ವಾಷಿಂಗ್ಟನ್: ಎಚ್1 ಬಿ ವೀಸಾದಡಿ ನೆಲೆಸಿರುವ ಉದ್ಯೋಗಿಗಳ ಸಂಗಾತಿಯರಿಗೆ ಮತ್ತು ಕುಟುಂಬದವರಿಗೂ ಉದ್ಯೋಗ ದೃಢೀಕರಣ ದಾಖಲಾತಿಗಳನ್ನು ವಿಸ್ತರಿಸುವಂತೆ ಅಮೆರಿಕದ 60 ಜನಪ್ರತಿನಿಧಿಗಳ ನಿಯೋಗವೊಂದು, ಅಮೆರಿಕದ ಅಧ್ಯಕ್ಷೀಯ ಚುನಾವಣೆಯಲ್ಲಿ ಆಯ್ಕೆಯಾಗಿರುವ ಜೋ ಬೈಡನ್ ಅವರನ್ನು ಒತ್ತಾಯಿಸಿದೆ.
ಎಚ್-1ಬಿ ವೀಸಾ ಹೊಂದಿರುವವರ ಸಂಗಾತಿಗಳಿಗೆಅಮೆರಿಕದಲ್ಲಿ ನೌಕರಿ ಮಾಡಲು ಅನುಮತಿ ನೀಡುವ ಎಚ್4 ವೀಸಾವನ್ನು ರದ್ದುಗೊಳಿಸುವ ಟ್ರಂಪ್ ಆಡಳಿತದ ನಿರ್ಧಾರವನ್ನು ಕೈಬಿಡುವಂತೆ ಈ ಜನಪ್ರತಿನಿಧಿಗಳ ತಂಡ ಮನವಿ ಮಾಡಿದೆ.
ಎಚ್ -1 ಬಿ ವೀಸಾ ಹೊಂದಿರುವ ಉದ್ಯೋಗಿಗಳ ಕುಟುಂಬ ಸದಸ್ಯರಿಗೆ (ಪತ್ನಿ/ಪತಿ ಮತ್ತು 21 ವರ್ಷದೊಳಗಿನ ಮಕ್ಕಳಿಗೆ) ಅಮೆರಿಕದ ಪೌರತ್ವ ಮತ್ತು ವಲಸೆ ಸೇವಾ ಇಲಾಖೆ (ಯುಎಸ್ಸಿಐಎಸ್) ಎಚ್ -4 ವೀಸಾವನ್ನು ನೀಡುತ್ತದೆ. ಈಗ ಈ ವೀಸಾ ಪಡೆದಿರುವವರಲ್ಲಿ ಹೆಚ್ಚಿನವರು ಭಾರತೀಯ ಐಟಿ ವೃತ್ತಿಪರರು.