಂದಿನ ದಿನಗಳಲ್ಲಿ ಗೇಮಿಂಗ್‌ ಅನುಭವ ನೀಡುವ ಮಾರ್ಗಗಳನ್ನು ಅನ್ವೇಷಿಸಲಾಗುತ್ತಿದೆ' ಕಂಪನಿ ಹೇಳಿದೆ.

ಪಬ್ ಜಿ ಕಾರ್ಪೊರೇಷನ್ ನಲ್ಲಿ ಚೀನಾದ ಟೆನ್ಸೆಂಟ್ ಗೇಮ್ಸ್ ಶೇ 10ರಷ್ಟು ಪಾಲುದಾರಿಕೆ ಹೊಂದಿದ್ದು, ಭಾರತ ಸೇರಿದಂತೆ ಹಲವು ರಾಷ್ಟ್ರಗಳಲ್ಲಿ ಪಬ್‌ಜಿ ಮೊಬೈಲ್‌ ಗೇಮ್‌ ಪ್ರಕಟಿಸುವ, ನಿರ್ವಹಿಸಲು ಪರವಾನಗಿ ಪಡೆದಿತ್ತು.

ಇದನ್ನೂ ಓದಿ: ಇ–ಗೇಮ್ ಗೀಳು: ಇದು ವಿಡಿಯೊ ಗೇಮ್ ಜಗತ್ತಿನ ಕರಾಳ ಮುಖ

ಟೆನ್ಸೆಂಟ್‌ ಈ ಕುರಿತು ಯಾವುದೇ ಪ್ರತಿಕ್ರಿಯೆ ನೀಡಿಲ್ಲ. ಭಾರತದಲ್ಲಿ ಪಬ್‌ಜಿ ನಿಷೇಧವಾಗುತ್ತಿದ್ದಂತೆ ಟೆನ್ಸೆಂಟ್‌ ಷೇರು ಬೆಲೆ ಶೇ 2ರಷ್ಟು ಕುಸಿದು, ಮಾರುಕಟ್ಟೆ ಮೌಲ್ಯದಲ್ಲಿ ಸುಮಾರು 340 ಕೋಟಿ ಡಾಲರ್‌ ನಷ್ಟ ಆಗಿದೆ.

ಇತ್ತೀಚಿನ ಬೆಳವಣಿಗೆಗಳ ಸಂಬಂಧ ಭಾರತ ಸರ್ಕಾರ ಇನ್ನೂ ಪ್ರತಿಕ್ರಿಯಿಸಿಲ್ಲ. ಪ್ರಸ್ತುತ ಗೂಗಲ್‌ ಪ್ಲೇ ಸ್ಟೋರ್‌ ಮತ್ತು ಆ್ಯಪಲ್‌ ಸ್ಟೋರ್‌ಗಳಲ್ಲಿ ಪಬ್‌ಜಿ ಮೊಬೈಲ್‌ ಅಪ್ಲಿಕೇಷನ್‌ ಲಭ್ಯವಿಲ್ಲ. ಈಗಾಗಲೇ ಇನ್‌ಸ್ಟಾಲ್‌ ಮಾಡಿಕೊಂಡಿರುವವರು ಗೇಮ್‌ ಆಡಬಹುದಾಗಿದೆ. ಆದರೆ, ಹೊಸ ಅಪ್‌ಡೇಟ್‌ ಲಭ್ಯವಿರುವುದಿಲ್ಲ.

ಇದನ್ನೂ ಓದಿ:

ಪ್ರಜಾವಾಣಿ ಫೇಸ್‌ಬುಕ್ ಪುಟವನ್ನು ಲೈಕ್ ಮಾಡಿ, ಪ್ರಮುಖ ಸುದ್ದಿಗಳ ಅಪ್‌ಡೇಟ್ಸ್ ಪಡೆಯಿರಿ.

ಪ್ರಜಾವಾಣಿಯನ್ನು ಟ್ವಿಟರ್‌ನಲ್ಲಿ ಇಲ್ಲಿ ಫಾಲೋ ಮಾಡಿ.

ಟೆಲಿಗ್ರಾಂ ಮೂಲಕ ನಮ್ಮ ಸುದ್ದಿಗಳ ಅಪ್‌ಡೇಟ್ಸ್ ಪಡೆಯಲು ಇಲ್ಲಿ ಕ್ಲಿಕ್ ಮಾಡಿ.

ಈ ವಿಭಾಗದಿಂದ ಇನ್ನಷ್ಟು