ಜಿನಿವಾ (ಎಎಪ್ಪಿ): ವಶಕ್ಕೆ ಪಡೆದ ಉಕ್ರೇನ್ ಸೈನಿಕರನ್ನು ರಷ್ಯಾ ಪಡೆಗಳು ಭೀಕರವಾಗಿ ಹತ್ಯೆ ಮಾಡಿದ ವಿಡಿಯೊ ವಿಶ್ವಾಸಾರ್ಹ ಇರಬಹುದು ಎಂದು ವಿಶ್ವಸಂಸ್ಥೆ ಬುಧವಾರ ಹೇಳಿದೆ.
ಸಾಮಾಜಿಕ ಜಾಲತಾಣಗಳಲ್ಲಿ ಹರಿದಾಡುತ್ತಿರುವ ವಿಡಿಯೊದಲ್ಲಿ, ಉಕ್ರೇನ್ ಸೈನಿಕರನ್ನು ಕಂದಕದಲ್ಲಿ ನಿಲ್ಲಿಸಿ ಗುಂಡಿನ ದಾಳಿ ನಡೆಸಿದ ಮತ್ತು ಕೊನೆಯಲ್ಲಿ ‘ಉಕ್ರೇನ್ಗೆ ವಿದಾಯ’ ಎಂದು ಹೇಳುವ ದೃಶ್ಯವಿದೆ.
‘ಸಾಮಾಜಿಕ ಜಾಲತಾಣಗಳಲ್ಲಿ ಹರಿದಾಡುತ್ತಿರುವ ವಿಡಿಯೊ ನೋಡಿದ್ದೇವೆ. ಪ್ರಾಥಮಿಕ ಪರಿಶೀಲನೆ ಬಳಿಕ, ವಿಡಿಯೊ ವಿಶ್ವಾಸಾರ್ಹವಿರಬಹುದು ಎಂದು ನಂಬುತ್ತಿದ್ದೇವೆ’ ಎಂದು ವಿಶ್ವಸಂಸ್ಥೆಯ ಮಾನವ ಹಕ್ಕುಗಳ ಕಚೇರಿ ವಕ್ತಾರೆ ತಿಳಿಸಿದ್ದಾರೆ.
‘ಈ ಬಗ್ಗೆ ನಿಷ್ಪಕ್ಷಪಾತ ಮತ್ತು ಪರಿಣಾಮಕಾರಿ ತನಿಖೆ ನಡೆಯಲಿದೆ. ತಪ್ಪಿತಸ್ಥರಿಗೆ ಕಠಿಣ ಶಿಕ್ಷೆಯಾಗಲಿದೆ’ ಎಂದು ಹೇಳಿದ್ದಾರೆ.