ಲಂಡನ್: ವಿವಿಧ ಲಸಿಕೆಗಳ ಕುರಿತು ಸಂಶೋಧನೆ ಕೈಗೊಳ್ಳುವ ಸಂಬಂಧ ಭಾರತದ ಸೀರಂ ಲೈಫ್ ಸೈನ್ಸಸ್‌ ಸಂಸ್ಥೆಯ ಆರ್ಥಿಕ ನೆರವಿನೊಂದಿಗೆ ಇಲ್ಲಿ ‘ಪೂನಾವಾಲಾ ವ್ಯಾಕ್ಸಿನ್ಸ್ ರಿಸರ್ಚ್ ಬಿಲ್ಡಿಂಗ್‌’ ಎಂಬ ನೂತನ ಕೇಂದ್ರವನ್ನು ಸ್ಥಾಪಿಸಲಾಗುವುದು ಎಂದು ಆಕ್ಸ್‌ಫರ್ಡ್‌ ವಿಶ್ವವಿದ್ಯಾಲಯ ಘೋಷಿಸಿದೆ.
‘ವಿಶ್ವವಿದ್ಯಾಲಯದ ಓಲ್ಡ್‌ ರೋಡ್ ಕ್ಯಾಂಪಸ್‌ನಲ್ಲಿ ಈ ಕೇಂದ್ರವನ್ನು ಸ್ಥಾಪಿಸಲಾಗುವುದು. 300ಕ್ಕೂ ಅಧಿಕ ವಿಜ್ಞಾನಿಗಳು ಸಂಶೋಧನೆ–ಅಧ್ಯಯನ ನಡೆಸಲು ಬೇಕಾದ ಸೌಲಭ್ಯಗಳು ಈ ಕೇಂದ್ರದಲ್ಲಿ ಇರಲಿವೆ. ಈ ಯೋಜನೆಗೆ ಸೀರಂ ಲೈಫ್ ಸೈನ್ಸಸ್‌ ₹ 505 ಕೋಟಿ (50 ಮಿಲಿಯನ್‌ ಪೌಂಡ್) ನೆರವು ನೀಡಲಿದೆ’ ಎಂದು ವಿಶ್ವವಿದ್ಯಾಲಯ ತಿಳಿಸಿದೆ.
ಸೀರಂ ಲೈಫ್ ಸೈನ್ಸಸ್‌ ಸಂಸ್ಥೆ ಅದಾರ್‌ ಪೂನಾವಾಲಾ ಕುಟುಂಬದ ಒಡೆತನದಲ್ಲಿದೆ. ಸೀರಂ ಇನ್ಸ್‌ಟಿಟ್ಯೂಟ್‌ ಆಫ್ ಇಂಡಿಯಾ (ಎಸ್‌ಐಐ) ಕೂಡ ಇದೇ ಕುಟುಂಬಕ್ಕೆ ಸೇರಿದ್ದು.
‘ಲಸಿಕೆಗಳ ಕುರಿತು ಸಂಶೋಧನೆ ಕೈಗೊಳ್ಳಲು ಈ ಉದಾರ ಕೊಡುಗೆ ಲಭಿಸಿರುವುದಕ್ಕೆ ನನಗೆ ಸಂತಸವಾಗಿದೆ. ಜಾಗತಿಕವಾಗಿ ಅಗತ್ಯವಿರುವ ಲಸಿಕೆಗಳ ಅಭಿವೃದ್ಧಿಗೆ ಶ್ರಮಿಸಲು ಇದರಿಂದ ನಮಗೆ ಮತ್ತಷ್ಟು ಶಕ್ತಿ ಸಿಗಲಿದೆ’ ಎಂದು ವಿಶ್ವವಿದ್ಯಾಲಯದ ಕುಲಪತಿ ಲೂಯಿಸ್ ರಿಚರ್ಡಸನ್ ಪ್ರತಿಕ್ರಿಯಿಸಿದ್ದಾರೆ.
ಆಕ್ಸ್‌ಫರ್ಡ್‌ ವಿಶ್ವವಿದ್ಯಾಲಯದ ಸಹಭಾಗಿತ್ವದಲ್ಲಿ ಅಭಿವೃದ್ಧಿಪಡಿಸಲಾಗಿರುವ ಕೋವಿಡ್‌ ಲಸಿಕೆ ಕೋವಿಶೀಲ್ಡ್‌ ಅನ್ನು ಪುಣೆಯಲ್ಲಿರುವ ಸಿಐಐ ಉತ್ಪಾದಿಸುತ್ತಿದೆ.
