ಇಸ್ಲಾಮಾಬಾದ್: ತೀವ್ರ ಆರ್ಥಿಕ ಸಂಕಷ್ಟಕ್ಕೆ ಸಿಲುಕಿರುವ ಪಾಕಿಸ್ತಾನದಲ್ಲಿ, ಖರ್ಚು ಕಡಿಮೆ ಮಾಡಲು ಸರ್ಕಾರ ವಿವಿಧ ಕ್ರಮಗಳನ್ನು ಕೈಗೊಂಡಿದ್ದು, ಇದೀಗ ಸರ್ಕಾರಿ ನೌಕರರ ವೇತನವನ್ನು ಶೇ 10 ರಷ್ಟು ಕಡಿತಗೊಳಿಸಲು ಮುಂದಾಗಿದೆ.
ಪ್ರಧಾನಿ ಶಹಬಾಜ್ ಷರೀಫ್‌ ರಚನೆ ಮಾಡಿದ ರಾಷ್ಟ್ರೀಯ ಮಿತವ್ಯಯ ಸಮಿತಿ ಈ ನಿರ್ಧಾರ ಮಾಡಿದೆ. ಇದರ ಜತೆಗೆ ಸಚಿವಾಲಯಗಳ ಖರ್ಚನ್ನು ಶೇ 15 ರಷ್ಟು ಕಡಿಮೆ ಮಾಡಬೇಕು ಎಂದೂ ಶಿಫಾರಸು ಮಾಡಿದೆ.
ಜತೆಗೆ ಸಚಿವರು, ರಾಜ್ಯ ಖಾತೆ ಸಚಿವರು ಹಾಗೂ ಸಲಹೆಗಾರರ ಸಂಖ್ಯೆಯನ್ನು 78 ರಿಂದ 30ಕ್ಕೆ ಇಳಿಸಿ ಎಂದೂ ಸಮಿತಿ ಹೇಳಿದೆ.
ಈ ವರದಿ ಪ್ರಧಾನಿ ಶಹಬಾಜ್ ಅವರಿಗೆ ಕಳುಹಿಸಲಾಗುತ್ತದೆ. ಅಂತಿಮ ನಿರ್ಧಾರ ಅವರು ಮಾಡಲಿದ್ದಾರೆ.
