ನೆರೆ ದೇಶಗಳಿಗೆ ಮುಂದುವರಿದ ಚೀನಾ ಬೆದರಿಕೆ: ಪೆಂಟಗನ್

ಪೆಂಟಗನ್ ಪತ್ರಿಕಾ ಕಾರ್ಯದರ್ಶಿ ಜಾನ್ ಕಿರ್ಬಿ ಅವರು ಸೋಮವಾರ ಸುದ್ದಿಗೋಷ್ಠಿಯಲ್ಲಿ ಈ ಕುರಿತು ಮಾತನಾಡಿದರು.

‘ಚೀನಾದ ಈ ವರ್ತನೆಯು ಇಂಡೊ– ಪೆಸಿಫಿಕ್‌ನ ಮುಕ್ತ ವಾತಾವರಣಕ್ಕೆ ಪೂರಕವಾಗಿರುತ್ತದೆ ಎಂದು ನಾವು ಭಾವಿಸುವುದಿಲ್ಲ’ ಎಂದು ಅವರು ಹೇಳಿದರು.

ಈ ಪ್ರದೇಶದಲ್ಲಿ ಎದುರಾಗಬಹುದಾದ ಭದ್ರತಾ ಸವಾಲುಗಳನ್ನು ಎದುರಿಸಲು, ತನ್ನ ಮೈತ್ರಿ ರಾಷ್ಟ್ರಗಳು ಮತ್ತು ಪಾಲುದಾರರು ರಕ್ಷಣಾ ಸಾಮರ್ಥ್ಯವನ್ನು ಹೊಂದಿದ್ದಾರೆ. ಈ ನಿಟ್ಟಿನಲ್ಲಿ ಬೈಡನ್‌ ಆಡಳಿತ ಶ್ರಮಿಸುತ್ತಿದೆ ಎಂದರು.

‘ಭಾರತ- ಚೀನಾ ಗಡಿಯಲ್ಲಿನ ಉದ್ವಿಗ್ನತೆಯ ಬಗ್ಗೆ ಅಮೆರಿಕ ಖಂಡಿತವಾಗಿಯೂ ಗಮನಹರಿಸುತ್ತದೆ’ ಎಂದು ಅವರು ಇದೇ ವೇಳೆ ಪ್ರಶ್ನೆಯೊಂದಕ್ಕೆ ಉತ್ತರಿಸಿದರು.

‘ಎರಡೂ ದೇಶಗಳ ನಡುವೆ ಹಿಂದಿಗಿಂತ ಹೆಚ್ಚು ಉದ್ವಿಗ್ನತೆ ಅಥವಾ ಹೆಚ್ಚು ಹಿಂಸಾತ್ಮಕವಾಗಿ ಇರುವುದನ್ನು ಯಾರೂ ನೋಡ ಬಯಸುವುದಿಲ್ಲ. ಭಾರತೀಯ ಅಧಿಕಾರಿಗಳು ಈ ಉದ್ವಿಗ್ನ ಪರಿಸ್ಥಿತಿಯನ್ನು ಹೇಗೆ ನಿಭಾಯಿಸುತ್ತಿದ್ದಾರೆ ಎಂಬುದನ್ನು ತಿಳಿದುಕೊಳ್ಳಲು ಬಯಸುತ್ತೇನೆ. ಈ ನಿಟ್ಟಿನಲ್ಲಿ ಸಂಬಂಧಿಸಿದವರ ಜತೆಗೆ ಮಾತುಕತೆ ನಡೆಸುತ್ತೇನೆ’ ಎಂದು ಅವರು ಪ್ರತಿಕ್ರಿಯಿಸಿದರು.