ಮಾಸ್ಕೊ: ‘ಡೇಟಾ’ ಸಂಗ್ರಹ ಕಾನೂನು ಉಲ್ಲಂಘಿಸಿದ ಆರೋಪಕ್ಕಾಗಿ ಫೇಸ್ಬುಕ್, ಟ್ವಿಟರ್ ಮತ್ತು ವಾಟ್ಸ್ಆ್ಯಪ್ಗೆ ರಷ್ಯಾ ದಂಡ ವಿಧಿಸಿದೆ.
ಸ್ಥಳೀಯ ಸರ್ವರ್ನಲ್ಲಿ ಬಳಕೆದಾರರ ‘ಡೇಟಾ’ ಸಂಗ್ರಹಿಸಲು ವಿಫಲವಾಗಿರುವುದರಿಂದ ಈ ಕ್ರಮಕೈಗೊಳ್ಳಲಾಗಿದೆ.
ಫೇಸ್ಬುಕ್ಗೆ 1.5 ಕೋಟಿ ರೂಬಲ್ (₹1.49 ಕೋಟಿ), ಟ್ವಿಟರ್ಗೆ 1.7 ಕೋಟಿ ರೂಬಲ್ (₹1.69 ಕೋಟಿ) ಮತ್ತು 40 ಲಕ್ಷ ರೂಬಲ್ (₹39.83 ಲಕ್ಷ) ದಂಡ ವಿಧಿಸಲಾಗಿದೆ. ಮಾಸ್ಕೊದ ಟಾಗನ್ಸ್ಕಿ ಜಿಲ್ಲಾ ನ್ಯಾಯಾಲಯ ಈ ದಂಡ ವಿಧಿಸಿದೆ.
2014ರಲ್ಲಿ ಈ ಕಾನೂನು ಜಾರಿಗೊಳಿಸಲಾಗಿತ್ತು. ರಷ್ಯಾದ ಬಳಕೆದಾರರ ವೈಯಕ್ತಿಕ ‘ಡೇಟಾ’ ಅನ್ನು ಸ್ಥಳೀಯ ಸರ್ವರ್ಗಳಲ್ಲಿ ಸಂಗ್ರಹಿಸಿಡುವುದನ್ನು ಈ ಕಾನೂನಿನ ಅನ್ವಯ ಕಡ್ಡಾಯಗೊಳಿಸಲಾಗಿದೆ.
ದೇಶದ ಕಾನೂನುಗಳನ್ನು ಪಾಶ್ಚಿಮಾತ್ಯ ಸಾಮಾಜಿಕ ಮಾಧ್ಯಮಗಳು ಉಲ್ಲಂಘಿಸುತ್ತಿವೆ ಎಂದು ರಷ್ಯಾ ಅಧ್ಯಕ್ಷ ವ್ಲಾದಿಮಿರ್ ಪುಟಿನ್ ಅವರು ಇತ್ತೀಚೆಗೆ ದೂರಿದ್ದರು. ಈ ಹೇಳಿಕೆ ಬೆನ್ನಲ್ಲೇ ದಂಡ ವಿಧಿಸುವ ಕ್ರಮಕೈಗೊಳ್ಳಲಾಗಿದೆ.
ಕಾನೂನು ಉಲ್ಲಂಘಿಸಿದ್ದ ಆರೋಪಕ್ಕಾಗಿ ಟ್ವಿಟರ್ ಮತ್ತು ಫೇಸ್ಬುಕ್ಗೆ ಕಳೆದ ವರ್ಷವೂ ದಂಡ ವಿಧಿಸಲಾಗಿತ್ತು.