ಮಂಗಳವಾರ, ಜನವರಿ 26, 2021
16 °C
ರುಬೈಯಾ ಸಯೀದ್‌ ಅಪಹರಣ ಪ್ರಕರಣ

ಯಾಸಿನ್‌ ಮಲ್ಲಿಕ್‌ ಸೇರಿ 10 ಮಂದಿ ವಿರುದ್ಧ ದೋಷಾರೋಪ ನಿಗದಿ

ಪಿಟಿಐ Updated:

ಅಕ್ಷರ ಗಾತ್ರ : | |

Prajavani

ಜಮ್ಮು:  ಮಾಜಿ ಗೃಹ ಸಚಿವ ಮುಫ್ತಿ ಮೊಹಮದ್‌ ಸಯೀದ್‌ ಅವರ ಮಗಳು ರುಬೈಯಾ ಸಯೀದ್‌ ಅಪಹರಣ ಪ್ರಕರಣಕ್ಕೆ ಸಂಬಂಧಿಸಿದಂತೆ ಜೆಕೆಎಲ್‌ಎಫ್‌ ಮುಖ್ಯಸ್ಥ ಯಾಸಿನ್‌ ಮಲ್ಲಿಕ್‌ ಸೇರಿದಂತೆ 10 ಮಂದಿಯ ವಿರುದ್ಧ ಟಾಡಾ (ಟಿಎಡಿಎ) ವಿಶೇಷ ನ್ಯಾಯಾಲಯವು ಸೋಮವಾರ ದೋಷಾರೋಪ ನಿಗದಿ ಮಾಡಿದೆ.

ಉಗ್ರರಿಗೆ ಆರ್ಥಿಕ ನೆರವು ನೀಡಿದ ಪ್ರಕರಣಕ್ಕೆ ಸಂಬಂಧಿಸಿದಂತೆ ರಾಷ್ಟ್ರೀಯ ತನಿಖಾ ದಳವು (ಎನ್‌ಐಎ) 2019ರಲ್ಲಿ ಯಾಸಿನ್‌ ಮಲ್ಲಿಕ್‌ನನ್ನು ಬಂಧಿಸಿತ್ತು. ಸದ್ಯ ಮಲ್ಲಿಕ್‌ ತಿಹಾರ್‌ ಜೈಲಿನಲ್ಲಿ ಇದ್ದಾನೆ.

1990ರ ಜನವರಿಯಲ್ಲಿ ಐಎಎಫ್‌ ಸಿಬ್ಬಂದಿ ಹತ್ಯೆ ಪ್ರಕರಣದಡಿ ಈ ಹಿಂದೆ  ಕೂಡ ಟಾಡಾ ವಿಶೇಷ ನ್ಯಾಯಾಲಯವು ಯಾಸಿನ್‌ ಮಲ್ಲಿಕ್‌ ಮತ್ತು ಆರು ಮಂದಿಯ ವಿರುದ್ಧ ಆರೋಪ ನಿಗದಿ ಮಾಡಿತ್ತು.

ಇದೀಗ ವಿಶೇಷ ನ್ಯಾಯಾಲಯದ ನ್ಯಾಯಧೀಶ ಸುನಿಲ್‌ ಗುಪ್ತ ಅವರು ರುಬೈಯಾ ಸಯೀದ್‌ ಅಪಹರಣ  ಪ್ರಕರಣದಡಿ ಯಾಸಿನ್‌ ಮಲ್ಲಿಕ್‌, ಅಲಿ ಮೊಹಮ್ಮದ್ ಮಿರ್, ಮೊಹಮ್ಮದ್ ಜಮಾನ್ ಮಿರ್, ಇಕ್ಬಾಲ್ ಅಹ್ಮದ್ ಗಂಡ್ರೂ, ಜಾವೇದ್ ಅಹ್ಮದ್ ಮಿರ್, ಮೊಹಮ್ಮದ್ ರಫೀಕ್ ಪಹ್ಲೂ, ಮಂಜೂರ್ ಅಹ್ಮದ್ ಸೋಫಿ, ವಜಾಹತ್ ಬಶೀರ್, ಮೆಹರಾಜ್-ಉದ್-ದಿನ್ ಶೇಖ್ ಮತ್ತು ಶೋಕತ್ ಅಹ್ಮದ್ ಬಕ್ಷಿ ವಿರುದ್ಧ ಆರೋಪ ನಿಗದಿ ಮಾಡಿದ್ದಾರೆ.

ಡಿಸೆಂಬರ್‌ 1989ರಲ್ಲಿ ಅಂದಿನ ಕೇಂದ್ರ ಗೃಹ ಸಚಿವ ಮುಫ್ತಿ ಮೊಹಮ್ಮದ್ ಸಯೀದ್ ಅವರ ಪುತ್ರಿ ರುಬೈಯಾ ಸಯೀದ್ ಅವರನ್ನು ಶ್ರೀನಗರದಿಂದ ಜಿಕೆಎಲ್‌ಎಫ್‌ ಸದಸ್ಯರು ಅಪಹರಿಸಿದ್ದರು.

ಈ ಪ್ರಕರಣ ಸಂಬಂಧ ಸಿಬಿಐ 24 ಮಂದಿಯ ವಿರುದ್ಧ ಆರೋಪ ಪಟ್ಟಿ ಸಲ್ಲಿಸಿತ್ತು. ಇದರಲ್ಲಿ 10 ಮಂದಿಯ ವಿರುದ್ಧ  ವಿಶೇಷ ನ್ಯಾಯಾಲವು ಆರೋಪ ನಿಗದಿ ಮಾಡಿದೆ. 12 ಮಂದಿ ಪರಾರಿಯಾಗಿದ್ದಾರೆ.

ಪ್ರಜಾವಾಣಿ ಫೇಸ್‌ಬುಕ್ ಪುಟವನ್ನು ಲೈಕ್ ಮಾಡಿ, ಪ್ರಮುಖ ಸುದ್ದಿಗಳ ಅಪ್‌ಡೇಟ್ಸ್ ಪಡೆಯಿರಿ.

ಪ್ರಜಾವಾಣಿಯನ್ನು ಟ್ವಿಟರ್‌ನಲ್ಲಿ ಇಲ್ಲಿ ಫಾಲೋ ಮಾಡಿ.

ಟೆಲಿಗ್ರಾಂ ಮೂಲಕ ನಮ್ಮ ಸುದ್ದಿಗಳ ಅಪ್‌ಡೇಟ್ಸ್ ಪಡೆಯಲು ಇಲ್ಲಿ ಕ್ಲಿಕ್ ಮಾಡಿ.

ಈ ವಿಭಾಗದಿಂದ ಇನ್ನಷ್ಟು