ಪ್ಯಾರಿಸ್‌: ಫ್ರಾನ್ಸ್‌ನಲ್ಲಿ ಕೋವಿಡ್‌ ಪ್ರಕರಣಗಳು ಹೆಚ್ಚುತ್ತಿವೆ. ಹೀಗಾಗಿ ದೇಶದಲ್ಲಿ ಮತ್ತೊಂದು ಲಾಕ್‌ಡೌನ್‌ ಹೇರುವುದನ್ನು ತಪ್ಪಿಸಬೇಕಿದೆ ಎಂದು ಹೇಳಿರುವ ಸರ್ಕಾರ, ಮುಂಬರುವ ರಜಾಕಾಲ, ಹಬ್ಬಗಳಿಗೂ ಮುನ್ನ ಎಲ್ಲರೂ ಲಸಿಕೆ ಹಾಕಿಸಿಕೊಳ್ಳುವಂತೆ ಜನರನ್ನು ಒತ್ತಾಯಿಸಿದೆ.
‘ದೇಶದಲ್ಲಿ ಕೋವಿಡ್‌ ಪಿಡುಗಿನ ಐದನೇ ಅಲೆ ಇದ್ದು, ತೀವ್ರತೆಯೂ ಹೆಚ್ಚುತ್ತಿದೆ. ಮುಂದಿನ ತಿಂಗಳು ಕೊರೊನಾ ವೈರಸ್‌ನ ಓಮೈಕ್ರಾನ್‌ ತಳಿ ಸೋಂಕು ವೇಗವಾಗಿ ಹರಡುವ ಸಾಧ್ಯತೆಗಳಿವೆ’ ಎಂದು ಪ್ರಧಾನ ಮಂತ್ರಿ ಜೀನ್‌ ಕ್ಯಾಸ್ಟೆಕ್ಸ್‌ ಸುದ್ದಿಗೋಷ್ಠಿಯೊಂದರಲ್ಲಿ ಹೇಳಿದರು.
ಸೋಂಕು ಪ್ರಸರಣಕ್ಕೆ ಕಡಿವಾಣ ಹಾಕುವ ಕ್ರಮವಾಗಿ, ಸಾರ್ವಜನಿಕ ಸಭೆಗಳನ್ನು, ಹೊಸ ವರ್ಷಾಚರಣೆ, ಪಟಾಕಿ ಸಿಡಿಸುವುದನ್ನು, ದೊಡ್ಡ ಸಂಖ್ಯೆಯಲ್ಲಿ ಜನರು ಒಂದೆಡೆ ಸೇರುವುದನ್ನು ಸರ್ಕಾರ ನಿರ್ಬಂಧಿಸಿದೆ.
