ಋಣಭಾರ–ಅನುಕಂಪದ ಮಧ್ಯೆ ಮತದಾರ!

ಶಿವಮೊಗ್ಗ: ಶಿಕಾರಿಪುರ ವಿಧಾನಸಭಾ ಕ್ಷೇತ್ರದ ಉಪ ಚುನಾವಣೆಯಲ್ಲಿ  ಬಿ.ಎಸ್‌. ಯಡಿಯೂರಪ್ಪ ಅವರ ಪುತ್ರ ಬಿ.ವೈ.­ರಾಘವೇಂದ್ರ (ಬಿಜೆಪಿ) ಹಾಗೂ ಅವರದೇ ರಾಜಕೀಯ ಗರಡಿಯಲ್ಲಿ ಪಳ­ಗಿದ್ದ ಎಚ್‌.ಎಸ್‌.ಶಾಂತವೀರಪ್ಪ ಗೌಡ (ಕಾಂಗ್ರೆಸ್‌) ನಡುವೆ ನೇರ ಹಣಾಹಣಿ ಏರ್ಪಟ್ಟಿದೆ.

ಮೇಲ್ನೋಟಕ್ಕೆ ರಾಘವೇಂದ್ರ ಹಾಗೂ ಕಾಂಗ್ರೆಸ್‌ನ ಶಾಂತವೀರಪ್ಪ ಗೌಡ ನಡುವಿನ ಸ್ಪರ್ಧೆಯಾದರೂ, ಅಸ­ಲಿಗೆ ಇದು ಯಡಿಯೂರಪ್ಪ ಕುಟುಂಬ ಮತ್ತು ಕಾಂಗ್ರೆಸ್‌ ನಡುವಿನ ಜಿದ್ದಾ­ಜಿದ್ದಿಯ ಕಣ. ಪಕ್ಷೇತರರಾಗಿ ಮಾಜಿ ಸಚಿವ ಗೂಳಿ­ಹಟ್ಟಿ ಡಿ.ಶೇಖರ್‌, ನ್ಯಾಷನಲ್‌ ಡೆವ­ಲಪ್‌­ಮೆಂಟ್‌ ಪಾರ್ಟಿಯ ಜಮೀರು­ದ್ದೀನ್‌, ಕೆಜೆಪಿಯ ಸಕಲೇಶ್‌ ಹುಲ್ಮಾರ್‌, ರಿಪಬ್ಲಿಕನ್‌ ಪಾರ್ಟಿ ಆಫ್‌ ಇಂಡಿ­­ಯಾದ  ಬಿ.ಎಸ್. ಯುವರಾಜ್‌, ಪಕ್ಷೇತರ ಅಭ್ಯರ್ಥಿಗಳಾದ ಎಂ.ಆರ್‌. ಅನಿಲ್‌, ಡಿ.ಎಸ್‌. ಈಶ್ವರಪ್ಪ ಕಣದಲ್ಲಿದ್ದಾರೆ.

ಮಗನಿಗೆ ಅಪ್ಪನ ಸಾರಥ್ಯ: ಕ್ಷೇತ್ರದಲ್ಲಿ ರಾಜಕೀಯ ಪಟ್ಟುಗಳನ್ನು ಹಾಕುತ್ತಾ 7 ಬಾರಿ ಗೆಲುವು ಸಾಧಿಸಿದ್ದ ಯಡಿಯೂ­ರಪ್ಪ ಅವರೇ ಖುದ್ದಾಗಿ ಈ ಬಾರಿ ಮಗನ ಚುನಾವಣಾ ಪ್ರಚಾರದ ಸಾರಥ್ಯ ವಹಿಸಿದ್ದಾರೆ. ತಾವು ಸಂಸದ­ರಾಗಿ ಆಯ್ಕೆಯಾದ ಮರುದಿ­-ನ­ದಿಂ­ದಲೇ ಮತದಾರರಿಗೆ ಕೃತಜ್ಞತೆ ಹೇಳುವ ನೆಪದಲ್ಲಿ ಕ್ಷೇತ್ರದ ಹಳ್ಳಿ– ಹಳ್ಳಿಗಳನ್ನು  ಸುತ್ತಿ­ದ್ದಾರೆ. ‘ನನಗೆ ನೀಡಿದ ಬೆಂಬಲ­ವನ್ನು ರಾಘುವಿಗೂ ಮುಂದುವರಿಸಿ’ ಎಂದು ಕೋರಿದ್ದಾರೆ.

ಕಾಂಗ್ರೆಸ್‌ನಲ್ಲಿ ಒಗ್ಗಟ್ಟು: ಕ್ಷೇತ್ರದಲ್ಲಿ ಸಾಕಷ್ಟು ಮುಂಚಿತವಾಗಿ ಪ್ರಚಾರ ಆರಂಭಿಸಿದ್ದ ಬಿಜೆಪಿ ಹಿಂದಿನಂತೆ ಈ ಬಾರಿಯೂ ಅನಾಯಾಸವಾಗಿ ಗೆಲುವು ಪಡೆ­­ಯುವ ಲೆಕ್ಕಾಚಾರದಲ್ಲಿ ಇತ್ತು. ಆದರೆ, ಲೋಕಸಭಾ ಚುನಾವಣಾ ಫಲಿ­ತಾಂಶದ ನಂತರ ಪಾಠ ಕಲಿತಂತಿರುವ ಕಾಂಗ್ರೆಸ್‌ ನಾಯಕರು ಮೊದಲ ಬಾರಿಗೆ ಅಭೂತಪೂರ್ವ ಒಗ್ಗಟ್ಟು ತೋರಿದ್ದು, ಬಲವೃದ್ಧಿಸಿಕೊಂಡಿದ್ದಾರೆ. ಇದು ಬಿಜೆಪಿಯ ನಾಯಕರ ನಿದ್ದೆಗೆ­ಡಿಸಿದೆ.

ಆದರೆ ಕಾಂಗ್ರೆಸ್‌ಗೆ ಬಲಿಷ್ಠ ಕಾರ್ಯ­ಕರ್ತರ ಪಡೆ ಇಲ್ಲದೇ ಇರುವುದು  ಮುಖಂಡರ ನಿದ್ದೆಗೆಡಿಸಿದೆ. ಅದ­ಕ್ಕಾ­ಗಿಯೇ, ಸಚಿವರು, ಶಾಸಕರಿಗೆ ಕೊನೆಯ ದಿನದವರೆಗೂ ಕ್ಷೇತ್ರದಲ್ಲಿ ಇರುವಂತೆ ಸೂಚನೆ ನೀಡಿದ್ದು, ಕಾರ್ಯಕರ್ತರಿಗೆ ಶಕ್ತಿ ತುಂಬುವ ಕೆಲಸ ಮಾಡುತ್ತಿದೆ.
ಆರಂಭದಲ್ಲಿ ನೀರಸ ಎನ್ನುವಂತಿದ್ದ ಕಾಂಗ್ರೆಸ್‌ ಪ್ರಚಾರ ವೈಖರಿ, ಕಾರ್ಯಕ­ರ್ತರ ಉತ್ಸಾಹ ಮುಖ್ಯಮಂತ್ರಿ ಸಿದ್ದ­ರಾಮಯ್ಯ ಬಂದು ಹೋದ ನಂತರ ನೂರ್ಮಡಿಗೊಂಡಿದೆ.

ಶಿಕಾರಿಪುರ ಚುನಾವಣೆಯನ್ನು ಪ್ರತಿ­ಷ್ಠೆಯ ಪ್ರಶ್ನೆಯಾಗಿ ತೆಗೆದು­ಕೊಂಡಿ­ರುವ ಸಿದ್ದರಾಮಯ್ಯ, ಕೆಪಿಸಿಸಿ ಅಧ್ಯಕ್ಷ ಪರ­ಮೇಶ್ವರ್‌ ಎರಡು ದಿನ ಕ್ಷೇತ್ರದಲ್ಲೇ ಬೀಡುಬಿಟ್ಟು, ಪಕ್ಷದ ಮುಖಂಡರು ಹಾಗೂ ಕಾರ್ಯಕರ್ತರನ್ನು ಹುರಿದುಂ­ಬಿ­­­ಸಿದ್ದಾರೆ. ಸಿದ್ದರಾಮಯ್ಯ ಸರ್ಕಾರದ ಒಂದು ಡಜನ್‌ಗೂ ಹೆಚ್ಚು ಸಚಿವರು, ಶಾಸ­ಕರು ಕ್ಷೇತ್ರದಲ್ಲೇ ಠಿಕಾಣಿ ಹೂಡಿದ್ದು, ಆಯಾ ಜಾತಿಯವರನ್ನು ಮುಂದೆ ಬಿಟ್ಟು ಮತದಾರರನ್ನು ಸೆಳೆ­ಯುವ ಕಾರ್ಯದಲ್ಲಿ ತೊಡಗಿದ್ದಾರೆ.

‘ರಾಜ್ಯದಲ್ಲಿ ಆಡಳಿತ ಪಕ್ಷವಾದ ಕಾಂಗ್ರೆಸ್‌ ಅಭ್ಯರ್ಥಿಯನ್ನು ಗೆಲ್ಲಿಸಿದರೆ ಅಭಿವೃದ್ಧಿಗೆ ಅನುಕೂಲವಾಗುತ್ತದೆ’ ಎಂದು ಮತದಾರರ ಮನಸ್ಸು ಬದಲಿ­ಸುವ ಪ್ರಯತ್ನ ಮಾಡುತ್ತಿದ್ದಾರೆ.

ಜಾತಿವಾರು ಲೆಕ್ಕಾಚಾರ: ಯಡಿ­ಯೂ­ರಪ್ಪ ಕುಟುಂಬದ ವೋಟ್‌ ಬ್ಯಾಂಕ್‌ಗೆ ನೇರ­ವಾಗಿ ಕೈಹಾಕಿರುವ ಕಾಂಗ್ರೆಸ್‌, ಕ್ಷೇತ್ರ­ದಲ್ಲಿನ ಅಹಿಂದ ಬುಟ್ಟಿಯನ್ನು ಗಟ್ಟಿಯಾಗಿ ಹೆಣೆಯುತ್ತಿದೆ. ಕ್ಷೇತ್ರದ 1.89 ಲಕ್ಷ ಮತದಾರರಲ್ಲಿ ಲಿಂಗಾಯತರು ಹೆಚ್ಚಿನ ಸಂಖ್ಯೆಯಲ್ಲಿ ಇದ್ದಾರೆ. ನಂತರ ಪರಿಶಿಷ್ಟರು, ಮುಸ್ಲಿ­ಮರು ಹಾಗೂ ಇತರೆ ಹಿಂದುಳಿದ ವರ್ಗ­ದವರು ಇದ್ದಾರೆ.

ಕಾಂಗ್ರೆಸ್‌, ಲಿಂಗಾಯತೇತರ ಮತ­ದಾ­­ರರನ್ನು ಒಟ್ಟುಗೂಡಿಸಿ ಬಲ ವೃದ್ಧಿಸಿ­ಕೊಳ್ಳುವ ತಂತ್ರಗಾರಿಕೆ ಮಾಡುತ್ತಿದೆ. ಇದಕ್ಕೆ ಪ್ರತಿತಂತ್ರ ಮಾಡುತ್ತಿರುವ ಬಿಜೆಪಿ, ಪ್ರತ್ಯೇಕವಾಗಿ ಸಣ್ಣಸಣ್ಣ ಜಾತಿಗಳ ಮುಖಂಡರ ಸಭೆ ನಡೆಸಿ ಹಿಂದಿನ ‘ಋಣಭಾರ’ ನೆನಪಿಸುತ್ತಿದೆ.

ಕ್ಷೇತ್ರದಲ್ಲಿ ಯಡಿಯೂರಪ್ಪ ಲಿಂಗಾ­ಯ­ತರ ಪ್ರಶ್ನಾತೀತ ನಾಯಕ. ಅಂತಹ ನಾಯಕತ್ವಕ್ಕೆ ಸವಾಲು ಎಸೆದಿರುವ ಕಾಂಗ್ರೆಸ್‌, ಇದೊಂದು ಬಾರಿ ಲಿಂಗಾ­ಯತ ಸಮುದಾಯಕ್ಕೇ ಸೇರಿದ ತನ್ನ ಅಭ್ಯರ್ಥಿ ಶಾಂತವೀರಪ್ಪ ಗೌಡ ಅವರ ಕೈ ಹಿಡಿಯುವಂತೆ ಮತದಾರರನ್ನು ಕೋರು­ತ್ತಿದೆ. ಕೆಲ ಮುಖಂಡರು, ಲಿಂಗಾ­ಯತ­ರಲ್ಲೇ ಬಹುಸಂಖ್ಯಾ­ತರಾ­ಗಿರುವ ‘ಸಾದರ’ ಉಪ ಜಾತಿಗೆ ಸೇರಿದ ಶಾಂತ­ವೀರಪ್ಪ ಅವರಿಗೆ ಅವಕಾಶ ಮಾಡಿಕೊಡಿ ಎಂದು ‘ಒಳಪಂಗಡಗಳ ಅಸ್ತ್ರ’ ಬಿಡುತ್ತಿದ್ದಾರೆ.

‘ಬಿದಾಯಿ ಯೋಜನೆ’ ವಿರೋಧಿಸಿ ಬೆಂಗಳೂರಿನಲ್ಲಿ ಯಡಿಯೂರಪ್ಪ ಹಿಂದೆ ನಡೆಸಿದ ಧರಣಿಯನ್ನೇ ಅಸ್ತ್ರ ಮಾಡಿ­ಕೊಂಡಿ­­ರುವ ಕಾಂಗ್ರೆಸ್‌, ಯಡಿ­ಯೂ­ರಪ್ಪ ಮುಸ್ಲಿಮರ ವಿರೋಧಿ ಎಂದು ಬಿಂಬಿ­ಸುವ ಪ್ರಯತ್ನ ಮಾಡು­ತ್ತಿದೆ. ಶಿರಾಳಕೊಪ್ಪ ಪಟ್ಟಣ ಪಂಚಾಯ್ತಿ ಕಾಂಗ್ರೆಸ್‌ ವಶದಲ್ಲಿದ್ದು, ಅಧ್ಯಕ್ಷ, ಉಪಾ­­­­ಧ್ಯಕ್ಷರು ಮುಸ್ಲಿಂ ಸಮುದಾಯಕ್ಕೆ ಸೇರಿ­ರುವುದು ತೊಗರ್ಸಿ, ಶಿರಾಳಕೊಪ್ಪ ಭಾಗ­ದಲ್ಲಿ ಅನುಕೂಲಕರ ವಾತಾ­ವ­ರಣ ಕಲ್ಪಿಸಬಹುದೆಂಬ ಲೆಕ್ಕಾಚಾರವಿದೆ.