ಜಾನ್ಸನ್ & ಜಾನ್ಸನ್ ಏಕ ಡೋಸ್‌ ಕೋವಿಡ್ ಲಸಿಕೆ ಬಳಕೆಗೆ ಬ್ರಿಟನ್‌ ಅನುಮತಿ

‘ಸುರಕ್ಷತೆ, ಗುಣಮಟ್ಟ ಮತ್ತು ಪರಿಣಾಮಕಾರಿತ್ವ’ದ ಮಾನದಂಡಗಳನ್ನು ಜಾನ್ಸನ್ & ಜಾನ್ಸನ್‌ನ ಏಕ ಡೋಸ್‌ ಲಸಿಕೆ ಪೂರೈಸಿದೆ ಎಂದು ಬ್ರಿಟನ್‌ನ ಔಷಧ ಮತ್ತು ಆರೋಗ್ಯ ಉತ್ಪನ್ನ ನಿಯಂತ್ರಣ ಪ್ರಾಧಿಕಾರ ಹೇಳಿದೆ.

ಇದರೊಂದಿಗೆ, ಬ್ರಿಟನ್‌ನಲ್ಲಿ ನಾಲ್ಕನೇ ಕೋವಿಡ್ ಲಸಿಕೆಯ ಬಳಕೆಗೆ ಅನುಮೋದನೆ ನೀಡಿದಂತಾಗಿದೆ. ಫೈಜರ್–ಬಯೊಎನ್‌ಟೆಕ್, ಆಸ್ಟ್ರಾಜೆನೆಕಾ ಮತ್ತು ಮಾಡರ್ನಾ ಕೋವಿಡ್‌ ಲಸಿಕೆಗಳ ಬಳಕೆಗೆ ಈಗಾಗಲೇ ಅನುಮೋದನೆ ದೊರೆತಿದೆ.

ಓದಿ:ಭಾರತದಲ್ಲಿ ಸ್ಪುಟ್ನಿಕ್–ವಿ ಲಸಿಕೆ ಪೂರೈಕೆಗೆ ಯಾರ ಜತೆಗೂ ಒಪ್ಪಂದವಿಲ್ಲ: ರೆಡ್ಡೀಸ್

ಜಾನ್ಸನ್ & ಜಾನ್ಸನ್‌ ಲಸಿಕೆಯು ಕೋವಿಡ್ ಸೋಂಕು ತಡೆಯುವಲ್ಲಿ ಶೇ 67ರಷ್ಟು ಪರಿಣಾಮ ಹೊಂದಿದೆ ಹಾಗೂ ಸೋಂಕಿನ ಗಂಭೀರ ಪರಿಣಾಮಗಳಿಂದ ರಕ್ಷಿಸುವಲ್ಲಿ ಅಥವಾ ಆಸ್ಪತ್ರೆಗೆ ದಾಖಲಾಗುವುದನ್ನು ತಡೆಯುವ ನಿಟ್ಟಿನಲ್ಲಿ ಶೇ 85ರಷ್ಟು ಪರಿಣಾಮಕಾರಿಯಾಗಿದೆ.ಈ ಲಸಿಕೆಯನ್ನು 2ರಿಂದ 8 ಡಿಗ್ರಿ ಸೆಲ್ಸಿಯಸ್ ತಾಪಮಾನದಲ್ಲಿ ಇಡಬೇಕಾಗುತ್ತದೆ. ಎಂದು ಪ್ರಾಧಿಕಾರ ಹೇಳಿದೆ.

ಬ್ರಿಟನ್‌ ಸರ್ಕಾರವು ಲಸಿಕೆ ನೀಡಿಕೆ ಪ್ರಕ್ರಿಯೆಯನ್ನು ಈಗಾಗಲೇ ತ್ವರಿತಗೊಳಿಸಿದೆ. ದೇಶದ ಒಟ್ಟು ಜನಸಂಖ್ಯೆಯ ಶೇ 58ರಷ್ಟು ಮಂದಿಗೆ ಈಗಾಗಲೇ ಒಂದು ಡೋಸ್‌ ಲಸಿಕೆ ನೀಡಲಾಗಿದೆ. ಶೇ 35ರಷ್ಟು ಮಂದಿಗೆ ಎರಡನೇ ಡೋಸ್‌ ಅನ್ನೂ ನೀಡಲಾಗಿದೆ.