ಜಕಾರ್ತ, ಇಂಡೊನೇಷ್ಯಾ: ವ್ಯಭಿಚಾರವನ್ನು ಶಿಕ್ಷಾರ್ಹ ಅಪರಾಧವಾಗಿ ಪರಿಗಣಿಸುವ ತಿದ್ದುಪಡಿ ಮಸೂದೆಗೆ ಇಂಡೊನೇಷ್ಯಾ ಸಂಸತ್ ಮಂಗಳವಾರ ಸರ್ವಾನುಮತದ ಅನುಮೋದನೆ ನೀಡಿತು.
ವಿವಾಹೇತರ ಲೈಂಗಿಕತೆ ಶಿಕ್ಷಾರ್ಹ ಅಪರಾಧವಾಗಲಿದ್ದು, ಇದು ದೇಶದ ನಾಗರಿಕರಲ್ಲದೇ, ಇಂಡೊನೇಷ್ಯಾಕ್ಕೆ ಭೇಟಿ ನೀಡುವವರಿಗೂ ಅನ್ವಯವಾಗಲಿದೆ.
‘ಸಂಸದೀಯ ಕಾರ್ಯಪಡೆ ನವೆಂಬರ್ನಲ್ಲಿ ಈ ತಿದ್ದುಪಡಿ ಮಸೂದೆಯನ್ನು ಅಂತಿಮಗೊಳಿಸಿತ್ತು. ಸಂಸತ್ನ ಅನುಮೋದನೆ ದೊರೆತಿರುವ ಈ ಮಸೂದೆಗೆ ಅಧ್ಯಕ್ಷರು ಅಂಕಿತ ಹಾಕಬೇಕಿದೆ’ ಎಂದು ಕಾನೂನು ಮತ್ತು ಮಾನವ ಹಕ್ಕುಗಳ ಸಚಿವ ಎಡ್ವರ್ಡ್ ಹಿರೇಜ್ ತಿಳಿಸಿದ್ದಾರೆ.
ಈಗ ಜಾರಿಯಲ್ಲಿರುವ ಹಳೆಯ ಕಾಯ್ದೆಯು ರದ್ದಾಗಿ, ನೂತನ ಕಾಯ್ದೆ ಜಾರಿಗೆ ಬರಲು ಕನಿಷ್ಠ ಮೂರು ವರ್ಷಗಳು ಬೇಕಾಗುತ್ತವೆ ಎಂದು ಮೂಲಗಳು ಹೇಳಿವೆ.