ಅಮೆರಿಕದ 20 ರಾಜ್ಯಗಳಲ್ಲಿ ಅಕ್ಟೋಬರ್‌ ತಿಂಗಳನ್ನು ಹಿಂದೂ ಪರಂಪರೆ ಮಾಸವಾಗಿ ಆಚರಣೆ

ಹಿಂದೂ ಸಮುದಾಯದ ಪರವಾಗಿ ದೇಶದಲ್ಲಿ ಮೊದಲ ಬಾರಿಗೆ ಕೈಗೊಂಡಿರುವ ಈ ಉಪಕ್ರಮವನ್ನು ಚುನಾಯಿತ ಪ್ರತಿನಿಧಿಗಳು ಸ್ವಾಗತಿಸಿದ್ದಾರೆ. ಇಂಥದ್ದೊಂದು ಪ್ರಕಟಣೆ ಮತ್ತು ಅಧಿಸೂಚನೆಯನ್ನು ಹೊರಡಿಸುವ ಮೂಲಕ ಅಮೆರಿಕದಲ್ಲಿ ಅಲ್ಪಸಂಖ್ಯಾತ ಸಮುದಾಯದ ಕೊಡುಗೆಗಳನ್ನು ಗೌರವಿಸಲಾಗುತ್ತಿದೆ ಎಂದು ಅವರು ಹೇಳಿದ್ದಾರೆ.

ವಿಶ್ವದಾದ್ಯಂತವಿರುವ ಹಿಂದೂ ಸಮುದಾಯದವರು ಅಕ್ಟೋಬರ್ ತಿಂಗಳ ಪೂರ್ತಿ ನವರಾತ್ರಿ, ದಸರಾ, ದುರ್ಗಾ ಪೂಜೆ ಮತ್ತು ದೀಪಾವಳಿ ಹಬ್ಬಗಳನ್ನು ಆಚರಿಸುತ್ತಾರೆ. ಈ ಹಿನ್ನೆಲೆಯಲ್ಲಿ ಅಮೆರಿಕದಲ್ಲಿರುವ ಕೆಲವು ಹಿಂದೂ ಸಮುದಾಯದ ಗುಂಪುಗಳು ಅಕ್ಟೋಬರ್ ತಿಂಗಳನ್ನು ಹಿಂದೂ ಪರಂಪರೆ ಮಾಸವಾಗಿ ಆಚರಿಸುತ್ತಿವೆ ಎಂದು ಹಿಂದೂ ಸಮುದಾಯದ ಗುಂಪೊಂದು ಮಾಧ್ಯಮಗಳಿಗೆ ಬಿಡುಗಡೆ ಮಾಡಿರುವ ಪ್ರಕಟಣೆಯಲ್ಲಿ ತಿಳಿಸಿದೆ.

ಅಮೆರಿಕದಲ್ಲಿ ಹಿಂದೂ ಸಮುದಾಯವು ಯೋಗದಿಂದ ಆಹಾರದವರೆಗೆ, ಹಬ್ಬ, ಉತ್ಸವಗಳಿಂದ ದಾನ–ದತ್ತಿವರೆಗೆ, ನೃತ್ಯಗಳಿಂದ ಸಂಗೀತದವರೆಗೆ, ಅಹಿಂಸೆಯಿಂದ ಆಳವಾದ ತತ್ವಶಾಸ್ತ್ರದವರೆಗೆ, ಜೀವನದ ಎಲ್ಲಾ ಹಂತಗಳನ್ನು ತಲುಪುತ್ತಿದೆ. ಈ ತಿಂಗಳನ್ನು ಹಿಂದೂ ಸಮುದಾಯದ ವೈಶಿಷ್ಟ್ಯವನ್ನು ಗುರುತಿಸುವಂತಹ ಎಲ್ಲ ಕಾರ್ಯಕ್ರಮಗಳನ್ನೂ ಹಿಂದೂ ಸಮುದಾಯದ ಗುಂಪುಗಳು, ಎಲ್ಲ ರೂಪಗಳಲ್ಲಿ ಆಚರಿಸುತ್ತಿವೆ ಎಂದು ಪ್ರಕಟಣೆಯಲ್ಲಿ ತಿಳಿಸಿದೆ.