ಕಿಂಡಿ ಒಂದು; ಸೇವೆ ಹದಿನೆಂಟು!

ವಿಜಯನಗರ ಅತ್ತಿಗುಪ್ಪೆಯ14ನೆ ಅಡ್ಡರಸ್ತೆಯ ಮಧು ಕುಮಾರ್ ಮನೆ ಬದಲಿಸಲು ಮುಂದಾಗಿದ್ದರು. ಅವರು ಅಂದುಕೊಂಡ ಬಡಾವಣೆಯಲ್ಲಿ ಮನೆಯೂ ಸಿಕ್ಕಿತ್ತು. ಆದರೆ ಮನೆಯಲ್ಲಿ ತುಂಬಿ ತುಳುಕುತ್ತಿದ್ದ ವಸ್ತುಗಳನ್ನು ಸಾಗಿಸಲು ಬೇಕಿರುವ ಸಾಗಣೆದಾರರನ್ನು ನಾಲ್ಕಾರು ಸಲ ಹುಡುಕಾಡಿದರು. ಒಮ್ಮೆ ಹಣದ ಚೌಕಾಸಿಯಲ್ಲಿ ಮಾತುಕತೆ ಮುರಿದು ಬಿದ್ದರೆ, ಮತ್ತೊಮ್ಮೆ ಪ್ಯಾಕರ್ಸ್‌ ಕೈ ಕೊಟ್ಟರು.

ಹೀಗೆ ಹಲವು ದಿನ ಕಳೆದ ಮೇಲೆ ಮಧು ಕುಮಾರ್‌ಗೆ ಸ್ನೇಹಿತರ ಸಲಹೆಯಿಂದ ಸಿಕ್ಕಿದ್ದು ‘Brou4u’  ಎಂಬ ಅಂತರ್ಜಾಲ ಸೇವಾ ತಾಣ. ಬೆಂಗಳೂರಿನಲ್ಲಿ ನೆಲೆ ನಿಂತಿರುವ,  ಮಲೆನಾwin 17 ಮಂದಿ ಯುವಕರು ರೂಪಿಸಿರುವ ‘Brou4u’ ವೆಬ್ ತಾಣ 18 ಸೇವೆಗಳನ್ನು ಒದಗಿಸುತ್ತಿದೆ. ಉದಾಹರಣೆಗೆ ಕಾರ್ಪೆಂಟರ್, ಕಾರು ವಾಷಿಂಗ್‌, ಎಲೆಕ್ಟ್ರಿಷಿನ್ ಸೇವೆಗಳು ಅಗತ್ಯವಿದ್ದವರಿಗೆ ಅವರ ಬಳಿಗೆ ಸೇವೆಯನ್ನು ಒದಗಿಸಲಿದೆ. ಗ್ರಾಹಕರು ಬಯಸಿದ ದಿನದಂದು ಕೈಗೆಟುಕುವ ಬೆಲೆಯಲ್ಲಿ ಈ ಸೇವೆಗಳನ್ನು ಒದಗಿಸುವುದು ಈ ತಾಣದ ವಿಶೇಷ.

‘Brou4u’ ಫೆಬ್ರುವರಿಯಲ್ಲಿ ಕಾರ್ಯಾರಂಭ ಮಾಡಿದ್ದು, ನಗರದಲ್ಲಿ ಹಲವು ಸೇವೆಗಳನ್ನು ನೀಡುತ್ತಿದೆ. ವಿವಿಧ ಕ್ಷೇತ್ರಗಳ 800ಕ್ಕೂ ಅಧಿಕ ಮಂದಿ ಗ್ರಾಹಕರು ಈ ಸೇವೆಗಳನ್ನು ಪಡೆದುಕೊಳ್ಳುತ್ತಿದ್ದಾರೆ. ಗ್ರಾಹಕರು ಈ ಜಾಲತಾಣಕ್ಕೆ ಹೋಗಿ, ಅಲ್ಲಿ ಯಾವ ಬಡಾವಣೆ ಮತ್ತು ಯಾವ ಸೇವೆ ಬೇಕು ಎಂದು ಕ್ಲಿಕ್ಕಿಸಿದರೆ ಮಾಹಿತಿ ತೆರೆದುಕೊಳ್ಳುತ್ತದೆ. ಆನಂತರ ಜಾಲತಾಣದವರು ಗ್ರಾಹಕರನ್ನು ಸಂಪರ್ಕಿಸುತ್ತಾರೆ. 

ಪ್ರಮೋದ್ ಹೆಗಡೆ, ರಜತ್, ಅಕ್ಷಯ್, ಪೃಥ್ವಿ, ಶ್ರೀನಾಥ್, ಮಂಜುನಾಥ್ ಮತ್ತಿತರ 17 ಮಂದಿ ಈ ತಾಣದ ರೂವಾರಿಗಳು. ಬಹುರಾಷ್ಟ್ರೀಯ ಕಂಪೆನಿಗಳಲ್ಲಿ ಕೆಲಸ ಮಾಡುತ್ತಿದ್ದ ಈ ಗೆಳೆಯರ ಹೊಸತನದ ತುಡಿತವೇ ಈ ತಾಣದ ಹುಟ್ಟಿಗೆ ಕಾರಣ. ಸದ್ಯಕ್ಕೆ ಬೆಂಗಳೂರಿನಲ್ಲಿ ಸೇವೆ ಒದಗಿಸುತ್ತಿರುವ ಈ ಸಂಸ್ಥೆ ಮುಂದಿನ ದಿನಗಳಲ್ಲಿ ದೆಹಲಿ, ಹೈದರಾಬಾದ್, ಚೆನ್ನೈ ಮತ್ತಿತರ ನಗರಗಳಿಗೂ ತನ್ನ ಚಟುವಟಿಕೆಯನ್ನು ವಿಸ್ತರಿಸಿಕೊಳ್ಳುವ ಉತ್ಸಾಹದಲ್ಲಿದೆ.

‘ನಾವೆಲ್ಲರೂ ಗೆಳೆಯರು. ಹೊಸದಾಗಿ ಏನನ್ನಾದರೂ ಮಾಡಬೇಕು ಅಂದುಕೊಂಡಿದ್ದೆವು. ಅದೇ ಸಮಯದಲ್ಲಿ ಪ್ರಧಾನಿ ನರೇಂದ್ರ ಮೋದಿ ಅವರ ಮೇಕಿನ್ ಇಂಡಿಯಾ ಪರಿಕಲ್ಪನೆ ನಮ್ಮನ್ನು ಸೆಳೆಯಿತು. ಅದರ ಪ್ರತಿಫಲವಾಗಿ ನಾವು ಈ ಸೇವಾ ತಾಣ ಆರಂಭಿಸಿದೆವು. ಹೈಸ್ಕೂಲ್‌ನಲ್ಲಿ ಒಟ್ಟಿಗೆ ಕಲಿತ ಎಂಟು ಮಂದಿ ಈಗಲೂ ಜೊತೆಗೆ ಇದ್ದೇವೆ. ನಮ್ಮ ಉದ್ದೇಶ ಗ್ರಾಹಕರಿಗೆ ಅತ್ಯುತ್ತಮ ಸೇವೆ ನೀಡುವುದು.

ಆರಂಭದಲ್ಲಿ ನಾವೇ ಕಾರ್ಪೆಂಟರ್, ಪ್ಲಂಬರ್ ಹೀಗೆ ಹಲವು ಸೇವೆಗಳನ್ನು ಒದಗಿಸುವ ಸೇವಾದಾರರ ಬಳಿ ತೆರಳಿ ನಮ್ಮ ಯೋಜನೆ ಕುರಿತು ಮನವರಿಕೆ ಮಾಡಿಕೊಟ್ಟೆವು. ಹಲವರು ಇದಕ್ಕೆ ಸ್ಪಂದಿಸಿದರು. ನಂತರ ದಿನಗಳಲ್ಲಿ ಹಲವರು ನಮ್ಮ ಜಾಲತಾಣದ ಬಗ್ಗೆ ತಿಳಿದು ಸ್ವಂತ ಆಸಕ್ತಿಯಿಂದ ತಾಣ ಸೇರಿದರು. ಹಾಗೆಂದು ಎಲ್ಲರನ್ನೂ ನಮ್ಮ ತಾಣಕ್ಕೆ ಸೇರಿಸಿಕೊಳ್ಳುವುದಿಲ್ಲ.