ಬೈರೂತ್‌ (ಎಎಫ್‌ಪಿ): ಇರಾಕ್‌ ಮೇಲೆ ಅಮೆರಿಕ ನಡೆಸುತ್ತಿರುವ ವಾಯು ದಾಳಿಗೆ ಪ್ರತೀಕಾರವಾಗಿ ಅಮೆರಿಕದ ಪತ್ರಕರ್ತ ಜೇಮ್ಸ್‌ ಫೋಲಿ ಅವರ ತಲೆ ಕತ್ತರಿಸಲಾಗಿದೆ ಎಂದು ಜಿಹಾದಿ ಗುಂಪು ಇಸ್ಲಾಮಿಕ್‌ ಸ್ಟೇಟ್‌ ಹೇಳಿಕೊಂಡಿದೆ.
ಮುಸುಕು ಹಾಕಿಕೊಂಡಿರುವ ಉಗ್ರರು ಪತ್ರಕರ್ತ ಫೋಲಿ ಅವರ ತಲೆ ಕತ್ತರಿಸುವ ದೃಶ್ಯಗಳಿರುವ ವಿಡಿಯೊವನ್ನು ಉಗ್ರರು ಬಿಡುಗಡೆ ಮಾಡಿದ್ದಾರೆ. 2012ರ ನವೆಂಬರ್‌ನಲ್ಲಿ ಶಸ್ತ್ರಧಾರಿ ಉಗ್ರರು ಫೋಲಿ ಅವರನ್ನು ಸಿರಿಯಾದಿಂದ ಅಪಹರಿಸಿದ್ದರು.
ಅನುಭವಿ ಪತ್ರಕರ್ತ ಫೋಲಿ ಲಿಬಿಯಾ ಯುದ್ಧವನ್ನು ವರದಿ ಮಾಡಿದ್ದರು. ನಂತರ ಅವರು ಗ್ಲೋಬಲ್‌ ಪೋಸ್ಟ್‌, ಎಎಫ್‌ಪಿ ಮುಂತಾದ ಸಂಸ್ಥೆಗಳಿಗಾಗಿ ಸಿರಿಯಾದಲ್ಲಿ ಬಷರ್‌ ಅಲ್‌ ಅಸದ್‌ ವಿರುದ್ಧ ನಡೆಯುತ್ತಿದ್ದ ದಂಗೆಯ ವರದಿ ಮಾಡಲು ಸಿರಿಯಾಕ್ಕೆ ಹೋಗಿದ್ದರು.
ಪ್ರತ್ಯಕ್ಷದರ್ಶಿಗಳ ಪ್ರಕಾರ, 2012ರ ನವೆಂಬರ್‌ 22ರಂದು ಉತ್ತರ ಸಿರಿಯಾದ ಇಡ್ಲಿಬ್‌ ಪ್ರಾಂತ್ಯದಿಂದ ಫೋಲಿ ಅವರನ್ನು ಅಪಹರಿಸಲಾಗಿತ್ತು. ಫೋಲಿ ಬಗೆಗಿನ ಮಾಹಿತಿಗಾಗಿ ಅವರ ಕುಟುಂಬ ಸಾರ್ವಜನಿಕ ಅಭಿಯಾನವನ್ನೇ ನಡೆಸಿತ್ತು. ಆದರೂ ಫೋಲಿ ಬಗ್ಗೆ ಯಾವುದೇ ಮಾಹಿತಿ ಲಭ್ಯವಾಗಿರಲಿಲ್ಲ.
ಐದು ನಿಮಿಷದ ವಿಡಿಯೊವನ್ನು ಅಂತರ್ಜಾಲದಲ್ಲಿ ಪ್ರಕಟಿಸಲಾಗಿದೆ. ಉತ್ತರ ಇರಾಕ್‌ನಲ್ಲಿರುವ ಇಸ್ಲಾಮಿಕ್‌ ಸ್ಟೇಟ್‌ ಉಗ್ರರ ನೆಲೆಯ ಮೇಲೆ ದಾಳಿ ನಡೆಸುವಂತೆ ಅಮೆರಿಕ ಅಧ್ಯಕ್ಷ ಬರಾಕ್‌ ಒಬಾಮ ಆದೇಶ ನೀಡಿದ ನಂತರ ಫೋಲಿ ಹತ್ಯೆ ಮಾಡಲಾಗಿದೆ ಎಂದು ಉಗ್ರರು ಹೇಳಿಕೊಂಡಿದ್ದಾರೆ. ಮರುಭೂಮಿಯಂತಹ ಪ್ರದೇಶದಲ್ಲಿ ಫೋಲಿ ಅವರ ಹತ್ಯೆ ನಡೆಸಲಾಗಿದೆ.
