ಲಂಡನ್ (ಪಿಟಿಐ): ಬ್ರಿಟನ್ ರಾಜಕುಮಾರಿ ಡಯಾನಾ ಅವರು ಫ್ರಾನ್ಸ್ನಲ್ಲಿ ನಡೆದ ಅಪಘಾತದಲ್ಲಿ ದುರಂತ ಸಾವಿಗೀಡಾಗುವ ಮುನ್ನ ಬರೆದಿಟ್ಟಿದ್ದ ಪತ್ರವನ್ನು ಈ ತಿಂಗಳ 28ರಂದು ಇಲ್ಲಿ ಹರಾಜಿಗೆ ಇಡಲಾಗುತ್ತಿದೆ. ಈ ಪತ್ರವು ₨3 ಲಕ್ಷಗಳಿಗೆ (3 ಸಾವಿರ ಪೌಂಡ್) ಹರಾಜಾಗುವ ನಿರೀಕ್ಷೆ ಇದೆ.
ಡಯಾನಾ ಅವರು ಬೇಸಿಗೆ ವಿಶ್ರಾಂತಿ ಪಡೆಯಲು ಆರಂಭಿಸಿದ ಕೆಲವೇ ಗಂಟೆಗಳಿಗೂ ಮುಂಚೆ ಮತ್ತು ಸಾಯುವ ಎರಡು ವಾರಗಳ ಹಿಂದೆ (1997ರ ಆಗಸ್ಟ್ 11ರಂದು), ಕೆನ್ಸಿಂಗ್ಟನ್ ಅರಮನೆ ಲೆಟರ್ಹೆಡ್ ಕಾಗದದಲ್ಲಿ ಈ ಪತ್ರವನ್ನು ಬರೆದಿದ್ದರು ಎಂದು ‘ಡೈಲಿ ಎಕ್ಸ್ಪ್ರೆಸ್’ ವರದಿ ಮಾಡಿದೆ.
ಇದೇ ವಿಶ್ರಾಂತಿಯ ವೇಳೆ, 1997ರ ಆಗಸ್ಟ್ 31ರಂದು ಪ್ಯಾರಿಸ್ನಲ್ಲಿ ಸಂಭವಿಸಿದ ಕಾರು ಅಪಘಾತದಲ್ಲಿ ಡಯಾನಾ ಮತ್ತು ಆಕೆಯ ಪ್ರಿಯಕರ ದೋದಿ ಫಯಾದ್ ಅಸುನೀಗಿದರು.
ಪತ್ರದಲ್ಲಿ ‘ಪ್ರೀತಿಯೊಂದಿಗೆ ಡಯಾನಾ’ ಎಂಬ ಸಹಿ ಇದೆ. ಬೋಸ್ನಿಯಾದ ನೆಲಬಾಂಬ್ ಸ್ಫೋಟದಲ್ಲಿ ಗಾಯಗೊಂಡವರನ್ನು ಭೇಟಿಯಾದ ನಂತರ ತಮ್ಮ ಧರ್ಮ ಕಾರ್ಯದ ಭಾಗವಾಗಿ ಡಯಾನಾ ಈ ಪತ್ರವನ್ನು ಸಹ ಪ್ರಚಾರಕರಾದ ಡಿಲೀಸ್ ಚೀತಮ್ ಅವರಿಗೆ ಬರೆದಿದ್ದರು. ಘಟನೆಯಲ್ಲಿ ನೊಂದವರನ್ನು ಸ್ಮರಿಸುವಂತೆ ಪತ್ರದಲ್ಲಿ ಇಡೀ ವಿಶ್ವವನ್ನು ಒತ್ತಾಯಿಸಿದ್ದರು.
ಚೀತಮ್ ಅವರು 1999ರಲ್ಲಿ ನಡೆದ ಧರ್ಮ ಕಾರ್ಯದ ಹರಾಜಿನಲ್ಲಿ ಈ ಪತ್ರವನ್ನು ಪ್ರಸಿದ್ಧ ಛಾಯಾಗ್ರಾಹಕ ಜೇಸನ್ ಫ್ರೇಸರ್ ಅವರಿಗೆ ಮಾರಿದ್ದರು.
ವೈಯಕ್ತಿಕವಾಗಿ ಡಯಾನಾ ಅವರನ್ನು ಚೆನ್ನಾಗಿ ತಿಳಿದಿದ್ದ ಫ್ರೇಸರ್ ಅವರು 2007ರಲ್ಲಿ ನಡೆದ ಆಕೆಯ 10ನೇ ಸಂಸ್ಮರಣಾ ಕಾರ್ಯಕ್ರಮದಲ್ಲಿ ಖಾಸಗಿ ಬ್ರಿಟಿಷ್ ಸಂಗ್ರಹಕಾರರೊಬ್ಬರಿಗೆ ಈ ಪತ್ರವನ್ನು ಮಾರಾಟ ಮಾಡಿದ್ದರು ಎಂದು ಪತ್ರಿಕೆ ತಿಳಿಸಿದೆ.