ವಾಷಿಂಗ್ಟನ್‌: ಕೊರೊನಾ ರೂಪಾಂತರಿ ತಳಿ ಬಿಎ.4 ಮತ್ತು ಬಿಎ.5 ವ್ಯಾಪಕವಾಗಿ ಹರಡುತ್ತಿರುವ ಹಿನ್ನೆಲೆಯಲ್ಲಿ, ಅರ್ಹರು ಬೂಸ್ಟರ್‌ ಡೋಸ್ ಕೋವಿಡ್ ಲಸಿಕೆ ಪಡೆಯುವಂತೆ ಮತ್ತು ಮನೆಯ ಒಳಗೂ ಮಾಸ್ಕ್‌ ಧರಿಸುವಂತೆಅಮೆರಿಕ ಸರ್ಕಾರ ಸಲಹೆ ನೀಡಿದೆ.
ಬಿಎ.4 ಮತ್ತು ಬಿಎ.5 ಓಮೈಕ್ರಾನ್‌ ಕೋವಿಡ್ ವೈರಸ್‌ನ ಉಪತಳಿಗಳಾಗಿದ್ದು, ಈ ಹಿಂದಿನ ತಳಿಗಳಿಗಿಂತ ಅತಿ ಹೆಚ್ಚು ಸಾಂಕ್ರಾಮಿಕವಾದವುಗಳು. ಹೀಗಾಗಿ ಇತ್ತೀಚೆಗೆ ಸೋಂಕಿಗೆ ಒಳಗಾಗಿದ್ದರೂ ಬೂಸ್ಟರ್‌ ಡೋಸ್ ಲಸಿಕೆ ಪಡೆಯುವುದು ಸೂಕ್ತ ಎಂದು ಶ್ವೇತಭವನದ ವೈದ್ಯರು ತಿಳಿಸಿದ್ದಾರೆ
‘ದೇಶದಲ್ಲಿ ಕಳೆದ ಏಪ್ರಿಲ್‌ನಿಂದ ಕೊರೊನಾ ಸೋಂಕಿನಿಂದ ಆಸ್ಪತ್ರೆ ಸೇರುವವರ ಪ್ರಮಾಣ ದ್ವಿಗುಣವಾಗಿದೆ. ಇದು ಹೊಸ ಉಪ ತಳಿ ವೇಗವಾಗಿ ಹರಿಡುತ್ತಿರುವುದರ ಸಂಕೇತ’ ಎಂದು ರೋಗ ನಿಯಂತ್ರಣ ಮತ್ತು ತಡೆಗಟ್ಟುವಿಕೆ ಕೇಂದ್ರದ ನಿರ್ದೇಶಕ ಡಾ.ರೊಚೆಲ್ಲೆ ವಾಲೆನ್‌ಸ್ಕಿ ತಿಳಿಸಿದ್ದಾರೆ.
