ಮೆಲ್ಬರ್ನ್: ಭಾರತದಲ್ಲಿನ ನೂತನ ಕೃಷಿ ಕಾಯ್ದೆಗಳಿಗೆ ಸಂಬಂಧಿಸಿದಂತೆ ಆಸ್ಟ್ರೇಲಿಯಾದಲ್ಲಿರುವ ಭಾರತೀಯರ ನಡುವೆ ಸಂಘರ್ಷ ಆರಂಭಗೊಂಡಿದ್ದು, ಸಿಖ್ಖರ ಗುಂಪೊಂದರ ಮೇಲೆ ಗುಂಪೊಂದು ಹಲ್ಲೆ ನಡೆಸಿದೆ ಎಂದು ಮಾಧ್ಯಮವೊಂದು ವರದಿ ಮಾಡಿದೆ.
‘ಸಿಡ್ನಿಯ ಹ್ಯಾರಿಸ್‌ ಪಾರ್ಕ್‌ನಲ್ಲಿ ಅಪರಿಚಿತರ ಗುಂಪೊಂದು ಸುತ್ತಿಗೆ, ಬೇಸ್‌ಬಾಲ್‌ ಬ್ಯಾಟ್‌ ಹಾಗೂ ಬಡಿಗೆಗಳಿಂದ ನಮ್ಮ ಕಾರಿನ ಮೇಲೆ ದಾಳಿ ನಡೆಸಿತು’ ಎಂದು ದಾಳಿಗೆ ಒಳಗಾದ ವ್ಯಕ್ತಿಯೊಬ್ಬರ ಹೇಳಿಕೆಯನ್ನು ಉಲ್ಲೇಖಿಸಿ ‘7ನ್ಯೂಸ್‌’ ಎಂಬ ಸುದ್ದಿವಾಹಿನಿ ವರದಿ ಮಾಡಿದೆ.
‘ಎಲ್ಲ ಕಡೆಗಳಿಂದಲೂ ನಮ್ಮ ಕಾರನ್ನು ಸುತ್ತುವರಿದ ದಾಳಿಕೋರರು, ಕಾರಿನ ಗಾಜುಗಳನ್ನು ಒಡೆದು ಹಾಕಿದರು. ಆ ಗುಂಪು ನಮ್ಮ ಪೈಕಿ ಒಬ್ಬರನ್ನಾದರೂ ಹತ್ಯೆ ಮಾಡುವ ಸಾಧ್ಯತೆ ಇತ್ತು.ತಪ್ಪಿಸಿಕೊಂಡು ಓಡಿದರೂ, ಗುಂಪು ನಮ್ಮನ್ನು ಬೆನ್ನಟ್ಟಿ ಹಲ್ಲೆ ನಡೆಸಿತು’ ಎಂದು ದಾಳಿಗೊಳಗಾದ ಮತ್ತೊಬ್ಬ ವ್ಯಕ್ತಿ ಹೇಳಿದ್ದಾಗಿ ಸುದ್ದಿವಾಹಿನಿ ವರದಿ ಮಾಡಿದೆ.
‘ಈ ವಿಷಯವನ್ನು ಅಧಿಕಾರಿಗಳು ಗಂಭೀರವಾಗಿ ಪರಿಗಣಿಸಿದ್ದಾರೆ. ದಾಳಿ ಮಾಡಿದವರನ್ನು ಗಡಿಪಾರು ಮಾಡುವ ಸಾಧ್ಯತೆ ಬಗ್ಗೆಯೂ ಪೊಲೀಸರು ಚಿಂತನೆ ನಡೆಸಿದ್ದಾರೆ’ ಎಂದೂ ವರದಿ ಮಾಡಿದೆ.
