ಸೀರೆ ಉಟ್ಟು ಉಪವಾಸ ಕುಳಿತ ನೆನಪು

7

ಸೀರೆ ಉಟ್ಟು ಉಪವಾಸ ಕುಳಿತ ನೆನಪು

Published:
Updated:
Deccan Herald

ಎಲ್ಲಾ ಹೆಣ್ಣು ಮಕ್ಕಳು ಮೊದಲ ಬಾರಿಗೆ ಸೀರೆ ಉಡೋಕೆ ಕಲಿಯುವುದೇ ಅಮ್ಮನ ಸೀರೆಯ ಟ್ರಯಲ್ ಮೂಲಕ. ಅಮ್ಮ ಬೀರುವಿನಲ್ಲಿ ಒಪ್ಪವಾಗಿ ಜೋಡಿಸಿಟ್ಟ ಸೀರೆಯನ್ನು ಅಮ್ಮನದೇ ದೊಗಲೆ ಬ್ಲೌಸ್ ಧರಿಸಿ ಉಟ್ಟ ಅನುಭವದ ನೆನಪೇ ರೋಮಾಂಚನ. ನಾನು ಮೊದಲ ಬಾರಿಗೆ ಅಮ್ಮನ ಮದುವೆಯ ಆಕಾಶ ನೀಲಿ ಬಣ್ಣದ ಸೀರೆಯನ್ನು ಉಟ್ಟು ಅಪ್ಪನ ಮುಂದೆ ನಿಂತಿದ್ದೆ. ಅವಾಗ ಆಶ್ಚರ್ಯದಿಂದ ‘ನನ್ನ ಮಗಳು ಇಷ್ಟು ಬೆಳೆದಳೇ’ ಎಂದು ಅಮ್ಮನ ಮುಂದೆ ಆಶ್ಚರ್ಯ ವ್ಯಕ್ತಪಡಿಸಿದ್ದರು ಅಪ್ಪ. 

ನಾನು ಸೀರೆ ಉಟ್ಟು ಹೊರಗಡೆ ಕಾಲಿಟ್ಟಿದ್ದು ಪದವಿ ಕಾಲೇಜಿನ ಕಾಲೇಜು ವಾರ್ಷಿಕೋತ್ಸವದಂದೇ. ‘ಕಾಲೇಜ್‌ ಡೇ’ಗೆ ಅಮ್ಮನ ಇಷ್ಟದ ಸೀರೆಯನ್ನು ಉಡಲು ಆಯ್ಕೆ ಮಾಡಿಕೊಂಡಿದ್ದೆ. ಅಂದು 10 ಗಂಟೆಗೆ ಕಾಲೇಜಿನಲ್ಲಿ ಇರಬೇಕು. ನಾನು ಬೆಳಿಗ್ಗೆ 5ಕ್ಕೆ ಎದ್ದು ಸೀರೆ ಉಡೋಕೆ ಆರಂಭಿಸಿದ್ದೆ. ಒಂದು ತಿಂಗಳ ಮೊದಲೇ ಅಮ್ಮನಿಂದ ಸೀರೆ ಹೇಗೆ ಉಡಬೇಕು ಎಂದು ಸಲಹೆ ಪಡೆದಿದ್ದೆ. ಅಮ್ಮ ಹಳೆಯ ಕಾಲದ ರೀತಿ ಸೀರೆ ಉಡುತ್ತಾರೆ ಎಂದು ಹಿಂದಿನ ದಿನ ಆಗಿನ್ನೂ ಸ್ಮಾರ್ಟ್‍ಫೋನ್ ಬಂದಿಲ್ಲವಾದರ ಕಾರಣ ಸೈಬರ್ ಕೆಫೆಗೆ ತೆರಳಿ ಯೂಟ್ಯೂಬ್‍ನಲ್ಲಿ ಸೀರೆ ಉಡುವ ಹೊಸ ಸ್ಟೈಲ್‍ ಅನ್ನೂ ನೋಡಿಕೊಂಡು ಬಂದಿದ್ದೆ. 

ಕೊನೆಗೆ ಡಜನ್‌ ಸೇಫ್ಟಿ ಪಿನ್‌ ಚುಚ್ಚಿ ಹೇಗೋ ಸೆರಗು ಸಿಕ್ಕಿಸಿಕೊಂಡು ಕಾಲೇಜಿಗೆ ತೆರಳಿದ್ದೆ. ನನಗೆ ಜೊತೆಯಾಗಿದ್ದು ಒಂದಿಷ್ಟು ನಾಚಿಕೆ. ಕಾಲೇಜು ತಲುಪಿದಾಗ ಗೆಳತಿಯರು ಪುನಃ ಸೀರೆ ಉಡಿಸಿದರು.

ಮಜಾ ಏನೆಂದರೆ ಸೀರೆ ಉಟ್ಟ ದಿನ ಅದೇನೋ ಹೇಳಿಕೊಳ್ಳಲಾಗದ ಸಂಕಟ. ಸೀರೆ ಉಟ್ಟ ದಿನವೆಲ್ಲಾ ಉಪವಾಸನೇ ಇದ್ದೆ. ಊಟ ಮಾಡೋಕು ಆಗಿರಲಿಲ್ಲ. ಅದ್ಯಾಕೆ ಆ ರೀತಿಯ ಸಂಕಟವಾಗುತ್ತಿತ್ತು ಎಂದು ಈವರೆಗೂ ನನಗರ್ಥವಾಗಿಲ್ಲ. ಈಗ ಸೀರೆ ಉಡೋದು ಅಭ್ಯಾಸವಾಗಿ ಬಿಟ್ಟಿದೆ. ಈಗ ಬಾಲ್ಯ ಕಳೆದುಹೋಗಿದೆ. ಬದುಕಿನ ಸಣ್ಣ ಪುಟ್ಟ ಸಂಗತಿಗಳಲ್ಲೂ ಅದೆಷ್ಟು ಖುಷಿ ನೀಡುತ್ತವೆ ಅಲ್ವಾ? 
–ಶ್ವೇತಾ ಕೊಮ್ಮುಂಜೆ, ವಿದ್ಯಾನಗರ, ದಾವಣಗೆರೆ

ಬರಹ ಇಷ್ಟವಾಯಿತೆ?

  • 0

    Happy
  • 0

    Amused
  • 0

    Sad
  • 0

    Frustrated
  • 0

    Angry

Comments:

0 comments

Write the first review for this !