ಸೋಲ್‌: ರಾಜಧಾನಿ ಪ್ಯಾಂಗ್ಯಾಂಗ್‌ನಲ್ಲಿ ನಡೆದ ಸೇನಾ ಪರೇಡ್‌ನಲ್ಲಿ ಉತ್ತರ ಕೊರಿಯಾದ ಸರ್ವಾಧಿಕಾರಿ ಕಿಮ್‌ ಜಾಂಗ್‌ ಉನ್‌, ತಮ್ಮ 10 ವರ್ಷದ ಮಗಳು ಕಿಮ್‌ ಜು ಎ ಜೊತೆಯಲ್ಲಿ ಭಾಗಿಯಾದರು.
ಐದನೇ ಬಾರಿಗೆ ಕಿಮ್‌ ಜು ಎ, ಸಾರ್ವಜನಿಕವಾಗಿ ಕಾಣಿಸಿಕೊಂಡಿದ್ದಾಳೆ. ಜೊತೆಗೆ ಆಕೆಯನ್ನು ದೇಶದಲ್ಲಿ ಗೌರವಿಸಲಾಗುತ್ತಿದೆ ಹಾಗೂ ಪ್ರೀತಿಯಿಂದ ಕಾಣಲಾಗುತ್ತಿದೆ. ಆದ್ದರಿಂದ, ತಂದೆಯ ನಂತರ ಮಗಳೇ ಉತ್ತರಾಧಿಕಾರಿ ಆಗಬಹುದೇನೋ ಎನ್ನುವ ಚರ್ಚೆಯನ್ನು ಇದು ಹುಟ್ಟುಹಾಕಿದೆ.
ಬುಧವಾರ ರಾತ್ರಿ ನಡೆದ ಸೇನಾ ಪರೇಡ್‌ನಲ್ಲಿ ಸೇನೆ ಹೊಸದಾಗಿ ಸೇರ್ಪಡೆಯಾದ ಹೊಸ ಖಂಡಾಂತರ ಕ್ಷಿಪಣಿಯನ್ನು ಪ್ರದರ್ಶಿಸಲಾಗಿದೆ. ಈ ಕ್ಷಿಪಣಿಯ ಪರೀಕ್ಷೆಯನ್ನು ಮುಂಬರುವ ತಿಂಗಳಿನಲ್ಲಿ ಮಾಡುವ ಸಾಧ್ಯತೆ ಇದೆ ಎಂದು ತಜ್ಞರು ನಿರೀಕ್ಷಿಸಿದ್ದಾರೆ.
ನೆರೆಯ ರಾಷ್ಟ್ರಗಳು ಹಾಗೂ ಅಮೆರಿಕದೊಂದಿಗೆ ಹಳಸುತ್ತಿರುವ ಸಂಬಂಧದ ಕಾರಣ, ಉತ್ತರ ಕೊರಿಯಾವು ಇರುವ ಸೀಮಿತ ಸಂಪನ್ಮೂಲಗಳೊಂದಿಗೇ ತನ್ನ ಸೇನಾ ಬಲವನ್ನು ಹೆಚ್ಚಿಸಿಕೊಳ್ಳುತ್ತಿದೆ ಎನ್ನಲಾಗಿದೆ.
