ಹಾರ್ಕಿವ್: ಉಕ್ರೇನ್ ಮೇಲೆ ರಷ್ಯಾ ಆಕ್ರಮಣ ಶುರುವಾಗಿ ಇಂದಿಗೆ 7 ದಿನಗಳಾಗಿದ್ದು, ಬುಧವಾರ ಮುಂಜಾನೆ ಪೂರ್ವ ಉಕ್ರೇನ್‌ನ ನಗರವಾದ ಹಾರ್ಕಿವ್‌ನಲ್ಲಿ ನಡೆಸಿದ ಶೆಲ್ ದಾಳಿಯಲ್ಲಿ ನಾಲ್ವರು ಸಾವಿಗೀಡಾಗಿದ್ದಾರೆ ಮತ್ತು ಒಂಬತ್ತು ಮಂದಿ ಗಾಯಗೊಂಡಿದ್ದಾರೆ ಎಂದು ಉಕ್ರೇನ್ ಸರ್ಕಾರ ತಿಳಿಸಿದೆ.
ಪ್ರಾಥಮಿಕ ಮಾಹಿತಿಯನ್ನು ಉಲ್ಲೇಖಿಸಿ ತುರ್ತು ಸೇವೆ ವಿಭಾಗ ಮಾಹಿತಿ ನೀಡಿದ್ದು, ರಷ್ಯಾ ದಾಳಿಯಿಂದಾಗಿ ನಾಲ್ವರು ಮೃತಪಟ್ಟು, ಒಂಬತ್ತು ಜನರು ಗಾಯಗೊಂಡಿದ್ದಾರೆ' ಎಂದಿದೆ.
ಬಹುಸಂಖ್ಯಾತ ಜನರು ರಷ್ಯನ್ ಭಾಷೆಯನ್ನಾಡುವ ಜನರಿರುವ ರಷ್ಯಾದ ಗಡಿಯಲ್ಲಿರುವ ಹಾರ್ಕಿವ್‌ನಲ್ಲಿ 1.4 ಮಿಲಿಯನ್ ಜನಸಂಖ್ಯೆಯಿದೆ.
ರಷ್ಯಾ ಅಧ್ಯಕ್ಷ ವ್ಲಾಡಿಮಿರ್ ಪುಟಿನ್ ಸೇನಾ ಕಾರ್ಯಾಚರಣೆಗೆ ಆದೇಶ ನೀಡಿದಂದಿನಿಂದಲೂ ಈ ನಗರವನ್ನು ಗುರಿಯಾಗಿಸಿಕೊಂಡಿರುವ ರಷ್ಯಾ ಸೇನೆ, ಭೀಕರ ದಾಳಿ ನಡೆಸುತ್ತಲೇ ಬಂದಿದೆ.
'ರಷ್ಯಾದ ವಾಯು ಪಡೆಗಳು ಹಾರ್ಕಿವ್‌ನಲ್ಲಿ ಬಂದಿಳಿದವು. ಬಳಿಕ ಸ್ಥಳೀಯ ಆಸ್ಪತ್ರೆ ಮೇಲೆ ದಾಳಿ ಮಾಡಿದೆ. ಸದ್ಯ ಆಕ್ರಮಣಕಾರರು ಮತ್ತು ಉಕ್ರೇನಿಯನ್ನರ ನಡುವೆ ಹೋರಾಟ ನಡೆಯುತ್ತಿದೆ' ಎಂದು ಟೆಲಿಗ್ರಾಮ್‌ನಲ್ಲಿ ಕಳುಹಿಸಿದ ಸೇನೆಯು ಹೇಳಿಕೆಯಲ್ಲಿ ತಿಳಿಸಿದೆ.
