ದುಬೈ: ಭಾರತದಿಂದ ಬರುವ ಪ್ರಯಾಣಿಕರಿಗೆ ಅನ್ವಯಿಸುವಂತೆ ‘ಬಂದಿಳಿಯುತ್ತಿದ್ದಂತೆಯೇ ನೀಡುತ್ತಿದ್ದ ವೀಸಾ’ ಸೌಲಭ್ಯವನ್ನು (ವೀಸಾ ಆನ್‌ ಅರೈವಲ್‌) ಯುಎಇ ಸರ್ಕಾರ ತಾತ್ಕಾಲಿಕವಾಗಿ ರದ್ದುಗೊಳಿಸಿದೆ.
ಅಲ್ಲದೇ, ಕಳೆದ 14 ದಿನಗಳ ಅವಧಿಯಲ್ಲಿ ಭಾರತದಲ್ಲಿದ್ದ ಪ್ರಯಾಣಿಕರಿಗೂ ಈ ನಿಯಮ ಅನ್ವಯಿಸುತ್ತದೆ ಎಂದು ಎತಿಹಾದ್‌ ಏರ್ವೇಯ್ಸ್ ಟ್ವೀಟ್‌ ಮಾಡಿದೆ.
‘ವೀಸಾ ನಿಯಮಗಳಿಗೆ ಸಂಬಂಧಿಸಿದ ಇತ್ತೀಚಿನ ಮಾಹಿತಿಯೊಂದಿಗೆ ವೆಬ್‌ಸೈಟ್‌ ಅನ್ನು ಅಪ್‌ಡೇಟ್‌ ಮಾಡಲು ಶ್ರಮಿಸುತ್ತಿರುವುದಾಗಿ’ ಸಹ ಅಬುಧಾಬಿ ಮೂಲದ ಈ ವಿಮಾನಯಾನ ಸಂಸ್ಥೆ ತಿಳಿಸಿದೆ.
‘ಅಮೆರಿಕ ವೀಸಾ ಹೊಂದಿರುವ ಭಾರತೀಯ ಪ್ರಜೆ ಅಬುಧಾಬಿಗೆ ಬಂದು, ಬಂದಿಳಿಯುತ್ತಿದ್ದಂತೆಯೇ ನೀಡುವ ವೀಸಾ ಪಡೆದ ನಂತರ ಪ್ರತ್ಯೇಕ ವಾಸಕ್ಕೆ ಒಳಗಾಗದೇ ದುಬೈಗೆ ಪ್ರಯಾಣಿಸಬಹುದೇ’ ಎಂಬುದಾಗಿ ಪ್ರಯಾಣಿಕರೊಬ್ಬರು ಕೇಳಿದ್ದರು. ಈ ಪ್ರಶ್ನೆಗೆ ಟ್ವೀಟ್‌ ಮೂಲಕ ನೀಡಿರುವ ಉತ್ತರದಲ್ಲಿ ವಿಮಾನಯಾನ ಸಂಸ್ಥೆ ಈ ಮಾಹಿತಿ ನೀಡಿದೆ.
ವೀಸಾ ನಿಯಮಗಳಿಗೆ ಸಂಬಂಧಿಸಿದ ಇತ್ತೀಚಿನ ಮಾಹಿತಿಗಾಗಿ https: //bit.ly/TravelGuideEN ಪೋರ್ಟಲ್ ಗಮನಿಸುತ್ತಿರುವಂತೆ ಎತಿಹಾದ್‌ ಏರ್ವೇಯ್ಸ್ ಪ್ರಯಾಣಿಕರಿಗೆ ಸಲಹೆ ನೀಡಿದೆ.
