ಸುರಕ್ಷಿತ ಚುನಾವಣೆ ಹೇಳಿಕೆ: ಅಧಿಕಾರಿ ಅಮಾನತುಗೊಳಿಸಿದ ಟ್ರಂಪ್
ವಾಷಿಂಗ್ಟನ್‌: ಇತ್ತೀಚೆಗೆ ನಡೆದ ಅಧ್ಯಕ್ಷೀಯ ಚುನಾವಣೆ ಅಮೆರಿಕದ ಇತಿಹಾಸದಲ್ಲೇ ಅತ್ಯಂತ ಸುರಕ್ಷಿತವಾದ ಚುನಾವಣೆ ಎಂದು ಹೇಳಿದ್ದ ಹೋಮ್‌ ಲ್ಯಾಂಡ್‌ ಸೆಕ್ಯುರಿಟಿ ವಿಭಾಗದ ಅಧಿಕಾರಿಯನ್ನು, ಅಧ್ಯಕ್ಷ ಡೊನಾಲ್ಡ್ ಟ್ರಂಪ್ ಅವರು ಅಮಾನತುಗೊಳಿಸಿದ್ದಾರೆ.
ಈ ಬಗ್ಗೆ ಮಂಗಳವಾರ ಟ್ವೀಟ್‌ ಮಾಡಿರುವ ಡೊನಾಲ್ಡ್ ಟ್ರಂಪ್,‘ಹೋಮ್‌ ಲ್ಯಾಂಡ್‌ ಭದ್ರತಾ ವಿಭಾಗದ ಸೈಬರ್ ಭದ್ರತೆ ಮತ್ತು ಮೂಲಸೌಲಭ್ಯ ಭದ್ರತಾ ಏಜೆನ್ಸಿ(ಸಿಐಎಸ್‌ಎ) ನಿರ್ದೇಶಕ ಕ್ರಿಸ್‌ ಕ್ರೆಬ್ಸ್ ಅವರನ್ನು ಅಧಿಕಾರದಿಂದ ಅಮಾನತು ಗೊಳಿಸಿದ್ದೇನೆ’ ಎಂದು ಹೇಳಿದ್ದಾರೆ.
The recent statement by Chris Krebs on the security of the 2020 Election was highly inaccurate, in that there were massive improprieties and fraud - including dead people voting, Poll Watchers not allowed into polling locations, “glitches” in the voting machines which changed...
— Donald J. Trump (@realDonaldTrump) November 18, 2020
‘2020ನೇ ಅಧ್ಯಕ್ಷೀಯ ಚುನಾವಣೆ ಬಗ್ಗೆ ಕ್ರಿಸ್‌ ಕ್ರೆಬ್ಸ್ ನೀಡಿದ ಹೇಳಿಕೆ ನಿಖರವಾಗಿಲ್ಲ. ಈ ಬಾರಿಯ ಅಧ್ಯಕ್ಷೀಯ ಚುನಾವಣೆಯಲ್ಲಿ ಸತ್ತವರ ಹೆಸರಲ್ಲಿ ಮತದಾನ, ಮತಗಟ್ಟೆಗಳಿಗೆ ವೀಕ್ಷಕರ ನೇಮಕಕ್ಕೆ ನಿರ್ಬಂಧ, ಮತ ಯಂತ್ರಗಳಲ್ಲಿ ತನಗೆ ಬರಬೇಕಾದ ಮತಗಳನ್ನು ಜೋ ಬೈಡನ್‌ಗೆ ವರ್ಗಾವಣೆಯಾಗುವಂತಹ ತಂತ್ರಗಳು ಸೇರಿದಂತೆ ಹಲವು ಅಕ್ರಮಗಳು ನಡೆದಿವೆ. ಈ ಕಾರಣಕ್ಕಾಗಿ ಕ್ರಿಸ್‌ ಕ್ರೆಬ್ಸ್ ಅವರನ್ನು ತಕ್ಷಣವೇ ಸಿಐಎಸ್‌ಎ ನಿರ್ದೇಶಕ ಸ್ಥಾನದಿಂದ ವಜಾಗೊಳಿಸಲಾಗಿದೆ‘’ ಎಂದು ಅವರು ಟ್ವಿಟರ್‌ನಲ್ಲಿ ದೂರಿದ್ದಾರೆ.
ಟ್ರಂಪ್ ಅವರ ಈ ನಡೆಯನ್ನು ಸೈಬರ್ ಸುರಕ್ಷತೆ ಕಾಕಸ್‌ನ ಸಹ-ಅಧ್ಯಕ್ಷ ಮಾರ್ಕ್ ವಾರ್ನರ್ ಅವರು ಖಂಡಿಸಿದ್ದಾರೆ. ‘ಕ್ರಿಸ್‌ ಕ್ರೆಬ್ಸ್ ಅವರು ಉತ್ತಮ ಸರ್ಕಾರಿ ಸೇವಕ. ಈ ಸ್ಥಾನಕ್ಕೆ ಸೂಕ್ತವಾದ ವ್ಯಕ್ತಿ. ಕ್ರಿಸ್‌ ಕ್ರೆಬ್ಸ್ ಸತ್ಯವನ್ನು ಹೇಳಿದ್ದಕ್ಕೆ ಅವರನ್ನು ಅಧಿಕಾರದಿಂದ ವಜಾಗೊಳಿಸಲಾಗಿದೆ’ ಎಂದು ಅವರು ಪ್ರತಿಕ್ರಿಯಿಸಿದ್ದಾರೆ.
ತಾಜಾ ಸುದ್ದಿಗಾಗಿ ಪ್ರಜಾವಾಣಿ ಟೆಲಿಗ್ರಾಂ ಚಾನೆಲ್ ಸೇರಿಕೊಳ್ಳಿ | ಪ್ರಜಾವಾಣಿ ಆ್ಯಪ್ ಇಲ್ಲಿದೆ: ಆಂಡ್ರಾಯ್ಡ್ | ಐಒಎಸ್ | ನಮ್ಮ ಫೇಸ್‌ಬುಕ್ ಪುಟ ಫಾಲೋ ಮಾಡಿ.