ಕಾಬೂಲ್‌: ವಿದೇಶಿಯರಿಗೆ ಅಫ್ಗಾನಿಸ್ತಾನವನ್ನು ತೊರೆಯಲು ನೀಡಲಾಗಿರುವ ಗಡುವನ್ನು ಯಾವುದೇ ಕಾರಣಕ್ಕೂ ವಿಸ್ತರಿಸುವುದಿಲ್ಲ ಎಂದು ತಾಲಿಬಾನ್‌ ಸ್ಪಷ್ಟಪಡಿಸಿದೆ.
ಅಫ್ಗಾನಿಸ್ತಾನದಿಂದ ವಿದೇಶಿಗರನ್ನು ತೆರವುಗೊಳಿಸುವ ಕಾರ್ಯ ಭರದಿಂದ ಸಾಗಿರುವ ನಡುವೆ ಕಾಬೂಲ್‌ನ ಹಮೀದ್‌ ಕರ್ಜೈ ವಿಮಾನ ನಿಲ್ದಾಣದಲ್ಲಿ ಇಸ್ಲಾಮಿಕ್‌ ಸ್ಟೇಟ್‌ ಉಗ್ರರು ನಡೆಸಿದ ಆತ್ಮಾಹುತಿ ಬಾಂಬ್‌ ದಾಳಿಯಿಂದ ಬಿಗುವಿನ ಸನ್ನಿವೇಶಕ್ಕೆ ನಿರ್ಮಾಣವಾಗಿದೆ.
ದುರ್ಘಟನೆಯಲ್ಲಿ ಸುಮಾರು 70 ನಾಗರಿಕರು ಮೃತಪಟ್ಟಿದ್ದಾರೆ. ಈ ಪೈಕಿ ಅಮೆರಿಕ 13 ಯೋಧರು ಸೇರಿದ್ದಾರೆ. ಮೃತಪಟ್ಟವರ ಪೈಕಿ 28 ಮಂದಿ ನಮ್ಮವರೂ ಸೇರಿದ್ದಾರೆ ಎಂದು ತಾಲಿಬಾನ್‌ ಅಧಿಕಾರಿಯೊಬ್ಬರು ಮಾಹಿತಿ ನೀಡಿದ್ದಾರೆ.
ಕಾಬೂಲ್‌ನಲ್ಲಿ ಇಸ್ಲಾಮಿಕ್‌ ಸ್ಟೇಟ್‌ ಜಾಲದ ಅಸ್ತಿತ್ವದ ಬಗ್ಗೆ ತಾಲಿಬಾನ್‌ ನಾಯಕರು ತನಿಖೆ ನಡೆಸಬೇಕು. ಇಸ್ಲಾಮಿಕ್‌ ಸ್ಟೇಟ್‌ ಉಗ್ರರು ಇತ್ತೀಚಿನ ವಾರಗಳಲ್ಲಿ ಸಾವಿರಾರು ಬಂಧಿತರನ್ನು ಜೈಲಿನಿಂದ ಹೊರಗೆ ತಂದಿದ್ದಾರೆ. ಭದ್ರತೆಯು ತಾಲಿಬಾನಿಗಳ ಜವಾಬ್ದಾರಿಯಾಗಿದೆ ಎಂದು ನ್ಯಾಟೋ ರಾಯಭಾರಿ ತಿಳಿಸಿದ್ದಾರೆ.
ಆಗಸ್ಟ್ 14ರಿಂದ ಇದುವರೆಗೆ ಅಫ್ಗಾನಿಸ್ತಾನದಿಂದ 1 ಲಕ್ಷಕ್ಕೂ ಹೆಚ್ಚು ಮಂದಿಯನ್ನು ತೆರವುಗೊಳಿಸಲಾಗಿದೆ ಎಂದು ವೈಟ್‌ ಹೌಸ್‌ ತಿಳಿಸಿದೆ.
