ಬರ್ನ್/ ನವದೆಹಲಿ (ಪಿಟಿಐ): ವಿದೇಶಿ ಬ್ಯಾಂಕುಗಳಲ್ಲಿ ಇರಿಸಿರುವ ಕಪ್ಪುಹಣವನ್ನು ವಾಪಸ್ ದೇಶಕ್ಕೆ ತರಬೇಕು ಎಂದು ಇತ್ತ ಭಾರತದಲ್ಲಿ ಒತ್ತಡ ಹೆಚ್ಚುತ್ತಿದ್ದರೆ ಅತ್ತ ಸ್ವಿಟ್ಜರ್ಲೆಂಡ್ನಲ್ಲಿ ಬ್ಯಾಂಕುಗಳು ತಮ್ಮ ಹಿತಾಸಕ್ತಿ ರಕ್ಷಿಸಿಕೊಳ್ಳಲು ಶತಾಯಗತಾಯ ಪ್ರಯತ್ನಿಸುತ್ತಿವೆ.
ಈ ಸಂಬಂಧ ಮುಂದೆ ವಿಧಿಸಬಹುದಾದ ದಂಡ ಹಾಗೂ ಕಾನೂನು ವೆಚ್ಚಕ್ಕೆ ತಮ್ಮ ಬಜೆಟ್ನಲ್ಲಿ ಹಣ ಮೀಸಲಿಡುವ ಬಗ್ಗೆಯೂ ಅವು ಪರಿಗಣಿಸುತ್ತಿವೆ. ಅಲ್ಲದೇ, ಮಾಹಿತಿ ವಿನಿಮಯ ಹಾಗೂ ಆಡಳಿತಾತ್ಮಕ ಸಹಕಾರ ಒಪ್ಪಂದಗಳ ಅಡಿ ಅಗತ್ಯ ನಿಬಂಧನೆಗಳನ್ನು ವಿಧಿಸುವಂತೆ ಬ್ಯಾಂಕುಗಳು ಸ್ವಿಸ್ ಸರ್ಕಾರದ ಮೇಲೆ ಒತ್ತಡ ಹೇರುತ್ತಿವೆ.
ಇದೇ ವೇಳೆ, ಕನಿಷ್ಠ ಮೂರು ಜಾಗತಿಕ ಬ್ಯಾಂಕುಗಳು ಭಾರತದ ಕಾರ್ಪೊರೇಟ್ ಕಂಪೆನಿಗಳಿಗೆ ತಮ್ಮ ಹಣವನ್ನು ತಮ್ಮದೇ ಕಂಪೆನಿಗಳಲ್ಲಿ ಮರುಹೂಡಿಕೆ ಮಾಡಿ ಅದನ್ನು ವಿದೇಶ ನೇರ ಹೂಡಿಕೆ ಎಂದು ತೋರಿಸಲು ಅನುವು ಮಾಡಿಕೊಟ್ಟಿರುವ ಆರೋಪಕ್ಕೆ ಸಿಲುಕಿವೆ. ಭಾರತದ ೧೫೨೦ ಕಂಪೆನಿಗಳು ಈ ರೀತಿ ಅಕ್ರಮ ಎಸಗಿವೆ ಎಂದು ಶಂಕಿಸಲಾಗಿದೆ.