ಮಾಸ್ಕೋ: ಪಾಶ್ಚಾತ್ಯ ಶಕ್ತಿಗಳು ರಷ್ಯಾದ ಭದ್ರತೆಗೆ ಬೆದರಿಕೆಯೊಡ್ಡಲು ಉಕ್ರೇನ್ ಅನ್ನು ಸಾಧನವಾಗಿ ಬಳಸಿಕೊಳ್ಳುತ್ತಿವೆ ಎಂದು ವ್ಲಾಡಿಮಿರ್‌ ಪುಟಿನ್‌ ಸೋಮವಾರ ಹೇಳಿದ್ದಾರೆ.
ರಷ್ಯಾ ಅಧ್ಯಕ್ಷ ವ್ಲಾಡಿಮಿರ್‌ ಪುಟಿನ್‌ ಅವರು ಸೋಮವಾರ ರಾಷ್ಟ್ರೀಯ ಭದ್ರತಾ ಮಂಡಳಿ ಸಭೆ ನಡೆಸಿದರು. ಈ ವೇಳೆ ಅವರು ತಮ್ಮ ಅಭಿಪ್ರಾಯಗಳನ್ನು ಪ್ರಕಟಿಸಿದ್ದಾರೆ.
ಉಕ್ರೇನ್‌ನ ಬಂಡುಕೋರರ ಹಿಡಿತದಲ್ಲಿರುವ ಎರಡು ಪ್ರದೇಶಗಳನ್ನು ಸ್ವತಂತ್ರ ಎಂದು ಪರಿಗಣಿಸುವ ನಿಟ್ಟಿನಲ್ಲಿ ಚಿಂತನೆ ನಡೆಸುವುದಾಗಿಯೂ ಪುಟಿನ್‌ ಇದೇ ವೇಳೆ ಪ್ರಕಟಿಸಿದರು.
ಪೂರ್ವ ಉಕ್ರೇನ್‌ನ ಡೊನೆಟ್‌ಸ್ಕ್‌ ಮತ್ತು ಲುಗಾನ್‌ಸ್ಕ್‌ನ ಪ್ರತ್ಯೇಕತಾವಾದಿ ಪ್ರದೇಶಗಳನ್ನು ಬಹಿರಂಗವಾಗಿ ಬೆಂಬಲಿಸುವ ರಷ್ಯಾ ನಿರ್ಧಾರವು ಪರಿಸ್ಥಿತಿಯನ್ನು ಮತ್ತಷ್ಟು ಕಗ್ಗಂಟಾಗಿಸುವ ಸಾಧ್ಯತೆಗಳಿವೆ.
‘ರಷ್ಯಾಕ್ಕೆ ಮುಖಾಮುಖಿಯಾಗಲು ಉಕ್ರೇನ್ ಅನ್ನು ಸಾಧನ್ನವನ್ನಾಗಿ ಬಳಸುವುದು ನಮಗೆ ಗಂಭೀರವಾದ, ದೊಡ್ಡ ಬೆದರಿಕೆಯನ್ನು ಒಡ್ಡುತ್ತದೆ. ರಷ್ಯಾದ ಮೊದಲ ಆದ್ಯತೆ ಘರ್ಷಣೆಯಲ್ಲ, ಭದ್ರತೆ’ ಎಂದು ಪುಟಿನ್‌ ಹೇಳಿದರು.
ಆದರೂ, ಉಕ್ರೇನ್ ಮತ್ತು ಅಮೆರಿಕ ಈಗ ಮುಖಾಮುಖಿಯಾಗಲು ನಿರೀಕ್ಷಿಸುತ್ತಿವೆ ಎಂದು ಅವರು ಹೇಳಿದರು.
