ಬೆಂಗಳೂರು: ನಗರದಲ್ಲಿ ರೈಲು ಸಂಚಾರ ಆರಂಭವಾಗಿ 150 ವರ್ಷ ಸಂದಿರುವ ಪ್ರಯುಕ್ತ ರೈಲ್ವೆ ಇಲಾಖೆಯ ವತಿಯಿಂದ ನಗರದ ಕೇಂದ್ರ ರೈಲು ನಿಲ್ದಾಣದಲ್ಲಿ ಛಾಯಾಚಿತ್ರ ಪ್ರದರ್ಶನ ಆರಂಭಗೊಂಡಿದೆ.
‘ಪ್ರದರ್ಶನ ಎರಡು ದಿನಗಳ ಹಿಂದೆ ಆರಂಭವಾಗಿದ್ದು, ಸಾವಿರಾರು ಪ್ರಯಾಣಿಕರು ಪ್ರದರ್ಶನ ವೀಕ್ಷಿಸಿದ್ದಾರೆ. ಶನಿವಾರ ರಾತ್ರಿ 8 ಗಂಟೆವರೆಗೆ ಪ್ರದರ್ಶನ ಮುಂದುವರಿಯಲಿದೆ. ಪ್ರದರ್ಶನದಲ್ಲಿ ಅಪರೂಪದ 65 ಛಾಯಾಚಿತ್ರಗಳು ಇವೆ’ ಎಂದು ಹಿರಿಯ ವಿಭಾಗೀಯ ವ್ಯವಸ್ಥಾಪಕ (ವಾಣಿಜ್ಯ) ಡಾ.ಅನೂಪ್‌ ದಯಾನಂದ್‌ ಸಾಧು ಶುಕ್ರವಾರ ಇಲ್ಲಿ ಪತ್ರಿಕಾಗೋಷ್ಠಿಯಲ್ಲಿ ತಿಳಿಸಿದರು.
‘150 ವರ್ಷದ ಸಂಭ್ರಮದ ಅಂಗವಾಗಿ ವರ್ಷಪೂರ್ತಿ ಪ್ರಬಂಧ ಸ್ಪರ್ಧೆ, ಚಿತ್ರರಚನಾ ಸ್ಪರ್ಧೆ ಮತ್ತಿತರ ಕಾರ್ಯಕ್ರಮಗಳನ್ನು ಹಮ್ಮಿಕೊಳ್ಳಲಾಗುವುದು’ ಎಂದು ಅವರು ತಿಳಿಸಿದರು.
‘ಬೆಂಗಳೂರು ಕಂಟೋನ್ಮೆಂಟ್‌ ರೈಲು ನಿಲ್ದಾಣ– ಜೋಲಾರ್‌ಪೇಟೆ ನಡುವೆ ರೈಲು ಸಂಚಾರ 1864ರ ಆಗಸ್ಟ್ 1ರಂದು ಆರಂಭವಾಗಿತ್ತು. 1882ರಲ್ಲಿ ಬೆಂಗಳೂರು ನಗರ ರೈಲು ನಿಲ್ದಾಣಕ್ಕೆ ಮಾರ್ಗ ವಿಸ್ತರಣೆಯಾಗಿತ್ತು. ಕೇಂದ್ರ ರೈಲು ನಿಲ್ದಾಣ ನಿರ್ಮಾಣವಾಗಿರುವ ಜಾಗವನ್ನು ಛಲವಾದಿಗಳು ಬ್ರಿಟಿಷರಿಗೆ ದಾನವಾಗಿ ನೀಡಿದ್ದರು’ ಎಂದು ಅವರು ತಿಳಿಸಿದರು.
