ಶ್ರೀಲಂಕಾ: ವಾರದ ಲೆಕ್ಕದಲ್ಲಿ ಇಂಧನ ಪಡಿತರ ಘೋಷಣೆ

ಜುಲೈ ಮೊದಲ ವಾರದಿಂದ ಇದು ಜಾರಿಗೆ ಬರಲಿದೆ.ವಾಹನಗಳ ಮಾಲೀಕರಿಗೆ ವಾರಕ್ಕೆ ಎಷ್ಟು ಪ್ರಮಾಣದ ಇಂಧನ ಖರೀದಿಗೆ ಅವಕಾಶ ನೀಡಲಾಗುತ್ತದೆ ಎಂಬ ಮಾಹಿತಿಯನ್ನು ಸರ್ಕಾರ ಬಹಿರಂಗಪಡಿಸಿಲ್ಲ.

‘ಸರ್ಕಾರಿ ಸ್ವಾಮ್ಯದ ಗೆಯ್‌ಲಾನ್ ಪೆಟ್ರೋಲಿಯಂ ಕಾರ್ಪೊರೇಷನ್ ಇಂಧನ ಆಮದಿಗೆ ಅಗತ್ಯವಿರುವ ಹಣಕಾಸಿನ ಸಮಸ್ಯೆ ಎದುರಿಸುತ್ತಿದೆ. ಹಣಕಾಸಿನ ಪರಿಸ್ಥಿತಿ ಬಲಪಡಿಸುವವರೆಗೆ ನಮ್ಮಲ್ಲಿ ಅನ್ಯ ಆಯ್ಕೆಗಳೇ ಇಲ್ಲ. ಆದರೆ, ಗ್ರಾಹಕರ ಹೆಸರುಗಳನ್ನು ನೋಂದಾಯಿಸಿಕೊಂಡು, ವಾರದಲ್ಲಿ ಇಂತಿಷ್ಟು ಪ್ರಮಾಣದ ಇಂಧನ ಖಾತ್ರಿ ನೀಡಲಾಗುತ್ತದೆ’ ಎಂದುಇಂಧನ ಸಚಿವ ಕಾಂಚನಾ ವಿಜೆಸೇಕೆರಾ ತಿಳಿಸಿದ್ದಾರೆ.

ದೇಶದಲ್ಲಿ ವಿದ್ಯುತ್ ಮತ್ತು ಎಲ್‌ಪಿಜಿ ಅನಿಲದ ಕೊರತೆಯೂ ಅಧಿಕವಾಗಿದೆ. ಹೀಗಾಗಿ ಪೆಟ್ರೋಲ್‌ ಬಂಕ್‌ಗಳಿಗೆ ಜನರು ಅಧಿಕವಾಗಿ ಬರತೊಡಗಿದ್ದು, ಮೈಲುದ್ದಕ್ಕೆ ವಾಹನಗಳು, ಕ್ಯಾನ್‌ ಹಿಡಿದುಕೊಂಡ ಜನರು ಸರದಿಯಲ್ಲಿ ನಿಲ್ಲುವಂತಾಗಿದೆ. ಏಪ್ರಿಲ್ ತಿಂಗಳ ಮಧ್ಯಭಾಗದಿಂದೀಚೆಗೆ ಪೆಟ್ರೋಲ್‌ ಬಂಕ್‌ಗಳಲ್ಲಿ ದ್ವಿಚಕ್ರ ವಾಹನಗಳಿಗೆ ಗರಿಷ್ಠ 4 ಲೀಟರ್‌, ತ್ರಿಚಕ್ರ ವಾಹನಗಳಿಗೆ 5 ಲೀಟರ್‌, ಕಾರು/ ಎಸ್‌ಯುವಿಗಳಿಗೆ 19.5 ಲೀಟರ್ ಇಂಧನ ನೀಡುವ ವ್ಯವಸ್ಥೆ ಜಾರಿಗೆ ಬಂದಿದೆ. ಆದರೆ ಗ್ರಾಹಕರು ಮತ್ತೆ ಮತ್ತೆ ಬಂಕ್‌ಗಳಿಗೆ ಬಂದು ಇಂಧನ ಸಂಗ್ರಹಿಸಿ ಇಡಲು ಮುಂದಾಗಿದ್ದರು. ಈ ಅವ್ಯವಸ್ಥೆಯನ್ನು ತಡೆಗಟ್ಟುವ ಸಲುವಾಗಿ ಈ ಪಡಿತರ ವ್ಯವಸ್ಥೆಯನ್ನು ಜಾರಿಗೆ ತರಲಾಗಿದೆ.