ಕಾನೂನು ಸುವ್ಯವಸ್ಥೆಗೆ ತೊಂದರೆ ಇಲ್ಲ
ಟ್ಯಾಕ್ಸಿಗಳಲ್ಲಿ ಪ್ರಯಾಣಿಕರಿಗೆ ಉತ್ತಮ ಸೌಲಭ್ಯ ಮತ್ತು ಸುರಕ್ಷತೆ ಒದಗಿಸುವಲ್ಲಿ ಪೊಲೀಸ್‌ ಇಲಾಖೆಯ ಪಾತ್ರದ ಕುರಿತು ಮೈಸೂರಿನ ಪೊಲೀಸ್‌ ಆಯುಕ್ತ ಡಾ. ಎಂ.ಎ.ಸಲೀಂ ಇಲ್ಲಿ ಚರ್ಚಿಸಿದ್ದಾರೆ.
* ಟ್ಯಾಕ್ಸಿ ಬಳಕೆ ಹೆಚ್ಚಿದ ಬಳಿಕ ಕಾನೂನು ಸುವ್ಯವಸ್ಥೆಗೆ ಹೊಸ ಸವಾಲುಗಳು ಎದುರಾಗಿವೆಯೇ?
ಅಂತಹ ದೊಡ್ಡ ಸವಾಲುಗಳು ಸೃಷ್ಟಿಯಾಗಿಲ್ಲ. ನಗರದಲ್ಲಿ ಆಟೊಗಿಂತ ಟ್ಯಾಕ್ಸಿ ಸುರಕ್ಷಿತ. ಇದು ಅಭಿವೃದ್ಧಿಯ ಸೂಚಕ ಕೂಡ. ಉತ್ತರ ಭಾರತದ ವಿವಿಧೆಡೆ ಈಗಲೂ ‘ಸೈಕಲ್‌ ಟಾಂಗಾ’ ಬಳಕೆಯಲ್ಲಿದೆ. ನಮ್ಮ ಯಾವ ನಗರಗಳಲ್ಲೂ ಇಂತಹ ಸೈಕಲ್‌ಗಳು ಕಾಣುವುದಿಲ್ಲ. ದಕ್ಷಿಣ ಮುಂಬೈನಲ್ಲಿ ಆಟೊ ಸೇವೆಯನ್ನೇ ರದ್ದು ಮಾಡಲಾಗಿದೆ. ಅಲ್ಲಿ 50 ಸಾವಿರ ಟ್ಯಾಕ್ಸಿಗಳು ಸಂಚರಿಸುತ್ತಿವೆ. ವಿಶ್ವದ ಅಭಿವೃದ್ಧಿ ಹೊಂದಿದ ಎಲ್ಲ ನಗರಗಳಲ್ಲಿ ಟ್ಯಾಕ್ಸಿ ಬಳಕೆ ಇದೆ. ಇದರಿಂದ ಕಾನೂನು ಸುವ್ಯವಸ್ಥೆಗೆ ತೊಂದರೆ ಆಗಿಲ್ಲ.
* ತಂತ್ರಜ್ಞಾನದ ನೆರವಿನಿಂದ ಟ್ಯಾಕ್ಸಿಗಳನ್ನು ನಿಯಂತ್ರಿಸಲು ಪೊಲೀಸ್‌ ಇಲಾಖೆಗೆ ಸಾಧ್ಯವಿಲ್ಲವೇ?
ಖಂಡಿತಾ ಸಾಧ್ಯ. ಜಿಪಿಎಸ್‌ ತಂತ್ರಜ್ಞಾನ, ಟ್ಯಾಕ್ಸಿಗಳ ಮೇಲ್ವಿಚಾರಣೆಗೆ ನೆರವಾಗಿದೆ. ಖಾಸಗಿ ಟ್ಯಾಕ್ಸಿ ವ್ಯವಸ್ಥೆ ಸಂಘಟಿತವಾಗಿ ಬೆಳೆಯದ ಮೈಸೂರಿನಂತಹ ನಗರದಲ್ಲಿ ಇದು ಕಷ್ಟ. ಇಲ್ಲಿ ಬಹುತೇಕ ಮಾಲೀಕರೇ ಚಾಲಕರಾಗಿದ್ದಾರೆ. ನೂರಾರು ಟ್ಯಾಕ್ಸಿಗಳನ್ನು ಹೊಂದಿದ ಕಾರ್ಪೊರೇಟ್‌ ಮಾದರಿ ಕಂಪೆನಿಗಳು ಬೆರಳೆಣಿಕೆಯಷ್ಟಿವೆ. 50ಕ್ಕೂ ಹೆಚ್ಚು ಟ್ಯಾಕ್ಸಿಗಳನ್ನು ಹೊಂದಿದ ಸಂಸ್ಥೆಗಳಿಗೆ ಜಿಪಿಎಸ್‌ ಅಳವಡಿಕೆ ಕಡ್ಡಾಯ ಮಾಡಲಾಗಿದೆ.
* ಹೊರಗಿನಿಂದ ಬರುವ ಟ್ಯಾಕ್ಸಿಗಳ ನಿಯಂತ್ರಣ ಹೇಗೆ?
ಪ್ರವಾಸಿ ತಾಣ ಮೈಸೂರಿಗೆ ಅನೇಕರು ಟ್ಯಾಕ್ಸಿ, ಕ್ಯಾಬ್‌ಗಳ ಮೂಲಕವೇ ಬರುತ್ತಾರೆ. ಅವರೆಲ್ಲ ಎಲ್ಲಿಂದ ಬರುತ್ತಾರೆ ಎಂಬ ಸ್ಪಷ್ಟ ಮಾಹಿತಿ ಇರುವುದಿಲ್ಲ. ಅವರ ಮೇಲೆ ನಿಯಂತ್ರಣ ಸಾಧಿಸುವುದು ತುಸು ಕಷ್ಟ. ಸ್ಥಳೀಯ ಟ್ಯಾಕ್ಸಿಗಳ ಮೇಲೆ ಮಾತ್ರ ಈಗ ಗಮನ ಕೇಂದ್ರೀಕರಿಸಲಾಗುತ್ತಿದೆ. ಬಳಿಕ ಈ ನಿಟ್ಟಿನಲ್ಲಿ ಚಿಂತನೆ ಮಾಡುತ್ತೇವೆ.
ಬಡವಾದ ಆಟೊ!
‘ಆಟೊಗಿಂತ ಟ್ಯಾಕ್ಸಿ ಪ್ರಯಾಣ ಸೋವಿ’ ಎಂಬ ಮಾತು ನಗರಗಳಲ್ಲಿ ಜನಜನಿತವಾಗುತ್ತಿದೆ. ಟ್ಯಾಕ್ಸಿಗಳ ದರ ಸಮರದಿಂದಾಗಿ ಪ್ರಯಾಣ ದರ ಆಟೊಗಿಂತ ಕಡಿಮೆಯಾಗಿದೆ. ಇದರಿಂದ ಆಟೊ ಉದ್ಯಮಕ್ಕೆ ಬಲವಾದ ಏಟು ಬಿದ್ದಿದ್ದು, ಮೈಸೂರಿನಲ್ಲಿ ಟ್ಯಾಕ್ಸಿ ಸೇವೆ ವಿರುದ್ಧ ಆಟೊ ಚಾಲಕರ ಅಸಮಾಧಾನ ಭುಗಿಲೆದ್ದಿದೆ. ‘ನ್ಯಾನೊ ಟ್ಯಾಕ್ಸಿ’ ನಿಷೇಧಕ್ಕೆ ಒತ್ತಾಯಿಸಿ ಹೋರಾಟವೂ ಶುರುವಾಗಿದೆ.
ನಗರದಲ್ಲಿ ಸುಮಾರು 22 ಸಾವಿರ ಆಟೊಗಳು ಸಂಚರಿಸುತ್ತಿವೆ. ಆಟೊ ಪ್ರಯಾಣ ದರವನ್ನು ಕನಿಷ್ಠ 1.9 ಕಿ.ಮೀ.ಗೆ ₨ 25 ಹಾಗೂ ನಂತರದ ಪ್ರತಿ ಕಿ.ಮೀ.ಗೆ ₨ 13 ಎಂದು ಸರ್ಕಾರವೇ ನಿಗದಿ ಮಾಡಿದೆ. ಇತ್ತ ಟ್ಯಾಕ್ಸಿಗಳ ಪ್ರಯಾಣ ದರ ನಿಗದಿಪಡಿಸುವ ಗೋಜಿಗೆ ಸರ್ಕಾರ ಕೈಹಾಕಿಲ್ಲ. ಹೀಗಾಗಿ, ಟ್ಯಾಕ್ಸಿಗಳ ನಡುವೆ ಅನಾರೋಗ್ಯಕರ ಪೈಪೋಟಿ ಆರಂಭವಾಗಿದೆ.
‘ನ್ಯಾನೊ ಟ್ಯಾಕ್ಸಿ’ ಕನಿಷ್ಠ ದರ (4 ಕಿ.ಮೀ) ₨ 70, ನಂತರದ ಪ್ರತಿ ಕಿ.ಮೀ.ಗೆ ₨ 14.5 ನಿಗದಿ ಮಾಡಿದೆ. ‘ಟ್ಯಾಕ್ಸಿ ಫಾರ್‌ ಶೂರ್‌’ನ ನಿಗದಿತ ಕನಿಷ್ಠ ದರ ₨ 49 ಹಾಗೂ ಪ್ರತಿ ಕಿ.ಮೀ.ಗೆ ₨ 14. ‘ವೋಲಾ’ ಪ್ರತಿ ಕಿ.ಮೀ.ಗೆ ₨ 10ಕ್ಕೆ ಸೇವೆ ಒದಗಿಸುವ ಭರವಸೆ ನೀಡಿ ನಗರಕ್ಕೆ ಬರಲು ಸಜ್ಜಾಗಿದೆ. ಇದರಿಂದ ಜನ ‘ಟ್ಯಾಕ್ಸಿ’ಯನ್ನು ಇಷ್ಟಪಡುತ್ತಿದ್ದು, ಆಟೊ ಉದ್ಯಮದಲ್ಲಿ ತಳಮಳ ಶುರುವಾಗಿದೆ.
‘ಕರ್ನಾಟಕ ಸಿಟಿ ಟ್ಯಾಕ್ಸಿ ಸೇವಾ ಕಾಯ್ದೆ–1998ರ ಪ್ರಕಾರ 1,200 ಸಿ.ಸಿ ಎಂಜಿನ್‌ ಸಾಮರ್ಥ್ಯದ ಕಾರು ಮಾತ್ರ ಟ್ಯಾಕ್ಸಿ ಸೇವೆ ನೀಡಬಹುದು. ನ್ಯಾನೊ ಕೇವಲ 600 ಸಿ.ಸಿ ಎಂಜಿನ್‌ ಸಾಮರ್ಥ್ಯದ ವಾಹನ. ಹೀಗಾಗಿ, ಕಾನೂನು ಪ್ರಕಾರ ಈ ವಾಹನಗಳಿಗೆ ಅವಕಾಶವೇ ಇಲ್ಲ. ಅಲ್ಲದೆ, ಪ್ರಾದೇಶಿಕ ಸಾರಿಗೆ ಪ್ರಾಧಿಕಾರದ ಅನುಮತಿ ಪಡೆಯದೇ ಸಂಚಾರಕ್ಕೆ ಅವಕಾಶ ಕಲ್ಪಿಸಿ ಆಟೊ ಚಾಲಕರ ಬದುಕನ್ನು ದುಸ್ತರ ಆಗಿಸಲಾಗುತ್ತಿದೆ’ ಎಂದು ಹೇಳುತ್ತಾರೆ ಮೈಸೂರು ಆಟೊ ಚಾಲಕರ ಸಂಘಗಳ ಒಕ್ಕೂಟದ ಗೌರವ ಅಧ್ಯಕ್ಷ ಎಂ.ಲಕ್ಷ್ಮಣ್‌.
ತಾಜಾ ಸುದ್ದಿಗಾಗಿ ಪ್ರಜಾವಾಣಿ ಟೆಲಿಗ್ರಾಂ ಚಾನೆಲ್ ಸೇರಿಕೊಳ್ಳಿ | ಪ್ರಜಾವಾಣಿ ಆ್ಯಪ್ ಇಲ್ಲಿದೆ: ಆಂಡ್ರಾಯ್ಡ್ | ಐಒಎಸ್ | ನಮ್ಮ ಫೇಸ್‌ಬುಕ್ ಪುಟ ಫಾಲೋ ಮಾಡಿ.