ಕೊಪ್ಪಳ: ಆಕರ್ಷಕ ಬಣ್ಣ ಬಳಿದ ಕಟ್ಟಡ, ಸ್ವಾಗತಿಸುವ ಫಲಕ, ಮುಂದೆ ಸಾಗಿದಂತೆ ಸ್ವಾಗತಿಸುವ ಅಂದಗಾತಿಯರು. ಮತಗಟ್ಟೆಯೊಳಗೂ ಮುಗುಳ್ನಗುವಿನ ಮುಖಗಳು–ಇದು ಜಿಲ್ಲೆಯ ವಿವಿಧೆಡೆ ಸ್ಥಾಪಿಸಲಾದ ಮಾದರಿ ಮತಗಟ್ಟೆಗಳ ಸ್ವರೂಪ.
ನಗರದಿಂದಾಚೆಗೆ ಭಾಗ್ಯನಗರ ಗ್ರಾಮ ಪಂಚಾಯಿತಿಯನ್ನೇ ಮಾದರಿ ಮತಗಟ್ಟೆಯನ್ನಾಗಿ ರೂಪಿಸಲಾಗಿತ್ತು. ಹೊರಗೆ ಹಾಕಿದ್ದ ಶಾಮಿಯಾನ, ಸಾಲು ಕುರ್ಚಿಗಳು ಅಪ್ಪಟ ಶುಭಕಾರ್ಯ ನಡೆಯುತ್ತಿದೆಯೇನೋ ಎಂಬಂತೆ ಆ ಕಟ್ಟಡ ಹಾಗೂ ಅಲ್ಲಿನ ವಾತಾವರಣ ಭಾಸವಾಗುತ್ತಿತ್ತು. ಮತ ಚಲಾಯಿಸದಿದ್ದರೂ ಪರವಾಗಿಲ್ಲ. ಕೇಂದ್ರದೊಳಗೊಮ್ಮೆ ನೋಡಿಬನ್ನಿ ಎಂದು ಸ್ವಾಗತಕಾರಿಣಿ ಕೋರಿದರು.
ಒಳಗೆ ಏರ್‌ ಕೂಲರ್‌, ಕೆಂಪು ಕಂಬಳಿಯ ಹಾಸು, ಒಟ್ಟಾರೆ ತಂಪು ವಾತಾವರಣ. ಮತಗಟ್ಟೆಗೆ ಬರುತ್ತಿದ್ದಂತೆಯೇ ವೆಬ್‌ ಕ್ಯಾಮೆರಾದಲ್ಲಿ ವಿಡಿಯೊ ಮೂಡಿ ಅಂತರ್ಜಾಲದಲ್ಲಿ ಪ್ರಸಾರವಾಗುತ್ತಿತ್ತು. ಮತ ಚಲಾಯಿಸಿ ಬಂದ ನಂತರ ಪಕ್ಕದಲ್ಲಿಯೇ ತಂಪು ಪಾನೀಯದ ವ್ಯವಸ್ಥೆಯಿತ್ತು. ಅದಾದ ಬಳಿಕ ‘ಮತ ಚಲಾಯಿಸಿದ್ದಕ್ಕೆ ಕೃತಜ್ಞತೆಗಳು’ ಎಂಬ ಬರಹವಿರುವ ಕಾರ್ಡನ್ನು ಮತದಾರರಿಗೆ ನೀಡಲಾಗುತ್ತಿತ್ತು.
ಈ ಮತಗಟ್ಟೆ ವ್ಯಾಪ್ತಿಯಲ್ಲಿ ಸುಮಾರು 900 ಮತಗಳಿವೆ. ಕೇವಲ ಮತಗಟ್ಟೆ ನೋಡುವ ಕುತೂಹಲದಿಂದಲೇ ಬಂದವರು ಹಲವು ಮಂದಿ.
ಇದೇ ಕೇಂದ್ರದಲ್ಲಿ ಮತಯಂತ್ರ ಸ್ಥಗಿತಗೊಂಡು ಸುಮಾರು 15 ನಿಮಿಷ ಕಾಲ ಆತಂಕ ಸೃಷ್ಟಿಯಾಗಿತ್ತು.
