ಪ್ರಜಾವಾಣಿ ಸಾಧಕಿಯರು: ಸಾರಂಗಧರ... ಈ ಕಂಠದಲಿ ಅಮರ

ಚನ್ನಪಟ್ಟಣದ 67 ವರ್ಷದ ಗಿರಿಜಮ್ಮ ಅವರು ಪೌರಾಣಿಕ ನಾಟಕ, ಸೋಬಾನೆ ಪದ, ತತ್ವಪದ ಮತ್ತು ವಿವಿಧ ಜಾನಪದ ಹಾಡುಗಳನ್ನು ಹಾಡುವಲ್ಲಿ ಅಪ್ರತಿಮ ಸಾಮರ್ಥ್ಯ ಹೊಂದಿದ್ದಾರೆ.

ತಮ್ಮ ಕುಟುಂಬದಲ್ಲಿ ತಲೆಮಾರುಗಳಿಂದ ಬಂದಿರುವ ಸಾರಂಗಧರ ಚರಿತ್ರೆ ಸೇರಿದಂತೆ ಅನೇಕ ಜನಪದ ಕಲೆಗಳನ್ನು ಮುಂದಿನ ಪೀಳಿಗೆಗೆ ಕಲಿಸಿಕೊಡುವ ಮೂಲಕ ಅವರು ಜಾನಪದ ಕಲೆಗೆ ಜೀವಾಳವಾಗಿ ನಿಂತಿದ್ದಾರೆ.

ಕಲೆಗೆ ಸೀಮಿತವಾಗದೆ, ತನ್ನ ಸ್ವಂತ ಜಮೀನನ್ನು ಸಾಂಸ್ಕೃತಿಕ ಭವನ ಮತ್ತು ಸ್ಮಶಾನಕ್ಕೆ ದಾನ ಮಾಡಿರುವ ಗಿರಿಜಮ್ಮ, ಶಾಲಾ ಮಕ್ಕಳಿಗೆ ಶಿಕ್ಷಣ ಸಾಮಗ್ರಿಗಳನ್ನು ನೀಡಿ ಪ್ರೋತ್ಸಾಹಿಸುತ್ತಿದ್ದಾರೆ.

ಗಿರಿಜಮ್ಮ ಅವರು ಪರಿಸರ ಪ್ರೇಮಿಯಾಗಿ ತಮ್ಮ ಗ್ರಾಮದ ರಸ್ತೆ ಬದಿಗಳಲ್ಲಿ 400ಕ್ಕೂ ಹೆಚ್ಚು ಸಸಿಗಳನ್ನು ನೆಟ್ಟು ಅವುಗಳನ್ನು ಮರಗಳಾಗಿ ಬೆಳೆಸುವಲ್ಲಿ ಯಶಸ್ವಿಯಾಗಿದ್ದಾರೆ.

ಗ್ರಾಮೀಣ ಭಾಗದ ಅದ್ಭುತ ಪ್ರತಿಭೆಯಾದ ಗಿರಿಜಮ್ಮ ಅವರಿಗೆ ಸ್ಥಳೀಯವಾಗಿ ಸನ್ಮಾನಗಳು ದೊರೆತಿದ್ದರೂ, ಈವರೆಗೂ ಯಾವುದೇ ಸರ್ಕಾರಿ ಪ್ರಶಸ್ತಿಗಳು ದೊರೆತಿಲ್ಲ ಎಂಬುದು ಕೊರಗು.