ಕರಾಚಿ: ಅಪ್ರಾಪ್ತ ವಯಸ್ಸಿನ ಕ್ರಿಶ್ಚಿಯನ್‌ ಬಾಲಕಿಯನ್ನು ಒತ್ತಾಯಪೂರ್ವಕವಾಗಿ ಮುಸ್ಲಿಂ ಧರ್ಮಕ್ಕೆ ಮತಾಂತರಗೊಳಿಸಿ ವಿವಾಹ ಮಾಡಿಸಿದ ಆರೋಪದಡಿ ಪಾಕಿಸ್ತಾನ ನ್ಯಾಯಾಲಯವು ಮುಸ್ಲಿಂ ಧರ್ಮ ಗುರುವಿಗೆ ಜಾಮೀನು ರಹಿತ ವಾರೆಂಟ್ ಜಾರಿ ಮಾಡಿದೆ.
ಈ ಸಂಬಂಧ ಬಾಲಕಿಯು ಕಾಜಿ ಮುಫ್ತಿ ಅಹಮೆದ್ ಜಾನ್‌ ರಹೀಮಿ ವಿರುದ್ಧ ಪ್ರಕರಣ ದಾಖಲಿಸಿದ್ದಳು. ಈ ಬಳಿಕ ಅ.16 ರಂದು ಧರ್ಮ ಗುರು ತಲೆಮರೆಸಿಕೊಂಡಿದ್ದಾರೆ. ಕಾಜಿ ಮುಫ್ತಿಯ ವಿರುದ್ಧ ಹಲವು ಮತಾಂತರ ಮತ್ತು ಅಪ್ರಾಪ್ತ ವಯಸ್ಸಿನ ಬಾಲಕಿಯರ ವಿವಾಹ ನಡೆಸಿದ ಪ್ರಕರಣಗಳು ದಾಖಲಾಗಿವೆ.
ಈ ಪ್ರಕರಣ ಸಂಬಂಧ ಕರಾಚಿ ಮ್ಯಾಜಿಸ್ಟ್ರೇಟ್‌ ನ್ಯಾಯಾಲಯವು ಕಾಜಿ ಮುಫ್ತಿ ಅಹಮೆದ್ ವಿರುದ್ಧ ಜಾಮೀನು ರಹಿತ ವಾರೆಂಟ್ ಜಾರಿಗೊಳಿಸಿದೆ. ಆರೋಪಿ ಕಾಜಿ ಮುಫ್ತಿ ಅಹಮೆದ್ ಅವರನ್ನು ನ.16 ರಂದು ನ್ಯಾಯಾಲಯಕ್ಕೆ ಹಾಜರಿಪಡಿಸುವಂತೆ ಆದೇಶಿಸಿದೆ.
